'ആളിക്കത്തി മനുഷ്യസ്നേഹത്തിന്റെ തീപ്പന്തങ്ങള്‍'; പ്രതീക്ഷയുടെ വിളക്കുകൾ അണഞ്ഞു പോവുന്നില്ലെന്ന് മമ്മൂട്ടി

കരിപ്പൂര്‍ വിമാനാപകത്തിലും രാജമലയിലെ ഉരുള്‍പൊട്ടലിലും രക്ഷാപ്രവര്‍ത്തനത്തിന് എത്തിയവരെ പ്രശംസിച്ച് മമ്മൂട്ടി. നേരത്തെ മോഹന്‍ലാലും രക്ഷാപ്രവര്‍ത്തകരെ അഭിനന്ദിച്ചു കൊണ്ട് രംഗത്ത് എത്തിയിരുന്നു. പ്രതീക്ഷയുടെ വിളക്കുകള്‍ അണഞ്ഞു പോകുന്നില്ലെന്നത് ആശ്വാസകരമാണെന്ന് മമ്മൂട്ടി പറയുന്നു. ഫെയ്സ്ബുക്കിലൂടെയായിരുന്നു അദ്ദേഹം പ്രതികരിച്ചത്.

Also Read: നമ്മെ മുന്നോട്ട് നയിക്കുന്ന നിസ്വാര്‍ത്ഥ പ്രവര്‍ത്തനങ്ങള്‍; രക്ഷാപ്രവര്‍ത്തകര്‍ക്ക് നന്ദി പറഞ്ഞ് മോഹന്‍ലാല്‍

''നമുക്ക് ഒട്ടും പരിചിതമല്ലാത്ത, നമ്മുടെ തലമുറ ഒരിക്കൽ പോലും അനുഭവിച്ചിട്ടില്ലാത്ത ആതുരമായ, വേദനാജനകമായ കാലത്തിലൂടെയാണ് ലോകമിപ്പോൾ കടന്നു പോയ്ക്കൊണ്ടിരിക്കുന്നത്. മനുഷ്യരാശി ഒന്നടങ്കം നിസ്സഹായരായി സ്തംഭിച്ചു നില്ക്കയാണ്. നമ്മെ, കേരളത്തെ സംബന്ധിച്ചിടത്തോളം പരീക്ഷണങ്ങൾക്കു കാഠിന്യമേറുന്നു'' മമ്മൂട്ടി പറയുന്നു.

''പ്രളയം, മലയിടിച്ചിൽ, വിമാന ദുരന്തം അങ്ങനെ ഓരോന്നും കനത്ത ആഘാതമാണ് എല്പിച്ചു കൊണ്ടിരിക്കുന്നത്.
എന്നാൽ പ്രതീക്ഷയുടെ വിളക്കുകൾ അണഞ്ഞു പോവുന്നില്ലെതാണ് ആശ്വാസകരം. പ്രളയത്തിൽ നാമതു കണ്ടതാണ്. മനുഷ്യസ്നേഹത്തിന്റെ, ത്യാഗത്തിന്റെ, ഉജ്ജ്വല ദൃഷ്ടാന്തങ്ങൾ. ഏതാപത്തിലും ഞങ്ങൾ കുടെയുണ്ടെന്നു പറയുന്ന ഒരു ജനതയുടെ ഉദാത്തമായ ആത്മധൈര്യം'' അദ്ദേഹം പറയുന്നു.

Also Read: മകള്‍ക്ക് വേണ്ടി ദുല്‍ഖറിന്റെ ചിത്രം വര; മിസ്റ്റര്‍ ആര്‍ട്ടിസ്റ്റിന് സിനിമാ ലോകത്തിന്റെ കെെയ്യടി

''പെട്ടിമുടിയിൽ ഉരുൾപൊട്ടിയപ്പോഴും കരിപ്പൂരിൽ വിമാനം വീണു തകർന്നപ്പോഴും ആളിക്കത്തിയത് ആ മനുഷ്യസ്നേഹത്തിന്റെ തീപ്പന്തങ്ങളാണ്. ഈ കെട്ടകാലത്തെ വെളിച്ചത്തിലേക്കു നയിക്കുവാൻ സ്നേഹത്തിന്റെ ആ പ്രകാശത്തിനേ കഴിയൂ. നമുക്ക് കൈകോർത്തു നിൽക്കാം .നമുക്കൊരു മിച്ചു നിൽക്കാം .സ്നേഹത്തിന്റെയും കാരുണ്യത്തിന്റേയും ദീപസ്തംഭങ്ങളായി ഉയർന്നു നിൽക്കാം'' മമ്മൂട്ടി കൂട്ടിച്ചേര്‍ക്കുന്നു.