അന്ന് ഐസിയുവില്‍ കയറി ശ്രീനിയേട്ടനെ കണ്ടപ്പോള്‍ എല്ലാം നഷ്ടപ്പെട്ട പോലെ തോന്നി! ജീവിതത്തില്‍ പതറിപ്പോയ സന്ദര്‍ഭത്തെക്കുറിച്ച് വിമല ടീച്ചറുടെ തുറന്നുപറച്ചില്‍

ശ്രീനിയേട്ടന്‍ നേരത്തെയും ആശുപത്രിയിലായിട്ടുണ്ട്. അന്നൊക്കെ കൂളായി തിരികെ വന്നിട്ടുമുണ്ട്. എന്നാല്‍ അന്നൊരിക്കല്‍ അദ്ദേഹത്തെ ഐസിയുവില്‍ കയറി കണ്ടപ്പോള്‍ പതര്‍ച്ച തോന്നി. എല്ലാം നഷ്ടപ്പെട്ടത് പോലെയാണ് തോന്നിയത്. അമൃത ആശുപത്രിയിലെ ഡോക്ടര്‍മാരാണ് അന്ന് ധൈര്യം തന്നത്. അവരൊക്കെയാണ് ശ്രീനിയേട്ടനെ ജീവിതത്തിലേക്ക് തിരിച്ച് കൊണ്ടുവന്നതെന്നുമായിരുന്നു വിമല ടീച്ചര്‍ പറഞ്ഞത്.

മുഖം നോക്കാതെ തന്റെ നിലപാടുകള്‍ തുറന്ന് പറയുന്ന പ്രകൃതമാണ് ശ്രീനിവാസന്റേത്. അലോപ്പതിക്കാരെ രൂക്ഷമായി വിമര്‍ശിച്ച അദ്ദേഹം ആശുപത്രിയിലായപ്പോള്‍ അതേക്കുറിച്ചുള്ള ചര്‍ച്ചകളും സോഷ്യല്‍മീഡിയയില്‍ അരങ്ങേറിയിരുന്നു. ആരേയും തെറി വിളിച്ചിട്ടില്ല, നിലപാടുകള്‍ തുറന്ന് പറയുകയാണ് ചെയ്തത് എന്നായിരുന്നു ശ്രീനിവാസന്‍ പറഞ്ഞത്. മുഖം നോക്കാതെ കാര്യങ്ങള്‍ പറയുന്ന സ്വഭാവം മാറ്റാനായി ശ്രമിച്ചെങ്കിലും അത് നടന്നില്ലെന്നും ടീച്ചര്‍ പറഞ്ഞിരുന്നു.

ശ്രീനിയേട്ടന്‍ അസുഖബാധിതനായി കിടന്നിരുന്ന സമയത്ത് പ്രണവ് വീട്ടിലേക്ക് വന്നിരുന്നു. വിനീതിനൊപ്പമായാണ് പ്രണവും വന്നത്. അന്ന് അദ്ദേഹം നേരെ സ്വീകരണമുറിയിലേക്ക് വന്നിരുന്നു. ആരെങ്കിലും ചെന്ന് എഴുന്നേല്‍പ്പിച്ചാല്‍ മാത്രമേ സ്വീകരണമുറിയിലേക്ക് വരുമായിരുന്നുള്ളൂ. പ്രണവ് വീട്ടില്‍ വന്ന കാര്യം അറിഞ്ഞാണ് അദ്ദേഹം തനിയെ എഴുന്നേറ്റ് വന്നത്. പിന്നീടെപ്പോഴും അങ്ങനെയാണ്.

മക്കള്‍ സിനിമയിലേക്ക് വരുന്നതിനോടൊന്നും താല്‍പര്യമില്ലായിരുന്നു. സംസ്ഥാന സ്‌കൂള്‍ യുവജനോത്സവത്തില്‍ മാപ്പിളപ്പാട്ടിന് ഫസ്റ്റ് ലഭിച്ചതോടെയാണ് വിനീത് ശ്രദ്ധേയനായത്. ഏത് പരിപാടിയാണേലും അവിടെ വിനീതുമുണ്ട് എന്ന അവസ്ഥയായിരുന്നു അന്നത്തേത്. ഇങ്ങനെ പോയാല്‍ പഠനം ഉഴപ്പുമെന്ന് മനസിലാക്കിയതോടെയാണ് പ്ലസ് വണ്ണിന് ചെന്നൈയിലേക്ക് പോയത്. അതിന് ശേഷമായാണ് ഞങ്ങള്‍ കുടുംബസമേതമായി ചെന്നൈയിലേക്ക് പോയതെന്നും ശ്രീനിവാസനും വിമല ടീച്ചറും പറഞ്ഞിരുന്നു.