‘ഇന്ത്യയെ രക്ഷിക്കുന്ന അവതാരം, വ്യക്തിയല്ല പ്രസ്ഥാനം’; മോദിയെ പ്രകീർത്തിച്ച് കൃഷ്ണകുമാർ!

നടൻ കൃഷ്ണകുമാറിനെയും അദ്ദേഹത്തിൻ്റെയും കുടുംബത്തിൻ്റെയും രാഷ്ട്രീയ ചായ്വുമൊക്കെ അടുത്തിടെ വാർത്തകളിൽ ഇടം പിടിച്ചിരുന്നു. നടൻ ഇപ്പോൾ പ്രധാനമന്ത്രിയെ വാനോളം പുകഴ്ത്തിയിരിക്കുന്നതാണ് സോഷ്യൽ മീഡിയയിൽ ശ്രദ്ധിക്കപ്പെട്ടിരിക്കുന്നത്. പ്രധാനമന്ത്രി നരേന്ദ്രമോദി ഒരു വ്യക്തിയല്ല ഒരു പ്രസ്ഥാനമാണെന്നാണ് നടൻ കൃഷ്ണകുമാർ അഭിപ്രായപ്പെട്ടിരിക്കുന്നത്. ഒരു യൂട്യൂബ് ചാനലിന് നൽകിയ അഭിമുഖത്തിലാണ് അദ്ദേഹം തൻ്റെ നിലപാട് തുറന്ന് പറഞ്ഞത്. മോദിയുടെ പ്രവർത്തനങ്ങളെ പ്രശംസിച്ചതിനൊപ്പം മകളും നടിയുമായ അഹാനയ്ക്കു നേർക്കുണ്ടായ സൈബർ ആക്രമണങ്ങളെ കുറിച്ചും സംസാരിച്ചു.

Also Read: ശ്രീനാഥും സുധി കോപ്പയും നായകന്മാര്‍; 'ദുനിയാവിന്‍റെ ഒരറ്റത്ത്'

അഹാനയുടെ ഇൻസ്റ്റാഗ്രാം പോസ്റ്റ് വിവാദമായതിനെക്കുറിച്ച് കൃഷ്ണ കുമാർ പറയുന്നത് ഇങ്ങനെയാണ്. 'അഹാന ചെയ്തത് തെറ്റാണ് എന്ന് ഒരിക്കലും പറയില്ല. എഴുതിയത് വളരെ ശരിയായ കാര്യം തന്നെയാണ്. പക്ഷേ കേരളത്തിൽ ജീവിക്കുമ്പോൾ പബ്ലിക്കിൽ എഴുതാൻ പാടില്ലാത്ത രണ്ടു കാര്യങ്ങളായിരുന്നു അത്, ഒന്ന് മതവും മറ്റൊന്ന് രാഷ്ട്രീയവും.

ആരെയും പേടിച്ചിട്ടല്ല. എങ്കിലും ഇത് രണ്ടും നമ്മൾ തൽക്കാലത്തേക്ക് മാറ്റി വെക്കേണ്ടതുണ്ട്. അല്ലെങ്കിൽ ഒരു രാഷ്ട്രീയ പാർട്ടിയിൽ മെമ്പർഷിപ്പ് എടുത്ത ശേഷം പറയാനുളളത് പറയുക. കൃഷ്ണകുമാർ പറഞ്ഞു. മറിച്ച് സിനിമയാണെങ്കിൽ മറ്റെല്ലാ കാര്യങ്ങളിൽ നിന്നും മാറി നിൽക്കണമെന്നും കാരണം ഇന്ന് കേരളത്തിലെ സിനിമ മറ്റൊരു ലോകമാണെന്നും നടൻ പറഞ്ഞു.

