ഡിവോഴ്‌സിന് ശേഷം മംഗളകാര്യങ്ങളില്‍ നിന്നും അമ്മവീട്ടുകാര്‍ മാറ്റിനിര്‍ത്തിയിരുന്നു! കാവ്യ മാധവന്‍ കല്യാണത്തിന് ക്ഷണിച്ചിട്ടും പോവാതിരുന്നതിനെക്കുറിച്ച് ഐശ്വര്യ പറഞ്ഞത്?

കാവ്യ മാധവനൊപ്പം കാശി എന്ന ചിത്രത്തില്‍ അഭിനയിച്ചിട്ടുണ്ട് ഐശ്വര്യ. ആ സമയം മുതലുള്ള പരിചയമാണ്. വിവാഹം തീരുമാനിച്ച സമയത്ത് കാവ്യ എന്നെ വിളിച്ചിരുന്നു. എന്നാല്‍ അന്ന് താന്‍ ആ വിവാഹത്തില്‍ പങ്കെടുത്തില്ലെന്നായിരുന്നു ഐശ്വര്യ പറഞ്ഞത്. വ്യക്തിജീവിതത്തില്‍ അത്ര നല്ല അവസ്ഥയായിരുന്നില്ല ആ സമയത്ത്.

ഐശ്വര്യയുടേത് പ്രണയവിവാഹമായിരുന്നു. ഭര്‍ത്താവ് മുസ്ലീമായിരുന്നതിനാല്‍ ബന്ധുക്കളെല്ലാം എതിര്‍പ്പ് പ്രകടിപ്പിച്ചിരുന്നു. പൊരുത്തക്കേടുകള്‍ പതിവായതോടെയാണ് വിവാഹമോചിതരായത്. ഡിവോഴ്‌സായതിന് ശേഷം അമ്മയുടെ വീട്ടുകാര്‍ മംഗളകാര്യങ്ങളിലൊന്നും തന്നെ പങ്കെടുപ്പിച്ചിരുന്നില്ല. വിവാഹങ്ങള്‍ക്കൊന്നും താന്‍ പങ്കെടുക്കാറുണ്ടായിരുന്നില്ല. അതിനാലാണ് കാവ്യയുടെ വിവാഹത്തിനും പങ്കെടുക്കാതിരുന്നതെന്ന് താരം പറയുന്നു.

ഞാനുമായി പിരിഞ്ഞതിന് ശേഷം ഭര്‍ത്താവ് മറ്റൊരാളെ വിവാഹം ചെയ്തിരുന്നു. അവരുമായും എനിക്ക് സൗഹൃദമുണ്ട്. അവരുടെ മക്കളും എന്റെ മോളും ആ സൗഹൃദം നിലനിര്‍ത്തുന്നുണ്ടായിരുന്നു. മോളുടെ കല്യാണം ഞങ്ങളെല്ലാം ചേര്‍ന്നാണ് നടത്തിയത്. കൊച്ചുമകളുടെ വിവാഹത്തില്‍ പങ്കെടുക്കാന്‍ എന്റെ അമ്മ വന്നിട്ടില്ലെന്നും ഐശ്വര്യ പറഞ്ഞിരുന്നു.

പൊരുത്തപ്പെടാന്‍ കഴിയാതെ വന്നതോടെയാണ് വിവാഹബന്ധം വേര്‍പിരിഞ്ഞത്. മകളുടെ കാര്യങ്ങളെല്ലാം അദ്ദേഹവും ഞാനും ഒന്നിച്ചാണ് ചെയ്തിരുന്നത്. എന്റെ അച്ഛന്റെ വീട്ടുകാര്‍ ആ സമയത്ത് നല്ല പിന്തുണയാണ് നല്‍കിയത്. വിവാഹബന്ധം പിരിയുന്നത് വലിയ കുറ്റമല്ലെന്ന ചിന്താഗതിയായിരുന്നു അവരുടേത്. ചടങ്ങുകളിലൊന്നും മാറ്റിനിര്‍ത്തുന്ന പതിവുകളൊന്നുമില്ലായിരുന്നു അവിടെ.