ഇനി 'ദിലീപി'ൻ്റെ തേരോട്ടം! ഉടൽ, റോഷാക്ക് സിനിമകളുടെ സംവിധായകർ ജനപ്രിയ നായകനൊപ്പം

Authored byജിയ ജോഷി | Samayam Malayalam 22 Jan 2023, 9:25 pm

തിരിച്ചു വരവിൽ പുത്തൻ ട്രാക്കിലാണ് ദിലീപ്. ഹിറ്റ് കോമ്പിനേഷനുകളുമായുള്ള സിനിമകളുമായി പ്രേക്ഷകർക്കു മുമ്പിലേക്ക് എത്താനൊരുങ്ങുമ്പോൾ തന്നെ പുതിയ തലമുറയിലെ സംവിധായകർക്കൊപ്പം പുത്തൻ ട്രാക്കിലുള്ള പ്രോജക്ടുകൾക്ക് കൈകൊടുക്കുകയാണ് താരം. പരീക്ഷണ കാലഘട്ടങ്ങളുടെ ഇടവേളയ്ക്കു ശേഷം തിരികെ എത്തുമ്പോൾ ഒരുപിടി വമ്പൻ പ്രോജക്ടുകളാണ് ഇപ്പോൾ ദിലീപിനായി അണിയറയിലൊരുങ്ങുന്നത്. അതിനൊപ്പം സമീപകാലത്ത് പ്രേക്ഷകരെ വിസ്മയിപ്പിച്ച ഒരുപിടി സിനിമകളുടെ സംവിധായകരുമായാണ് താരം ഇനി സിനിമ ചെയ്യുന്നത്. അത് തൻ്റെ സേഫ്സോണിൽ നിന്നും മാറി പുതിയ ദൃശ്യാവിഷ്കാരത്തിനുള്ള ഇടമാക്കി മാറ്റുകയാണ് താരം. ജനപ്രിയ നായകനെന്ന പട്ടം വീണ്ടും ഊട്ടി ഉറപ്പിക്കാനെത്തുമ്പോൾ ഷൂട്ടിംഗ് കഴിഞ്ഞതും പുരോഗമിക്കുന്നതുമായ ഒരുപിടി പ്രോജക്ടുകളാണ് അണിയറയിലൊരുങ്ങുന്നത്.

actor dileep has changed the track with the young directors of malayalam — ഇനി 'ദിലീപി'ൻ്റെ തേരോട്ടം! ഉടൽ, റോഷാക്ക് സിനിമകളുടെ സംവിധായകർ ജനപ്രിയ നായകനൊപ്പം

Also Read: നൻപകലിലെ സുന്ദരത്തെപ്പോലെ 'നടനും താരവും നിറഞ്ഞാടിയ' കഴിഞ്ഞ പതിറ്റാണ്ടിലെ 'മമ്മൂട്ടി'യുടെ മികച്ച കഥാപാത്രങ്ങൾ

