നീയെന്തിനാണ് ഇങ്ങനെയുള്ള സിനിമകൾ ചെയ്യുന്നതെന്നായിരുന്നു ചോദ്യം! നിന്നെ ഇങ്ങനെ കാണാൻ പറ്റില്ല, ടൊവിനോ തോമസിന്റെ സിനിമ കണ്ട് അമ്മ ഇങ്ങനെ പ്രതികരിക്കാനുള്ള കാരണം?

വ്യത്യസ്തമായ കഥാപാത്രങ്ങളിലൂടെയായി മലയാള സിനിമയില്‍ തന്റെ സ്ഥാനം ഉറപ്പിക്കുകയായിരുന്നു ടൊവിനോ തോമസ്. വില്ലത്തരത്തിലൂടെ തുടങ്ങി പിന്നീട് നായകനായി മാറുകയായിരുന്നു ടൊവിനോ. നിരവധി മികച്ച അവസരങ്ങളായിരുന്നു താരത്തിന് ലഭിച്ചിരുന്നതും. പഠനശേഷം ജോലി ചെയ്ത് തുടങ്ങിയപ്പോഴും സിനിമാമോഹമായിരുന്നു ടൊവിനോയുടെ മനസില്‍. ജോലിയില്‍ ശ്രദ്ധ കേന്ദ്രീകരിക്കാനാവാത്ത അവസ്ഥയായിരുന്നു. ഇതിനിടയിലായിരുന്നു ലക്ഷ്യത്തിലേക്ക് എത്താനായി ഇറങ്ങിത്തിരിക്കാന്‍ തീരുമാനിച്ചത്. ഇതേക്കുറിച്ച് കൃത്യമായി മനസിലാക്കിയ ലിഡിയയും ആ തീരുമാനത്തിന് സമ്മതം അറിയിക്കുകയായിരുന്നു.
താന്‍ സമീപിക്കുന്ന രീതിയിലല്ല വീട്ടുകാര്‍ തന്റെ സിനിമയെ കാണുന്നതെന്നും ടൊവിനോ പറയുന്നു. കൗമുദി മൂവീസിന് നല്‍കിയ അഭിമുഖത്തിനിടയിലായിരുന്നു ടൊവിനോ ഇതേക്കുറിച്ച് വ്യക്തമാക്കിയത്. കളയെന്ന ചിത്രത്തിന് മികച്ച പ്രതികരണമാണ് ലഭിച്ചത്. എന്നാല്‍ അമ്മയ്ക്ക് ആ സിനിമ അങ്ങനെ ഉള്‍ക്കൊള്ളാനായിരുന്നില്ല. എന്തിനാണ് മോനേ ഇങ്ങനെയുള്ള സിനിമകള്‍ ചെയ്യുന്നതെന്നായിരുന്നു അമ്മയുടെ ചോദ്യം. ഇങ്ങനത്തെ സിനിമകളൊന്നും ഞങ്ങള്‍ക്ക് കണ്ടോണ്ടിരിക്കാനാവില്ലെന്നും അമ്മ ടൊവിനോയോട് പറഞ്ഞിരുന്നു.
വീട്ടിലെ ഇളയ മകനായത് കൊണ്ട് അമ്മയ്ക്ക് കുറച്ച് വാത്സല്യക്കൂടുതലുണ്ട് തന്നോട്. അമ്മ ചിന്തിക്കുന്നത് പോലെ ആലോചിച്ചപ്പോഴാണ് അത് ശരിയാണല്ലോ എന്ന് തോന്നിയത്. അങ്ങനെ നോക്കുമ്പോള്‍ അടിയും ഇടിയുമൊക്കെ പാടാണ്. വയലന്‍സ് രംഗങ്ങളില്‍ അഭിനയിക്കുന്ന താരങ്ങളുടെ മാതാപിതാക്കള്‍ എങ്ങനെയായിരിക്കുമെന്ന് ചിന്തിച്ചത് അന്നായിരുന്നു. ഇതൊക്കെ വെറും തോന്നിപ്പിക്കലല്ലേ, എനിക്കൊന്നും സംഭവിച്ചിട്ടില്ലല്ലോയെന്ന് പറഞ്ഞപ്പോള്‍ ശരിക്കും പറ്റിയില്ലേയെന്നായിരുന്നു അമ്മയുടെ സംശയം. ചോരയൊക്കെ ഒലിപ്പിച്ച് മുറിവൊക്കെയായി നീ ഇരിക്കുന്നത് കാണാന്‍ ഞങ്ങള്‍ക്കിഷ്ടമില്ലെന്നും അമ്മ പറഞ്ഞിരുന്നു. അമ്മയ്ക്ക് ഇഷ്ടമാവുന്ന തരത്തിലുള്ള സിനിമകള്‍ ഇനി ചെയ്യാമെന്ന് പറഞ്ഞാണ് അന്ന് താന്‍ അമ്മയെ ആശ്വസിപ്പിച്ചതെന്നുമായിരുന്നു ടൊവിനോ പറഞ്ഞത്.