കൊവിഡ് പശ്ചാത്തലത്തിൽ എല്ലാവരും ലോക്ക് ഡൌണിൽ കഴിയുന്നതിനാൽ പൊതുദർശനമോ അന്ത്യാഞ്ജലി അർപ്പിക്കലോ ഉണ്ടാകില്ല. കുടുംബാംഗങ്ങളുടെ സാന്നിധ്യത്തിൽ സംസ്കാരചടങ്ങുകൾ നടത്തുമെന്നുമാണ് ഇപ്പോൾ ലഭിക്കുന്ന വിവരം. താരത്തിൻ്റെ വിയോഗത്തിന് പിന്നാലെ ദുഃഖാചരണത്തിലാണ് സിനിമാ താരങ്ങൾ. താരത്തോടൊപ്പമുള്ള അഭിനയ പരിചയവും അദ്ദേഹത്തെക്കുറിച്ചുള്ള ഓർമ്മകളും കുറിച്ച് രംഗത്തെത്തിയിരിക്കുകയാണ് സിനിമാ താരം അനീഷ് ജി മേനോൻ.
ശശിയേട്ടൻ യാത്രയായി
തൻ്റെ സോഷ്യൽ മീഡിയ അക്കൌണ്ടിലൂടെയാണ് അനീഷ് തൻ്റെ പ്രിയതാരത്തെ കുറിച്ചുള്ള ഓർമ്മക്കുറിപ്പ് പങ്കുവെച്ചിരിക്കുന്നത്. ശശിയേട്ടൻ യാത്രയായി എന്ന് കുറിച്ചുകൊണ്ടാണ് താരം തൻ്റെ ഓർമ്മക്കുറിപ്പ് എഴുതിത്തുടങ്ങിയിരിക്കുന്നത്. അദ്ദേഹത്തെ ആദ്യമായി കാണുന്നത് കോഴിക്കോട് സ്റ്റേജ് ഇന്ത്യയുടെ 'ഭഗ്യരേഖ' എന്ന നാടകത്തിലെ കോമഡി നടനായിട്ടാണെന്ന് താരം ഫേസ്ബുക്കിൽ പങ്കുവെച്ച കുറിപ്പിൽ എഴുതിയിരിക്കുന്നു.
'ചെലക്കാതേ പോഡോ അവിടുന്ന്'
താടി നീട്ടി പിടിച്ച് ചുണ്ട് കൂർപ്പിച്ച്.. "ചെലക്കാതേ പോഡോ അവിടുന്ന്.." എന്ന ശശിയെട്ടന്റെ സൂപ്പർഹിറ്റ് ഡയലോഗ് അന്നും കൂടെയുണ്ടെന്നും ശശിയേട്ടൻ മുത്തശ്ശനും ഞാൻ അദ്ദേഹത്തിന്റെ കൊച്ചുമോനുമായി അഭിനയിച്ച ചിത്രമാണ് 'മാഹി'. ഈ സിനിമയുടെ ലൊക്കേഷനിൽ വെച്ചാണ് അദ്ദേഹത്തെ അവസാനമായി കാണുന്നതെന്നും ഒരുപാട് സംസാരിച്ചുവെന്നും അനീഷ് കുറിച്ചിരിക്കുന്നു.
'ഒരു മനുഷ്യന്റെ മനസ്സ് ആർക്കും കാണണ്ടഡോ'
"എടോ.. ഒരു മനുഷ്യന്റെ മനസ്സ് ആർക്കും കാണണ്ടഡോ ഓന്റെ ചുറ്റുപാടുകളെ കുറിച്ചാണ് എല്ലാവരുടെയും ആവലാതി.." കുറച്ചു നേരം മിണ്ടാതിരുന്നിട്ട്‌ ഉറക്കെ ചിരിച്ചു..പിന്നെ പറഞ്ഞു; "ചെലക്കാതെ പോവാൻ പറയെഡൗ". ഞാൻ അദ്ദേഹത്തിൽ നിന്ന് ആദ്യമായി കേട്ട അതെ ഡയലോഗ്...! ചന്ദ്രകുമാർ എന്ന ശശി കലിംഗക്ക്‌, ആദരാഞ്ജലികൾ...
ആദരാഞ്ജലികളുമായി ആരാധകരും
നിരവധി ആരാധകരാണ് ശശി കലിംഗ എന്ന അതുല്യ കലാകാരൻ്റെ വിയോഗത്തിൽ മനം നൊന്ത് അന്ത്യാഞ്ജലി അർപ്പിച്ചുകൊണ്ട് അനീഷിൻ്റെ കുറിപ്പിന് താഴെ കമൻ്റുകളുമായി എത്തിയിരിക്കുന്നത്.