സീറ്റ് എഡ്ജ് ത്രില്ലറുമായി രതീഷ് രഘുനന്ദൻ

2022 ലെ ഹിറ്റ് ചാർട്ടിലിടം നേടിയ ഉടൽ എന്ന ചിത്രത്തിലൂടെ ശ്രദ്ധ നേടിയ സംവിധായകനാണ് രതീഷ് രഘുനന്ദൻ. ധ്യാൻ ശ്രീനിവാസൻ, ഇന്ദ്രൻസ്, ദുർഗ കൃഷ്ണ എന്നിവർ പ്രധാന കഥാപാത്രങ്ങളായ ചിത്രം പ്രമേയംകൊണ്ടും പെർഫോൻസുകൊണ്ടും പ്രേക്ഷകരെ ഞെട്ടിച്ച ചിത്രമായിരുന്നു. രതീഷ് രഘുനന്ദൻ സംവിധാനം ചെയ്യുന്ന പുതിയ ചിത്രത്തിൽ ദിലീപ് നായകനാകുന്നതായാണ് പുതിയ റിപ്പോർട്ട്. സീറ്റ് എഡ്ജ് ത്രില്ലറായി ഒരുക്കുന്ന ചിത്രവുമായി ബന്ധപ്പെട്ട വിവരങ്ങൾ വരും ദിവസങ്ങളിൽ പുറത്തുവിടും. രതീഷ് രഘുനന്ദൻ സംവിധാനം ചെയ്ത ഉടലും മലയാള സിനിമ ഇതുവരെ കാണാത്ത വിധത്തിലുള്ള ത്രില്ലർ കഥയാണ് പറഞ്ഞത്. ഉടൽ ഒടിടി റിലീസിനു കാത്തിരിക്കുകയാണ് പ്രേക്ഷകരും. ഉടൽ റിലീസായതിനു പിന്നാലെ ചിത്രത്തിന്റെ ഹിന്ദി റീമേക്കും രതീഷ് രഘുനന്ദൻ സംവിധാനം ചെയ്യുന്നതായി റിപ്പോർട്ടുണ്ടായിരുന്നു. നസുറുദ്ധീൻ ഷായാണ് ഇന്ദ്രൻസിൻ്റെ കഥാപാത്രത്തെ ഹിന്ദിയിൽ അവതരിപ്പിക്കുന്നത്.

നിസാം ബഷീറിനൊപ്പം

2022 ൽ മലയാള സിനിമയിൽ മികച്ച വാണിജ്യ വിജയവും നിരൂപ പ്രശംസയും നേടിയ ചിത്രമായിരുന്നു മമ്മൂട്ടി നായകനായ റോഷാക്ക്. ത്രില്ലറിനു പുതിയ ഭാവുകത്വം നൽകിയത് സംവിധായകൻ നിസാം ബഷീറായിരുന്നു. ആഖ്യാനംകൊണ്ടും അവതരണംകൊണ്ടും ലോക നിലവാരത്തിലൊരുക്കിയ ചിത്രം മമ്മൂട്ടിയുടെ കരിയറിലും ശ്രദ്ധേയ ചിത്രമായി മാറി. പുതിയ റിപ്പോർട്ടുകൾ പ്രകാരം നിസാം ബഷീറും ദിലീപും ഒന്നിക്കുന്നു. ആസിഫ് അലിയെ നായകനാക്കി കെട്ടിയോളാണ് എൻ്റെ മാലാഖ, റോഷാക്ക് എന്നീ ചിത്രങ്ങൾക്കു ശേഷം നിസാം ബഷീർ സംവിധാനം ചെയ്യുന്ന അടുത്ത ചിത്രത്തിനായുള്ള കാത്തിരിപ്പിലാണ് പ്രേക്ഷകരും. ആദ്യ ചിത്രം കുടുംബ പശ്ചാത്തത്തിലൊരുക്കിയ സംവിധായകൻ രണ്ടാം ചിത്രം തീർക്കും വിഭിന്നമായ മിസ്ട്രി ത്രില്ലറായിട്ടാണ് അവതരിപ്പിച്ചത്. ദിലീപുമായി ഒന്നിക്കുന്ന ചിത്രത്തിൻ്റെ ജോണറേതെന്ന് വൈകാതെ പുറത്തുവരും.