Also Read: ശാരിഖും ആൻ ആൻഡ്രിയയും ഒന്നിക്കുന്ന 'ലാല്‍ ജോസ്' റിലീസിനൊരുങ്ങുന്നു

മോദിയെ കുറിച്ച് കൃഷ്ണ കുമാർ പറയുന്നത് ഇങ്ങനെ. മോദി ഒരു വ്യക്തിയല്ല, പ്രസ്ഥാനമാണ്. അങ്ങനെ പറയാൻ പല കാരണങ്ങളുണ്ട്. അദ്ദേഹത്തെ നമ്മൾ അവതാരമായി കാണാറുണ്ട്. ഇന്ത്യ കൈവിട്ടു പോകുന്നു എന്ന് തോന്നിയ ഒരു സമയമുണ്ടായിരുന്നു. അപ്പോഴാണ് 2014 ൽ അദ്ദേഹത്തിന്റെ വരവ്. അതിനു ശേഷം ഇന്ത്യയിൽ വന്ന മാറ്റങ്ങൾ എടുത്തു പരാമർശിക്കേണ്ടതാണ്. വളരെ ചെറിയ കാര്യങ്ങൾ പോലും കണ്ടെത്താൻ കഴിയുന്ന ഒരു വ്യക്തിയാണ് അദ്ദേഹമെന്നും കൃഷ്ണകുമാർ അഭിപ്രായപ്പെട്ടു.

ഇതിനു പിന്നാലെ കൃഷ്ണ കുമാറും കുടുംബവും വലിയ രീതിയിൽ വിമർശനങ്ങൾക്ക് വിധേയരായിരുന്നു. തുടർന്ന് താരകുടുംബത്തിന് എല്ലാ പിന്തുണയും ഉണ്ടാകുമെന്ന് വ്യക്തമാക്കി ബിജെപി സംസ്ഥാന പ്രസിഡന്റ് കെ സുരേന്ദ്രന്‍ രംഗത്തെത്തിയതും ശ്രദ്ധേയമായി. മോദിയെ അനുകൂലിച്ചതിന്റെ പേരില്‍ വിമര്‍ശന ശരങ്ങൾ ഏറ്റുവാങ്ങുന്ന നടൻ കൃഷ്ണകുമാറിന് എല്ലാവിധത്തിലുള്ള പിന്തുണയുമുണ്ടാകുമെന്നും നരേന്ദ്രമോദി സര്‍ക്കാര്‍ ചെയ്യുന്ന നല്ല കാര്യങ്ങളെ അനുകൂലിച്ചതിന്റെ പേരില്‍ താങ്കളേയും കുടുംബാംഗങ്ങളേയും വേട്ടയാടാന്‍ ആരേയും അനുവദിക്കില്ലെന്നും സുരേന്ദ്രന്‍ വ്യക്തമാക്കി.

Also Read: കൊറോണക്കാലത്തെ അതിജീവനം; ഗുഡ്സ് ഓട്ടോയിൽ പച്ചക്കറി വിറ്റ് സംവിധായകൻ

തൻ്റെ ഫേസ്ബുക്ക് പേജിലൂടെയാണ് സുരേന്ദ്രൻ ഇക്കാര്യം പറഞ്ഞത്. ഇതു പഴയ കേരളമല്ലെന്നും ലക്ഷോപലക്ഷം ജനങ്ങളുടെ അകമഴിഞ്ഞ പിന്തുണ ഇന്ന് താങ്കള്‍ക്കുണ്ടെന്നും സുരേന്ദ്രൻ കുറിച്ചു. താങ്കളെ കണ്ണിലെ കൃഷ്ണമണി പോലെ കാത്തുസൂക്ഷിക്കാന്‍ കരുത്തുള്ള ഒരു മഹാ പ്രസ്ഥാനവും എപ്പോഴും കൂടെയുണ്ടെന്നും എല്ലാവിധ ആശംസകളും പിന്തുണയും നേരുന്നുവെന്നും കൃഷ്ണ കുമാർ കുറിച്ചു.