അവനത്ര കുഞ്ഞല്ല, വളർച്ചയിൽ അഭിമാനം! ഹൃദയം കൊണ്ടെഴുതി മോഹൻലാൽ

ഒന്നാമൻ, പുനര്‍ജനി എന്നീ സിനിമകളിൽ ബാല താരമായി തിളങ്ങിയ ശേഷം പിന്നീട് സാഗ‍ർ ഏലിയാസ് ജാക്കി റീലോഡഡ് എന്ന സിനിമയിൽ അതിഥി താരമായി എത്തി. പാപനാസം, ലൈഫ് ഓഫ് ജോസൂട്ടി എന്നീ സിനിമകളിൽ അസി.ഡയറക്ടറായി. ആദി, ഇരുപത്തിയൊന്നാം നൂറ്റാണ്ട് എന്നീ സിനിമകളിൽ നായകനായി അഭിനയിച്ചു. മരക്കാര്‍ അറബിക്കടലിന്‍റെ സിംഹം, ഹൃദയം എന്നീ സിനിമകളാണ് പ്രണവിന്‍റേതായി പുതിയതായി ഒരുങ്ങുന്നത്.

പ്രണവിന്‍റെ 30-ാം ജന്മദിനം സോഷ്യല്‍ മീഡിയയിലൂടെ ആഘോഷമാക്കുകയാണ് താരത്തിന്‍റെ ആരാധകര്‍. അച്ഛനും അമ്മയ്ക്കും സുഹൃത്തുക്കള്‍ക്കുമൊപ്പം പ്രണവ് പിറന്നാള്‍ ആഘോഷിക്കുന്ന ചിത്രങ്ങള്‍ ഇതിനകം സോഷ്യൽമീഡിയയിൽ വൈറലായിട്ടുണ്ട്. ലോക്ക് ഡൗണിനെ തുടര്‍ന്ന് മോഹൻലാലും സുചിത്രയും പ്രണവും ചെന്നൈയിലെ വീട്ടിലാണ്. മകള്‍ വിസ്മയ പഠനത്തിന്‍റെ ഭാഗമായി തായ്‍ലൻഡിലാണ്.

Also Read: പ്രണവ് മോഹന്‍ലാലിന് ഇന്ന് പിറന്നാള്‍; അച്ഛനും അമ്മയ്ക്കുമൊപ്പം കേക്ക് മുറിച്ച് ആഘോഷിച്ച് താരം

മലയാളികളുടെ പ്രിയതാരം പ്രണവിന് പിറന്നാൾ ആശംസകൾ നേർന്ന് അച്ഛന്‍ മോഹൻലാൽ സോഷ്യൽമീഡിയയിൽ ഹൃദയം തൊടുന്നൊരു കുറിപ്പ് പങ്കുവെച്ചിട്ടുണ്ട്. 'എന്‍റെ കുഞ്ഞുമകൻ ഇനിയത്ര കുഞ്ഞല്ല. നിനക്ക് പ്രായമാകുന്തോറും നല്ലൊരു മനുഷ്യനായി മാറുന്നതിൽ, നിന്‍റെ വളർച്ചയിൽ അഭിമാനിക്കാൻ മാത്രമാണ് എനിക്ക് സാധിക്കുന്നത്, ഹാപ്പി ബെര്‍ത്ത് ഡേ', പ്രണവിനൊപ്പമുള്ള ചിത്രം പങ്കു വെച്ച് മോഹൻലാൽ തന്‍റെ ഫേസ്ബുക്ക് പേജിൽ കുറിച്ചിരിക്കുകയാണ്.

ഏറെ നാളുകൾക്ക് ശേ‌ഷമാണ് പ്രണവ് കുടുംബാംഗങ്ങളോടൊപ്പം ജന്മദിനം ആഘോഷിക്കുന്നതെന്ന പ്രത്യേകത കൂടി ഇപ്പോഴുണ്ട്. പല ജന്മദിനത്തിലും പ്രണവ് പലയിടങ്ങളിൽ യാത്രയിലായിരിക്കും, അല്ലെങ്കിൽ സിനിമയുടെ സെറ്റിലായിരിക്കും. 1990 ജൂലൈ 13–നാണ് മോഹൻലാൽ സുചിത്ര ദമ്പതികളുടെ മൂത്ത മകനായി പ്രണവിന്‍റെ ജനനം.

Also Read: തെലുങ്കില്‍ ചരിത്രം കുറിച്ച് ദുല്‍ഖര്‍ സല്‍മാന്‍; പകരം വെക്കാനില്ലാത്ത റെക്കോര്‍ഡ് നേട്ടം!