വമ്പൻ ഹൈപ്പിൽ ബാന്ദ്ര

മലയാള സിനിമ ഇതുവരെ കാണാത്ത വമ്പൻ താരനിരയിൽ ഒരുക്കുന്ന ബാന്ദ്രയുടെ ചിത്രീകരണം പുരോഗമിക്കുകയാണ്. രാമലീലയുടെ മെഗാ വിജയത്തിനു ശേഷം ദിലീപിനെ നായകനാക്കി അരുൺ ഗോപി സംവിധാനം ചെയ്യുന്ന ചിത്രമാണിത്. ബിഗ് ബജറ്റിൽ ഒരുക്കുന്ന ചിത്രത്തിൽ തെന്നിന്ത്യൻ താര സുന്ദരി തമന്നയാണ് നായികയാകുന്നത്. ദിലീപിൻ്റെ 147 -ാം ചിത്രത്തിൽ തമിഴ് നടൻ ശരത് കുമാർ, ബോളിവുഡ് നടൻ ദിനോ മോറിയ, ബോളിവുഡ് നടനും മോഡലുമായ രാജ്വീർ അങ്കൂർ സിംങ്ങ്, ധാരാസിംഗ് ഖുറാന, ആര്യൻ സന്തോഷ്, ഈശ്വരി റാവു, അമിത് തീവാരി, ദിനോ മോറിയ, തമിഴ് നടൻ വിടിവി ഗണേഷ്, സിദ്ധിഖ്, കലാഭവൻ ഷാജോൺ, ലെന തുടങ്ങിയ വലിയ താരനിരയാണ് ചിത്രത്തിലെത്തുന്നത്. മുംബൈയുടെ പശ്ചാത്തലത്തിൽ ഒരു യഥാർത്ഥ സംഭവത്തിനെ ആസ്പദമാക്കി ഉദയകൃഷ്ണയാണ് ചിത്രത്തിൻ്റെ രചന നിർവഹിക്കുന്നത്.
മുംബൈയാണ് ചിത്രത്തിൻ്റെ പ്രധാന ലൊക്കേഷൻ. ആക്ഷൻ മാസ് മൂഡിലൊരുക്കുന്ന ചിത്രം അജിത്ത് വിനായക ഫിലിംസിന്റെ ബാനറില് വിനായക അജിത്താണ് ചിത്രത്തിന്റെ നിര്മിക്കുന്നത്. ഷാജി കുമാറാണ് ഛായാഗ്രഹണം. സംഗീതം സാം സി.എസും എഡിറ്റിംഗ് വിവേക് ഹര്ഷനും നിർവഹിക്കുന്നു. ചിത്രത്തിൻ്റെ ഫസ്റ്റ് ലുക്ക് പോസ്റ്റർ വൈറലായിരുന്നു.

വോയിസ് ഓഫ് സത്യനാഥൻ റിലീസിന്

പഞ്ചാബി ഹൗസ്, പാണ്ടിപ്പട, തെങ്കാശിപ്പട്ടണം, റിങ്ങ്മാസ്റ്റർ തുടങ്ങിയ ഒരുപിടി ഹിറ്റ് ചിത്രങ്ങൾക്കു ശേഷം റാഫി - ദിലീപ് കൂട്ടുകെട്ട് വീണ്ടും ഒന്നിക്കുന്ന ചിത്രമാണ് വോയ്സ് ഓഫ് സത്യനാഥൻ. ഹാസ്യത്തിന് മുന്തൂക്കം നല്കുന്ന ചിത്രത്തിൽ ഒരു രാഷ്ട്രീയക്കാരനായാണ് ദിലീപ് എത്തുന്നത്. കെട്ടിയോളാണ് എൻ്റെ മാലാഖ ഫെയിം വീണ നന്ദകുമാറാണ് നായികയാകുന്നത്. ജോജു ജോർജ്, സിദ്ദിഖ്, ജോണി ആൻ്റണി, ബോളിവുഡ് താരം അനുപം ഖേര്, മകരന്ദ് ദേശ്പാണ്ഡെ, അലന്സിയര് ലോപ്പസ്, ജഗപതി ബാബു, ജാഫര് സാദിഖ്, രമേഷ് പിഷാരടി, ജനാര്ദ്ദനന്, ബോബന് സാമുവല്, ബെന്നി പി നായരമ്പലം, ഫൈസല്, ഉണ്ണിരാജ, സ്മിനു സിജോ, അംബിക മോഹന് എന്നിവരും ചിത്രത്തില് വേഷമിടുന്നു. അനുശ്രീ അതിഥിവേഷത്തില് എത്തുന്നു. മൂന്നു വർഷത്തിനു ശേഷമാണ് ഒരു ദിലിപ് ചിത്രം തിയറ്ററിലേക്ക് എത്തുന്നത്.

