Prathap Pothan Death :നടനും സംവിധായകനുമായ പ്രതാപ് പോത്തന്‍ അന്തരിച്ചു

മലയാളികളുടെ പ്രിയപ്പെട്ട അഭിനേതാക്കളിലൊരാളായ പ്രതാപ് പോത്തന്‍ വിടവാങ്ങി. 70 വയസായിരുന്നു അദ്ദേഹത്തിന്. ചെന്നൈയിലെ ഫ്‌ളാറ്റില്‍ മരിച്ച നിലയില്‍ കണ്ടെത്തുകയായിരുന്നു. ഹൃദയാഘാതത്തെത്തുടര്‍ന്നാണ് വിയോഗം എന്നുള്ള വിവരങ്ങളും പുറത്തുവന്നിട്ടുണ്ട്. താരങ്ങളെല്ലാം അദ്ദേഹത്തിന് ആദരാഞ്ജലി നേര്‍ന്നെത്തിയിട്ടുണ്ട്. ഞെട്ടിക്കുന്ന വാര്‍ത്ത, വിശ്വസിക്കാനാവുന്നില്ല, മലയാള സിനിമയുടെ തീരാനഷ്ടം എന്നായിരുന്നു താരങ്ങള്‍ പ്രതികരിച്ചത്. പൃഥ്വിരാജ്, മോഹന്‍ലാല്‍, മഞ്ജു വാര്യര്‍ തുടങ്ങിയവരെല്ലാം പ്രതാപ് പോത്തനെക്കുറിച്ചുള്ള കുറിപ്പുമായെത്തിയിട്ടുണ്ട്.
ആരവത്തിലൂടെയായിരുന്നു അദ്ദേഹത്തിന്റെ സിനിമാജീവിതം തുടങ്ങിയത്. അഭിനയം മാത്രമല്ല എഴുത്തും തനിക്ക് വഴങ്ങുമെന്നും അദ്ദേഹം തെളിയിച്ചിരുന്നു. മലയാളത്തിന് പുറമെ തമിഴിലും തെലുങ്കിലും ഹിന്ദിയിലുമെല്ലാം അദ്ദേഹം സാന്നിധ്യം അറിയിച്ചിരുന്നു. മുന്‍നിര സംവിധായകര്‍ക്കൊപ്പമെല്ലാം അദ്ദേഹം പ്രവര്‍ത്തിച്ചിട്ടുണ്ട്. എണ്‍പതുകളില്‍ മലയാളത്തിലും തമിഴിലുമായി നിറഞ്ഞുനിന്ന താരം കൂടിയായിരുന്നു അദ്ദേഹം. ചാമരം, അഴിയാത്ത കോലങ്ങള്‍, നവംബറിന്റെ നഷ്ടം, കോലങ്ങള്‍, നെഞ്ചത്തെ കിള്ളാതെ, കാതല്‍ കഥൈ, നവംബറിന്റെ നഷ്ടം, ഒന്നുമുതല്‍ പൂജ്യംവരെ, 22 ഫീമെയില്‍ കോട്ടയം തുടങ്ങിയ ചിത്രങ്ങളിലെ കഥാപാത്രങ്ങള്‍ ഏറെ ശ്രദ്ധിക്കപ്പെട്ടിരുന്നു.
അഭിനേതാവായി മാത്രമല്ല സംവിധാനവും പ്രതാപ് പോത്തന് വഴങ്ങിയിരുന്നു. ഒരു യാത്രാമൊഴി, ഋതുഭേദം, ഡെയ്‌സി തുടങ്ങി 12 സിനിമകളാണ് അദ്ദേഹം സംവിധാനം ചെയ്തത്. നിര്‍മ്മാതാവായ ഹരി പോത്തന്‍ പ്രതാപ് പോത്തന്റെ സഹോദരനാണ്. അഭിനേത്രിയായ രാധികയെ ആയിരുന്നു പ്രതാപ് പോത്തന്‍ ആദ്യം വിവാഹം ചെയ്തത്. 1985 ലായിരുന്നു ഇവരുടെ വിവാഹം. ഒരുവര്‍ഷത്തിന് ശേഷം ഇരുവരും വേര്‍പിരിയുകയായിരുന്നു. 1990 ലാണ് അമല സത്യനാഥിനെ വിവാഹം ചെയ്തത്. 2012 ല്‍ ഇരുവരും വേര്‍പിരിഞ്ഞു. കേയയാണ് ഇവരുടെ മകള്‍.
യുവതാരങ്ങളോടൊപ്പം പ്രവര്‍ത്തിക്കാന്‍ അവസരം ലഭിച്ചതില്‍ സന്തുഷ്ടവാനാണ് താനെന്ന് പ്രതാപ് പോത്തന്‍ പറഞ്ഞിരുന്നു. എന്നേക്കാളും മികച്ച നടനാണ് പൃഥ്വിരാജ് നമ്മള്‍ കൊടുക്കുന്നതിന്റെ ഇരട്ടി അദ്ദേഹം തിരിച്ച് തരും. ഭയങ്കര ഡെഡിക്കേറ്റഡാണ് പുള്ളിക്കാരന്‍. എന്ത് വന്നാലും പുള്ളിക്കാരന്‍ ടോപ്പിലെത്തും. സിനിമയോടുള്ള പുള്ളിക്കാരന്റെ ഡെഡിക്കേഷന്‍, അതുകൊണ്ട് അവനെ തകര്‍ക്കാന്‍ ആര്‍ക്കുമാവില്ലെന്നായിരുന്നു പ്രതാപ് പോത്തന്‍ പൃഥ്വിരാജിനെക്കുറിച്ച് പറഞ്ഞത്.