മോഹന്‍ലാലിനൊപ്പം ശ്രീനിവാസന്‍ വേദിയിലെത്തി! അസുഖത്തെക്കുറിച്ച് ചോദിച്ചവര്‍ക്ക് നല്‍കിയ മറുപടി? ഫോട്ടോയും മരണവാര്‍ത്തയും വൈറലാക്കിയവര്‍ ഇത് കേള്‍ക്കണം!

അനാരോഗ്യം മറന്ന് ചടങ്ങിലേക്ക് എത്തിയതിന് നന്ദിയെന്നായിരുന്നു മോഹന്‍ലാല്‍ ശ്രീനിവാസനോട് പറഞ്ഞത്. പതിവ് പോലെ തന്നെ നര്‍മ്മം കലര്‍ന്ന മറുപടിയായിരുന്നു ശ്രീനിവാസന്റേത്. രോഗശയ്യയിലായിരുന്നു എന്നല്ല രോഗമുള്ള ഞാന്‍ ശയ്യയിലായിരുന്നു എന്നാണ്. നാളുകള്‍ക്ക് ശേഷം ദാസനേയും വിജയനേയും ഒന്നിച്ച് കണ്ടപ്പോള്‍ സിനിമാലോകം ഒന്നടങ്കം സന്തോഷം അറിയിച്ചിരുന്നു. ദാസന്റെയും വിജയന്റെയും ഡയലോഗ് പശ്ചാത്തലത്തില്‍ കേള്‍പ്പിക്കുകയും ചെയ്തിരുന്നു.

2020 ലെ അള്‍ട്ടിമേറ്റ് എന്റര്‍ടൈനര്‍ പുരസ്‌കാരമായിരുന്നു ശ്രീനിവാസന് നല്‍കിയത്. സത്യന്‍ അന്തിക്കാടും മോഹന്‍ലാലും ചേര്‍ന്നായിരുന്നു പുരസ്‌കാരം സമ്മാനിച്ചത്. മലയാളികള്‍ എന്നെന്നും ഓര്‍മ്മിക്കുന്ന തരത്തിലുള്ള നിരവധി കഥാപാത്രങ്ങള്‍ സമ്മാനിച്ച ഇവര്‍ എന്നാണ് വീണ്ടും ഒരുമിക്കുകയെന്നായിരുന്നു എല്ലാവരും ചോദിച്ചത്. ശ്രീനിവാസന്റെ മൂര്‍ച്ചയുള്ള വാക്കുകളും തമാശയുമെല്ലാം നമുക്ക് ഇനിയും കേള്‍ക്കാം. പവിഴമല്ലി ഇനിയും പൂത്തുലയുമെന്നുമായിരുന്നു സത്യന്‍ അന്തിക്കാട് പറഞ്ഞത്.

മാസങ്ങളായുള്ള ആശുപത്രി വാസത്തിന് ശേഷം വീട്ടിലെത്തിയ ശ്രീനിവാസന്റെ ഫോട്ടോ സോഷ്യല്‍മീഡിയയിലൂടെ വൈറലായിരുന്നു. അച്ഛനെ കാണാനെത്തിയ പ്രിയപ്പെട്ടവരാരോ ചെയ്ത കാര്യമാണ് അതെന്നായിരുന്നു മക്കള്‍ പ്രതികരിച്ചത്. ആരായാലും ചെയ്തത് ശരിയായില്ലെന്നായിരുന്നു സിനിമാലോകവും പ്രേക്ഷകരും പറഞ്ഞത്. അച്ഛന്‍ ആശുപത്രിയിലായിരുന്ന സമയം മുതല്‍ ആദരാഞ്ജലി പോസ്റ്റുകള്‍ കണ്ടിരുന്നു. ചത്തിട്ട്‌പോരയെന്നാണ് അവരോട് ചോദിച്ചതെന്ന് ധ്യാന്‍ ശ്രീനിവാസനും പ്രതികരിച്ചിരുന്നു.

താന്‍ മരിച്ചുവെന്ന വാര്‍ത്ത പ്രചരിക്കുന്നുണ്ടെന്നറിഞ്ഞപ്പോള്‍ തമാശയിലൂടെയായാണ് ശ്രീനിവാസന്‍ പ്രതികരിച്ചത്. ആളുകള്‍ സ്‌നേഹത്തോടെ തരുന്നതല്ലേ ഒന്നും പാഴാക്കേണ്ടെന്നായിരുന്നു അദ്ദേഹം പറഞ്ഞതെന്ന് സുഹൃത്ത് വ്യക്തമാക്കിയിരുന്നു. മമ്മൂട്ടിയുള്‍പ്പടെ സിനിമാലോകത്തുള്ളവരെല്ലാം അദ്ദേഹത്തെ കാണാനായി ആശുപത്രിയിലേക്കും വീട്ടിലേക്കും എത്തിയിരുന്നുവെന്നും സുഹൃത്തുക്കള്‍ പറഞ്ഞിരുന്നു.