അഭിമുഖത്തിനിടെ മോഹൻലാൽ ചൈനീസ് സംസാരിക്കുന്ന വീഡിയോ വൈറൽ

മോഹൻലാൽ നായകനാകുന്ന ഇട്ടിമാണി മെയ്ഡ് ഇൻ ചൈന തീയേറ്ററുകളിലേക്ക് എത്താനൊരുങ്ങുകയാണ്. ഓണം റിലീസായി സെപ്റ്റംബര്‍ ആറ് വെള്ളിയാഴ്ച ചിത്രം തീയേറ്ററുകളിലെത്തും. ചൈനയിൽ ജനിച്ചു വളർന്ന് പിന്നീട് തൃശൂരിലെ കുന്നംകുളത്ത് ജീവിക്കേണ്ടി വരുന്ന മണിക്കുന്നേൽ ഇട്ടിമാണി എന്ന കഥാപാത്രത്തെയാണ് ചിത്രത്തിൽ മോഹൻലാൽ അവതരിപ്പിച്ചിരിക്കുന്നത്. ചിത്രത്തിൻ്റെ പ്രമോഷൻ പരിപാടികളുടെ തിരക്കിലാണ് മോഹൻലാലിപ്പോഴുള്ളത്. ഇതുമായി ബന്ധപ്പെട്ട് താരം നൽകിയ ഒരു അഭിമുഖത്തിനിടെ ചൈനീസ് ഭാഷ സംസാരിക്കുന്ന വീഡിയോ വൈറലാകുകയാണ്.

Also Read: 'മോഹൻലാൽ ദൈവത്താല്‍ തിരഞ്ഞെടുക്കപ്പെട്ട മകനാണ്'; മഞ്ജു വാര്യര്‍
തന്റെ കഥാപാത്രത്തെ കുറിച്ചും സിനിമയിൽ ഉപയോഗിക്കുന്ന തൃശൂർ- ചൈന ഭാഷകളെ കുറിച്ചുമൊക്കെ മോഹൻലാൽ അഭിമുഖത്തിൽ സംസാരിക്കുന്നുണ്ട്. ഇട്ടിമാണി അമ്മയോട് വളരെ സ്നേഹമുള്ള ഒരാളാണ്, പക്ഷേ നർമ്മത്തിൻ്റെ അകമ്പടിയോടെയാണ് അമ്മയും മകനും തമ്മിലുള്ള ബന്ധം പറഞ്ഞു പോകുന്നത്. സിനിമയിൽ ഇട്ടിമാണിയും അമ്മയും ചിലയിടങ്ങളിലൊക്കെ ചൈനീസ് ഭാഷ സംസാരിക്കുന്നുണ്ട്. ആൾക്കൂട്ടത്തിലും മറ്റും മറ്റുള്ളവർക്ക് മനസ്സിലാവാത്ത രീതിയിൽ കാര്യങ്ങൾ കമ്മ്യൂണിക്കേറ്റ് ചെയ്യാനായിട്ടാണ് ഇതെന്നും എന്നാൽ ചിത്രം കാണുന്ന പ്രേക്ഷകര്‍ക്ക് എല്ലാം മനസിലാകുമെന്നും മോഹൻലാൽ പറഞ്ഞു.


Also Read: 'ലവ് ആക്ഷൻ ഡ്രാമ'യിലെ സുന്ദരഗാനങ്ങളെല്ലാം പുറത്ത് വിട്ടു; ജൂക്ക്ബോക്സ് ഇതാ

ചിത്രത്തിൽ തൃശൂർ ഭാഷ സംസാരിക്കുന്നുണ്ട് എങ്കിലും പക്കാ കൃത്യമായ തൃശൂർ ഭാഷയൊന്നും ഉപയോഗിക്കുന്നില്ല. വളരെ ചുരുക്കം ഇടങ്ങളിൽ മാത്രമേ അത്തരത്തിൽ കൃത്യമായ തൃശൂര്‍ ഭാഷ ഉപയോഗിച്ചിട്ടുള്ളെന്നും ചൈനയിൽ പോയി ചിത്രീകരിക്കുന്ന ആദ്യ മലയാളസിനിമ കൂടിയാണ് ‘ഇട്ടിമാണി- മെയ്ഡ് ഇൻ ചൈന’ എന്നും മോഹൻലാൽ വ്യക്തമാക്കി.

കഥയിൽ ചൈനയ്ക്ക് അത്രയേറെ പ്രാധാന്യം ഉള്ളതു കൊണ്ടാണ് ചൈനയിൽ പോയി ഷൂട്ട് ചെയ്തത്. ചിത്രത്തിൽ താൻ ഒരു ഗാനം ആലപിച്ചിട്ടുണ്ടെന്നും ദീപക് ദേവിൻ്റെ സംഗീതത്തിലാണ് ആ ഗാനം ചിട്ടപ്പെടുത്തിയിരിക്കുന്നതെന്നും വൈക്കം വിജയലക്ഷ്മിയ്ക്ക് ഒപ്പം ചേർന്നാണ് ഗാനം ആലപിച്ചിരിക്കുന്നതെന്നും മോഹൻലാൽ വിശദമാക്കി.

Also Read: രാഖി ഗര്‍ഭിണിയാണ്; എന്‍റെ കുഞ്ഞാണ് അവളുടെ വയറ്റിലെന്ന് ദീപക്

ഹണി റോസ് ആണ് ചിത്രത്തിലെ നായികയായ ജെസ്സി ആയെത്തുന്നത്. രാധിക ശരത് കുമാര്‍ അന്നമ്മ എന്ന കഥാപാത്രത്തെയും അജു വര്‍ഗ്ഗീസ് സുഗുണൻ എന്ന കഥാപാത്രത്തെയും ചിത്രത്തിൽ അവതരിപ്പിക്കുന്നു. കെ പി എ സി ലളിത, സിദ്ദിഖ്, ഹരീഷ് കണാരന്‍, ധര്‍മജന്‍ ബോള്‍ഗാട്ടി, അശോകന്‍, സിജോയ് വര്‍ഗീസ്, കൈലാഷ്, വിനു മോഹന്‍, സ്വാസിക, വിവിയ, സലിം കുമാര്‍, അരിസ്റ്റോ സുരേഷ്, ജോണി ആൻ്റണി, ജോസഫ് ഫെയിം മാധുരി, സാജു നവോദയ, അഞ്ജന അപ്പുക്കുട്ടൻ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

ജിബി- ജോജു കൂട്ടുകെട്ട് ആദ്യമായി സംവിധാനം ചെയ്യുന്ന ചിത്രമാണ് ഇട്ടിമാണി. ഇരുപതു വർഷത്തിലേറെയായി മലയാളസിനിമയിൽ അസോസിയേറ്റായും സഹസംവിധായകനായുമൊക്കെ പ്രവർത്തിക്കുന്ന രണ്ടു വ്യക്തികളാണ് ജിബി ജോജു.