പോലീസ് ചെയ്തത് ന്യായമാണെന്ന് സിനിമാ ലോകം

നടിയെ ആക്രമിച്ച കേസില്‍ പോലീസിന്‍റെ കണ്ണുവെട്ടിച്ച്‌ കീഴടങ്ങാനിരുന്ന പള്‍സര്‍ സുനിയെ കസ്റ്റഡിയിലെടുത്ത സംഭവത്തെ അനുകൂലിച്ചും പ്രതികൂലിച്ചും ഒട്ടേറെ വ്യക്തികള്‍ രംഗത്തെത്തിയിട്ടുണ്ട്.
എന്നാല്‍ പോലീസിന്‍റെ നടപടിയെ സിനിമാ ലോകം ഒന്നടങ്കം അഭിനന്ദിക്കുകയാണ്.

നിയമ പുസ്തകത്തിന്‍റെ മുകളില്‍ ചവിട്ടി നിന്നുകൊണ്ട്, ന്യായം നടപ്പാക്കേണ്ട ചില നിമിഷങ്ങളുണ്ടെന്നും അതില്‍ ഒന്നാണ് കൊച്ചി കോടതിയില്‍ ഇന്ന് പിറന്നതെന്നും മുരളി ഗോപി പറഞ്ഞു. കേരളാ പോലീസ് ചെയ്തതില്‍ നിയമം ഇല്ലായിരിക്കാം. പക്ഷേ ന്യായം തീര്‍ച്ചയായും ഉണ്ടെന്നും അദ്ദേഹം പറയുന്നു.

അറസ്റ്റില്‍ സന്തോഷമുള്ളതായി മഞ്ജു വാര്യരും പ്രതികരിച്ചു. സത്യം പുറത്തുവരട്ടെ എന്നും കുറ്റാവാളികള്‍ക്ക് തക്കതായ ശിക്ഷ ലഭിക്കണമെന്നും അവര്‍ വ്യക്തമാക്കി.

നടൻ അനൂപ് മേനോന്‍ കേരള പോലീസിന് അഭിനന്ദനങ്ങള്‍ അറിയിച്ചു. അവനെ രക്ഷപ്പെടാന്‍ ഒരിക്കലും അനുവദിക്കരുതെന്നും ഈ കൊടും കുറ്റവാളിക്ക് വേണ്ടി മനുഷ്യാവകാശ നിയമങ്ങള്‍ പറയരുതെന്നും അനൂപ് പറഞ്ഞു.

ജനമനഃസാക്ഷി കൊടുത്ത കൊട്ടേഷനാ.. ഒന്ന് ക്ഷെമി എന്നാണ് ആഷിഖ് അബു ഇതിനോട് പ്രതികരിച്ചത്.
കേരളാ പോലീസിനൊപ്പമാണ് താനെന്ന് നിവിൻ പോളിയും അറിയിച്ചു.

കേരളാ പോലീസ്, ഞങ്ങള്‍ സുഹൃത്തുക്കളെല്ലാം സന്തോഷത്തിലാണെന്നും നീതിക്കായി കാത്തിരിക്കുന്നുവെന്നും നവ്യാനായരും കോടതിയില്‍ നിന്ന് പള്‍സര്‍ സുനിയെ വലിച്ചിഴച്ച്‌ വാഹനത്തില്‍ കയറ്റിയ പോലീസുകാരോട് ബഹുമാനം തോന്നുന്നെന്നും കേരളത്തിലെ പോലീസുകാരെക്കുറിച്ചോര്‍ത്ത് തനിക്ക് അഭിമാനം തോന്നി തുടങ്ങിയിരിക്കുന്നെന്നും ഭാഗ്യലക്ഷ്മിയും പ്രതികരിച്ചു.

കേരള മനസ്സാക്ഷിയെ ഞെട്ടിക്കുന്ന സംഭവമാണ് നടന്നതെന്നും പെണ്‍കുട്ടിക്ക് നീതി ലഭിക്കണമെന്നും അവര്‍ പറഞ്ഞു. അവനെ ഇഞ്ചിഞ്ചായി ചതക്കണം. മാതൃകാപരമായി ശിക്ഷ ലഭിച്ചാല്‍ ഇത്തരം അക്രമങ്ങള്‍ ഭാവിയില്‍ കുറയുമെന്നും ഭാഗ്യലക്ഷ്മി കൂട്ടിച്ചേര്‍ത്തു.

ഒരു പെണ്‍കുട്ടിക്കും ഇങ്ങനെയൊരു ഗതികേടുണ്ടാവരുത്. എല്ലാ സത്യങ്ങളും പുറത്ത് വരണമെന്നും ഇത് പള്‍സര്‍ സുനിയുടെ അറസ്റ്റിലൂടെ പുറത്ത് വരുമെന്നാണ് കരുതുന്നതെന്നും കെപിഎസി ലളിത പ്രതികരിച്ചു.
പള്‍സര്‍ സുനിക്ക് പിന്നില്‍ ആരാണെന്ന് അറിയില്ലെന്നും. ആ പരനാറിയെക്കുറിച്ചുള്ള വിവരങ്ങള്‍ മാത്രമേ ഇപ്പോള്‍ നമുക്ക് എല്ലാവര്‍ക്കും അറിയൂവെന്നും പോലീസ് ചോദ്യം ചെയ്യലില്‍ കൂടുതല്‍ വിവരങ്ങള്‍ പുറത്തുവരുമെന്ന് പ്രതീക്ഷിക്കാമെന്നും കെപിഎസി ലളിത പ്രതികരിച്ചു.

Actress Abduction: Culprit Surrendered: Mollywood stars Supporting Kerala Police

Mollywood stars Supporting Kerala Police in the case of Actress Abduction case culprit Surrendered