ഹിറ്റ് ആവർത്തിക്കാൻ ബി. ഉണ്ണികൃഷ്ണനൊപ്പം

2019 ൽ ഹിറ്റ് സൃഷ്ടിച്ച കോടതി സമക്ഷം ബാലൻ വക്കീലിനു ശേഷം ദിലീപിനെ നായകനാക്കി ബി. ഉണ്ണികൃഷ്ണനെ മാസ് എൻ്റർടെയ്നറുമായി എത്തുന്നു. മമ്മൂട്ടിയെ നായകനാക്കി ക്രിസ്റ്റഫർ എന്ന ചിത്രത്തിൻ്റെ പണിപ്പുരയിലാണ് ബി. ഉണ്ണികൃഷ്ണൻ ഇപ്പോൾ. ഉദയകൃഷ്ണയാണ് ക്രിസ്റ്റഫറിനു തിരക്കഥ ഒരുക്കുന്നത്. കോടതി സമക്ഷം ബാലൻ വക്കീലിനു ബി. ഉണ്ണികൃഷ്ണൻ തന്നെയാണ് രചന നിർവഹിച്ചത്. വിക്കുള്ള ബാലൻ വക്കീൽ കഥാപാത്രമായി ദിലീപ് എത്തിയ ചിത്രം ത്രില്ലർ മൂഡിലാണ് ഒരുക്കിയത്. ദിലീപ്, മംമ്ത, രൺജി പണിക്കർ, ഹരീഷ് ഉത്തമൻ തുടങ്ങിയ വലിയ താരനിരയാണ് ചിത്രത്തിലെത്തിയത്. ക്രിസ്റ്റഫറിനു ശേഷമാകും ദിലീപുമായുള്ള പ്രോജക്ടിലേക്ക് കടക്കുന്നത്.

സൂപ്പ‍ർഹിറ്റ് തിരക്കഥാകൃത്തിനൊപ്പം

മലയാള സിനിമയ്ക്കു നിരവധി സൂപ്പർ ഹിറ്റുകൾ സമ്മാനിച്ച കൂട്ടുകെട്ടായിരുന്നു തിരക്കഥാകൃത്തുക്കളായ ഉദയകൃഷ്ണ - സിബി കെ തോമസ്. ഇരുവരും പിരിഞ്ഞതിനു ശേഷം ഉദയകൃഷ്ണ പുലിമുരുകൻ, മധുരരാജ തുടങ്ങിയ ചിത്രങ്ങൾക്കു തിരക്കഥാകൃത്തായി ഹിറ്റുകൾ സൃഷ്ടിച്ചപ്പോഴും സിബി കെ. തോമസ് എവിടെ എന്നായിരുന്നു പ്രേക്ഷകരുടെ ചോദ്യം. പുതിയ റിപ്പോർട്ടുകൾ പ്രകാരം സിബി കെ തോമസ് സംവിധായകനാവുകയാണ്. നിരവധി ഹിറ്റുകൾ സൃഷ്ടിച്ച ദിലീപുമായി ചേർന്നാണ് ആദ്യ ചിത്രം ഒരുക്കുന്നത്. തൻ്റെ ഡ്രീ പ്രോജക്ടടാണ് സിബി കെ തോമസ് സംവിധാനം ചെയ്യുന്നത്. സിബി കെ തോമസാണ് ചിത്രത്തിന് രചന ഒരുക്കുന്നതും. അടുത്ത വർഷം തിയറ്ററിലെത്തുന്ന വിധത്തിലാകും ചിത്രം ഒരുക്കുന്നത്. താര നിർണയവും മറ്റ് അണിയറ പ്രവർത്തകരുടെ വിവരങ്ങളും പിന്നാലെ പുറത്തു വരും.

ടിനു പാപ്പച്ചനുമായി പ്രോജക്ട്?

