ആദ്യമായും അവസാനമായും വാപ്പച്ചി ഒരു വാക്ക് പോലും സംസാരിക്കാൻ പറ്റാതെ ഇറങ്ങിയ വേദി; അബിയുടെ ഓര്‍മ്മകളില്‍ ഷെയ്ന്‍

മലയാളി ഒരിക്കലും മറക്കാത്ത കലാകാരന്മാരില്‍ ഒരാളാണ് അബി. നടനായും മിമിക്രി താരമായുമെല്ലാം ധാരാളം നല്ല ഓര്‍മ്മകള്‍ സമ്മാനിച്ചാണ് അബി കടന്നു പോയത്. ഇന്ന് അബിയുടെ ഓര്‍മ്മ ദിനമാണ്. ഈ അവസരത്തില്‍ നടനും അബിയുടെ മകനുമായ ഷെയ്ന്‍ നിഗം സോഷ്യല്‍ മീഡിയയില്‍ പങ്കുവച്ച കുറിപ്പ് സോഷ്യല്‍ മീഡിയയുടെ ഉള്ള് തൊടുന്നതാണ്.

Also Read: 'വിവേചനം അനുഭവിച്ചിട്ടില്ല, സമത്വത്തിന് വേണ്ടി ശ്രമിച്ച് ബാലന്‍സ് നഷ്ടപ്പെടുത്തുന്നു'; മംമ്തയ്ക്ക് സോഷ്യല്‍ മീഡിയയുടെ മറുപടി

അബിയില്‍ നിന്നും അവാര്‍ഡ് ഏറ്റുവാങ്ങുന്ന തന്റെ ചിത്രം പങ്കുവച്ചു കൊണ്ടായിരുന്നു ഷെയ്ന്‍ വാപ്പച്ചിയെ ഓര്‍ത്തത്. ''ഇന്ന് എന്‍റെ വാപ്പിച്ചിയുടെ ഓര്‍മ്മദിനമാണ്. എന്നെ വിശ്വസിച്ച് നന്ദി വാപ്പച്ചി. ഈ ചിത്രത്തിന് മറ്റൊരു പ്രത്യേകത കൂടി ഉണ്ട്, വാപ്പച്ചി ആദ്യമായും അവസാനമായും സ്റ്റേജിൽ കയറി, ഒരു വാക്ക് പോലും സംസാരിക്കാൻ പറ്റാതെ ഇറങ്ങിയ വേദി ആണ്, ആരും ഒന്നും പറയാനും ആവശ്യപ്പെട്ടില്ല, പരാതി അല്ല കേട്ടോ, വാപ്പച്ചിക്ക് ഉണ്ടായ വേദന ഞാൻ പങ്ക് വയ്ക്കുന്നു.. ഇതാണ് വാപ്പച്ചിയുടെ അവസാന വേദി'' ഷെയ്ന്‍ പറയുന്നു.

2017 നവംബര്‍ 30 നാണ് അബി മരണത്തിന് കീഴടങ്ങിയത്. രക്തസംബന്ധമായ അസുഖത്തിന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു മരണം. കേരളത്തിലെ മിമിക്രയുടെ ചരിത്രത്തിലെ തന്നെ പ്രധാനപ്പെട്ട വ്യക്തികളിലൊരാളാണ് അബി. നയം വ്യക്തമാക്കുന്നുവായിരുന്നു അബിയുടെ ആദ്യ സിനിമ. തൃശ്ശിവപേരൂര്‍ ക്ലിപ്തമാണ് അവസാനമായി അഭിനയിച്ച സിനിമ.

Also Read: പ്രണയസാഫല്യം, റോഷ്ന ഇനി അങ്കമാലിക്കാരന്‍ ചെക്കന്റെ പെണ്ണ്; കിച്ചുവും റോഷ്നയും വിവാഹിതരായി

അബി സൃഷ്ടിച്ച ആമിനത്താത്ത എന്ന കഥാപാത്രം ഇന്നും മലയാളികള്‍ക്ക് ഏറെ പ്രിയപ്പെട്ട കഥാപാത്രമാണ്. മിമിക്രി ലോകത്തെ മിന്നും താരമായ അബി സിനിമയിലേക്ക് എത്തിയപ്പോള്‍ ആ വിജയം ആവര്‍ത്തിക്കാനായില്ല. പക്ഷെ മകന്‍ ഷെയ്ന്‍ നിഗത്തിലൂടെ കാലം ആ സ്വപ്നം സാധ്യമാക്കുകയാണ് ഇപ്പോള്‍.