റഷ്യക്കാരിയെ ഭാര്യയാക്കിയ ബാബു ആന്റണി! മനോഹരമായ ജീവിതയാത്രയെക്കുറിച്ച് പറഞ്ഞ് ബാബു ആന്റണി

വില്ലത്തരത്തിലൂടെയായി ശ്രദ്ധ നേടിയ താരമാണ് ബാബു ആന്റണി. തെന്നിന്ത്യന്‍ ഭാഷകളിലെല്ലാമായി തിളങ്ങിയ താരത്തിന് നിരവധി മികച്ച അവസരങ്ങളാണ് ലഭിച്ചത്. ഭരതന്‍ സംവിധാനം ചെയ്ത ചിലമ്പിലൂടെയായി അരങ്ങേറിയ താരം ഇടയ്ക്ക് വെച്ച് അഭിനയത്തില്‍ നിന്നും ബ്രേക്കെടുത്തിരുന്നു. രണ്ടാം വരവില്‍ നിരവധി മികച്ച വേഷങ്ങളായിരുന്നു അദ്ദേഹത്തിന് ലഭിച്ചത്. സോഷ്യല്‍മീഡിയയില്‍ സജീവമായ ബാബു ആന്റണി പങ്കിടുന്ന വിശേഷങ്ങളെല്ലാം പെട്ടെന്ന് തന്നെ വൈറലായി മാറാറുണ്ട്. തന്റെ വിവാഹവാര്‍ഷികത്തെക്കുറിച്ച് പറഞ്ഞുള്ള പോസ്റ്റുമായും അദ്ദേഹം എത്തിയിരുന്നു. ജനുവരി 15 ഞങ്ങളുടെ വെഡ്ഡിംഗ് ആനിവേഴ്‌സറിയാണ്. രണ്ട് പതിറ്റാണ്ടിലേറെയായി ഞങ്ങളൊന്നിച്ചിട്ട്. ഞങ്ങള്‍ക്കിടയില്‍ രണ്ടുപേര്‍ കൂടി. മൂന്ന് രാജ്യങ്ങളും കടന്ന് ഞങ്ങളുടെ സ്‌നേഹബന്ധം മുന്നേറുന്നു എന്നുമായിരുന്നു ബാബു ആന്റണി കുറിച്ചത്. താരങ്ങളും ആരാധകരുമെല്ലാം അദ്ദേഹത്തിന്റെ പോസ്റ്റിന് താഴെയായി ആശംസകള്‍ അറിയിച്ചെത്തിയിരുന്നു.
പ്രണയത്തെക്കുറിച്ചും വിവാഹത്തെക്കുറിച്ചുമൊക്കെയുള്ള ബാബു ആന്റണിയുടെ തുറന്ന് പറച്ചിലുകള്‍ നേരത്തെയും വൈറലായിരുന്നു. താനുമായി പ്രണയത്തിലായിരുന്നുവെന്ന് പലരും പറയുന്നത് കേട്ടിട്ടുണ്ട്. അവരെയൊന്നും തനിക്കറിയില്ല. വിവാഹത്തിന് മുന്‍പ് ഒരൊറ്റയാളെയേ പ്രണയിച്ചിരുന്നുള്ളൂ. അതൊരു ഇന്ത്യന്‍ വനിതയായിരുന്നു. കോളേജില്‍ പഠിച്ചുകൊണ്ടിരിക്കുന്ന സമയത്തായിരുന്നു. അവരെ കല്യാണം കഴിക്കണമെന്ന് ആഗ്രഹിച്ചെങ്കിലും അത് നടന്നിരുന്നില്ലെന്നുമായിരുന്നു ബാബു ആന്റണി പറഞ്ഞത്.
റഷ്യന്‍കാരിയാണ് ഭാര്യ. അമേരിക്കയില്‍ വെച്ചായിരുന്നു പുള്ളിക്കാരിയെ കണ്ടുമുട്ടിയത്. ക്രിസ്മസ് പാര്‍ട്ടിയില്‍ പുള്ളിക്കാരി പാട്ടുപാടുന്നതായിരുന്നു ആദ്യം കണ്ടത്. നമുക്കൊരു ഡിന്നറിന് പോയാലോ എന്ന് ചോദിച്ചിരുന്നു. അങ്ങനെയാണ് കൂടുതല്‍ അടുത്തത്. കത്തെക്കുറിച്ച് പറഞ്ഞപ്പോള്‍ തന്നെ മാതാപിതാക്കള്‍ എതിര്‍ത്തിരുന്നു. നിങ്ങള്‍ക്കുണ്ടാവുന്ന മക്കളെ എങ്ങനെ വളര്‍ത്തും, രണ്ടുപേരും രണ്ട് സംസ്‌കാരമാണ് എന്നൊക്കെയായിരുന്നു അവരുടെ വാദം. പ്രതിസന്ധികളെല്ലാം തരണം ചെയ്ത് ഞങ്ങള്‍ ജീവിതത്തിലൊന്നിക്കുകയായിരുന്നു എന്നായിരുന്നു മുന്‍പ് ബാബു ആന്റണി വിവാഹത്തെക്കുറിച്ച് പറഞ്ഞത്.