'ന്യൂഡൽഹി'യിലെ സേലം വിഷ്ണു, 'മനു അങ്കിളി'ലെ ഗോമസ്; മറക്കാനാകുമോ ത്യാഗരാജനെ! പത്തുവര്‍ഷങ്ങൾക്കു ശേഷം അദ്ദേഹം സംവിധായകനായി എത്തുകയാണ്

അലൈകൾ ഒയിവതില്ലൈ എന്ന ചിത്രത്തിലൂടെ 1981-ലാണ് അദ്ദേഹം സിനിമയിൽ അരങ്ങേറിയത്. പിന്നീട് ടിക് ടിക് ടിക്, കല്യാണ കാലം, ഏകലവ്യ തുടങ്ങിയ സിനിമകളുടെ ഭാഗമായി. മലയൂർ മമ്പട്ടിയൻ എന്ന ചിത്രത്തിലെ കൊള്ളക്കാരന്‍റെ വേഷം അദ്ദേഹത്തിന്‍റെ അഭിനയജീവിതത്തിൽ നിർണ്ണായകമായി. തമിഴിൽ പുതിയൊരു പ്രതിനായകന്‍റെ ഉദയമായിരുന്നു അത്. നീങ്കൾ കെട്ടവൈ, പായും പുലി എന്നീ ചിത്രങ്ങളിലൂടെ ഏറെ ശ്രദ്ധനേടുകയുണ്ടായി. 1987-ൽ പുറത്തിറങ്ങിയ മമ്മൂട്ടി ചിത്രം ന്യൂഡൽഹിയിൽ സേലം വിഷ്ണു എന്ന കഥാപാത്രമായി അദ്ദേഹം മലയാളത്തിലുമെത്തി.

1988-ൽ പൂവുക്കുൾ ഭൂകമ്പം എന്ന സിനിമ സംവിധാനം ചെയ്താണ് അദ്ദേഹം സംവിധാനരംഗത്ത് തുടക്കമിട്ടത്. വൻ വിജയമായ ന്യൂഡൽഹിയിലെ 'വിഷ്ണു' എന്ന കഥാപാത്രത്തെ നായകനാക്കിക്കൊണ്ട് സേലം വിഷ്ണു എന്ന ചിത്രം 1990-ൽ ത്യാഗരാജൻ സംവിധാനം ചെയ്യുകയുണ്ടായി. അതിനുശേഷം മകൻ പ്രശാന്തിനെ നായകനാക്കി ആണഴകൻ എന്ന സിനിമയൊരുക്കുകയുണ്ടായി. പിന്നീട് മന്നവ, ഷോക്ക്, ജയ്, പൊന്നാര്‍ ശങ്കര്‍, മമ്പട്ടിയാൻ, സാഗസം, ജോണി തുടങ്ങിയ സിനിമകൾ പ്രശാന്തിനായി ഒരുക്കി. ഇതിൽ ചില സിനിമകളുടെ നിര്‍മ്മാണവും ചിലതിന്‍റെ നിര്‍മ്മാണവും സംവിധാനവും ത്യാഗരാജനായിരുന്നു.

Also Read: മേനോൻ എന്ന പേരൊക്കെ ഔട്ട് ഓഫ് ഫാഷനായില്ലേയെന്ന് കമന്‍റ്; പേര് കാണുമ്പോൾ ജാതീയത തോന്നുന്നത് മനസ്സിൽ അതുള്ളതുകൊണ്ടാണെന്ന് രജിത് മേനോൻ

നാടോടി രാജ, നേരം വന്താച്ച്, പായും പുലി, നല്ല നാൾ, കാവൽ, രാജ യുവരാജ, മനു അങ്കിൾ, അധോലോകം, അന്തിമ തീർപ്പ്, ന്യൂഡൽഹി, സ്റ്റേറ്റ് റൌഡി, സേലം വിഷ്ണു, മഗഡു, സിബിഐ ശിവ, രവിമാമ, വിശ്വ, ജോൺ ജാനി ജനാർദ്ധനൻ, തിളക്കം, ജയ്, ബോഡിഗാർഡ്, യമൻ, ചെക്ക ചിവന്തവാനം, പൊന്മകൾ വന്താൽ തുടങ്ങി നിരവധി സിനിമകളിൽ തെന്നിന്ത്യയിലെ ഒട്ടുമിക്ക ഭാഷകളിലും ബോളിവുഡിലും അദ്ദേഹം സാന്നിധ്യമറിയിച്ചു.

ഇപ്പോഴിതാ 2011ൽ സംവിധാനം ചെയ്ത മമ്പട്ടിയാൻ എന്ന സിനിമയ്ക്ക് ശേഷം പത്ത് വർഷങ്ങൾ കഴിഞ്ഞ് അദ്ദേഹം സംവിധാനം ചെയ്യുന്ന സിനിമ പ്രഖ്യാപിച്ചിരിക്കുകയാണ് അദ്ദേഹം. ബോളിവുഡിൽ ഏറെ വിജയം നേടിയ അന്ധാധുൻ എന്ന സിനിമയുടെ തമിഴ് റീമേക്കായി ഒരുക്കുന്ന അന്ധഗൻ ആണ് ഈ ചിത്രം.

Also Read: 'കയാദു മലയാളത്തിന്‍റെ അഭിമാന താരമാകും'; 'പത്തൊമ്പതാം നൂറ്റാണ്ടി'ലെ നായികയെ കുറിച്ച് വിനയൻ

അന്ധഗൻ തിരക്കഥയൊരുക്കി നിർമ്മിച്ച് സംവിധാനം ചെയ്യുന്നത് ത്യാഗരാജനാണ്. പ്രശാന്ത്, പ്രിയ ആനന്ദ്, സിമ്രാൻ, കാർത്തിക്, സമുദ്രക്കനി, യോഗി ബാബു, വനിത വിജയകുമാർ, കെഎസ് രവികുമാർ, ഉർവശി തുടങ്ങി നിരവധി താരങ്ങളാണ് സിനിമയിൽ അഭിനയിക്കുന്നത്. അടുത്തിടെയാണ് സിനിമയുടെ ടൈറ്റിൽ ലോഞ്ച് നടന്നത്. ടൈറ്റിൽ ലോഞ്ചിനിടെ തൂവെള്ള മുടിയും താടിയുമായി വേറിട്ട ലുക്കിലെത്തിയ ത്യാഗരാജൻ ചിത്രങ്ങൾ സോഷ്യൽമീഡിയയിൽ ശ്രദ്ധ നേടിയിട്ടുമുണ്ട്.