'ഡിപ്രെഷനിൽ നിന്നും മറികടക്കാൻ ട്രീറ്റ്മെൻ്റ് വേണ്ടിവന്നു, ആ അവസ്ഥയെ പറ്റി ഇപ്പോൾ ആലോചിക്കാൻ പോലുമാവുന്നില്ല'; സത്താറിനായി നടത്തിയ മുന്നൊരുക്കങ്ങളെ പറ്റി കാളിദാസ്!

ആകെ അഞ്ച് ദിവസങ്ങൾ കൊണ്ടായിരുന്നു ചിത്രത്തിൻ്റെ ഷൂട്ടിങ് പൂർത്തിയാക്കിയത്. ചിത്രത്തിൻ്റെ ആദ്യ ഷോട്ടിലേക്ക് കാളിദാസ് കഥാപാത്രമായി വന്നപ്പോൾ സെറ്റിൽ എല്ലാവരും നിശബ്ദരായി സ്തബ്ധരായി നോക്കി നിൽക്കുകയായിരുന്നുവെന്നും അത്രമേൽ മികച്ച ഭാവപ്പകർച്ചയായിരുന്നു താരത്തിൻ്റേതെന്നും സംവിധായിക സുധ കൊങ്കര ഒരു അഭിമുഖത്തിൽ പറഞ്ഞിരുന്നു.

ഷൂട്ട് തുടങ്ങുന്നതിന് ഒരു മാസം മുൻപ് മുതൽ തുടങ്ങിയ വർക്ക് ഷോപ്പായിരുന്നെന്നും അവിടെ നിന്ന് ലഭിച്ച മികച്ച അനുഭവങ്ങളാണ് സിനിമയിൽ പ്രതിഫലിച്ചതെന്നും ചിത്രത്തിലെ മറ്റൊരു കഥാപാത്രത്തെ അവതരിപ്പിച്ച ശാന്ത്നു ഭാഗ്യരാജും പറഞ്ഞിരുന്നു. ചിത്രത്തിനായി താൻ ഒരുപാട് ട്രാൻസ്ജെൻഡറുകളുമായി നേരിട്ട് സംസാരിക്കുകയും അവരുടെ കഷ്ടപ്പാടുകൾ അറിഞ്ഞ് ഡിപ്രഷൻ അവസ്ഥയിലേക്ക് വരെ എത്തിയിരുന്നെന്നും കാളിദാസ് പറഞ്ഞിരുന്നു.

ഈ മാനസിക അവസ്ഥകളിൽ നിന്ന് മറികടക്കാൻ ഡോക്ടറുടെ സഹായം തേടേണ്ടി വന്നിട്ടുണ്ടെന്നും ആ അവസ്ഥയെ പറ്റി ഇപ്പോൾ ആലോചിക്കാൻ പോലുമാവുന്നില്ല എന്നുമൊക്കെയാണ് കാളിദാസ് പറയുന്നത്. അവരുടെ അവസ്ഥകൾ വല്ലാതെ അലട്ടുന്നതാണെന്നും അവരുടെ ജീവിതാനുഭവങ്ങളൊക്കെ വളരെ ഇമോഷണലാണെന്നും നടൻ പറഞ്ഞു.

സത്താർ എന്ന കഥാപാത്രത്തെ പൂർണ്ണതയിലെത്തിക്കാൻ ഷോട്ടിന് ശേഷവും കാളിദാസിൽ സത്താർ എന്ന കഥാപാത്രമുണ്ടായിരുന്നെന്നും അത് മറ്റാരെങ്കിലും പറയുമ്പോൾ മാത്രമായിരുന്നു അത് കാളിദാസ് തിരിച്ചറിഞ്ഞിരുന്നതെന്നും ശാന്ത്നു ഭാഗ്യരാജും പറഞ്ഞു. ചിത്രത്തിന് ലഭിക്കുന്ന നല്ല അഭിപ്രായങ്ങൾ ഒരു ടീം എഫോർട്ടിൻ്റെ പരിണിത ഫലം മാത്രമാണെന്നും കാളിദാസ് പറഞ്ഞു.