സ്വാതന്ത്ര്യം അർധരാത്രിയിൽ, അജഗജാന്തരം എന്നീ ചിത്രങ്ങളിലൂടെ പ്രേക്ഷകരെ അമ്പരപ്പിച്ച സംവിധായകനാണ് ടിനു പാപ്പച്ചൻ. ദിലീപിനൊപ്പം ടിനു പാപ്പച്ചൻ ഒന്നിക്കുന്നതായി സമീപകാലത്ത് മോളിവുഡിൽ ചർച്ചയുണ്ടായിരുന്നു. ഔദ്യോഗികമായി സ്ഥിരീകരണം ഇതുവരെയുണ്ടായിട്ടില്ല. ടിനു പാപ്പച്ചൻ സംവിധാനം ചെയ്ത ചാവേർ എന്ന ചിത്രം റിലീസിനു തയാറെടുക്കുകയാണ്. ജോയി മാത്യുവിൻ്റെ തിരക്കഥയിൽ ഒരുങ്ങുന്ന ചാവേർ പൊളിറ്റിക്കൽ ത്രില്ലറായിട്ടാണ് ഒരുക്കുന്നത്. കുഞ്ചാക്കോ ബോബൻ നായകനാകുന്ന ചിത്രത്തിൽ ആൻ്റണി വര്ഗീസ്, അര്ജുന് അശോകന് എന്നിവരും പ്രധാന കഥാപാത്രങ്ങളാണ്. ടിനു പാപ്പച്ചൻ ഇപ്പോൾ ലിജോ ജോസ് പെല്ലിശേരി മോഹൻലാലിനെ നായകനാക്കി ഒരുക്കുന്ന മലൈക്കോട്ട വാലിബനിൽ പ്രവർത്തിക്കുകയാണ്.

ലോക്കൽ ഹീറോയും പിന്നാലെ

ദിലീപ് സൂപ്പർ ഹീറോ കഥാപാത്രമായി വെള്ളിത്തിരയിലെത്തുന്ന ചിത്രം ഉടൻ തയാറാകുമെന്നു പിറന്നാൾ ദിനത്തിൽ ദിലീപ് ആരാധകരെ അറിയിച്ചിരുന്നത്. നവാഗതനായ വിയാൻ വിഷ്ണു സംവിധാനം ചെയ്യുന്ന ചിത്രത്തിനു റാഫിയാണ് തിരക്കഥ ഒരുക്കുന്നത്. കാർണിവൽ മോഷൻ പിക്ചേഴ്സും ദിലീപിൻ്റെ തന്നെ ഉടമസ്ഥതയിലുള്ള ഗ്രാൻഡ് പ്രൊഡക്ഷൻസുമാണ് ചിത്രം നിർമിക്കുന്നത്. ബിഗ് ബജറ്റ് ചിത്രമായിരിക്കുമെന്നാണ് പ്രഥമിക വിവരം. തമിഴ് സംഗീത സംവിധായകൻ അനിരുദ്ധ് രവിചന്ദർ ഈ ചിത്രത്തിലൂടെ ആദ്യമായി മലയാളത്തിലേക്ക് എത്തുമെന്നു സൂചനയുണ്ട്. നാലു വർഷം മുമ്പ് അനൗൺസ് ചെയ്ത ചിത്രത്തിൻ്റെ അണിയറ പ്രവർത്തകരുടെയും മറ്റു താരങ്ങളുടെയും വിവരങ്ങൾ പിന്നാലെ പുറത്തുവിടും. മലയാളത്തിൽ നിന്നും മിന്നൽ മുരളിയ്ക്കു ശേഷം മറ്റൊരു സൂപ്പർ ഹീറോ കഥാപാത്രം എത്തുകയാണ്. മാസ് പരിവേഷമുണ്ടെങ്കിലും റാഫി തിരക്കഥ ഒരുക്കുന്നതിനാൽ കോമഡി ട്രാക്കിലാകും കഥ വികസിക്കുന്നത്.