ഇത് ഫ്രണ്ട്ഷിപ്പ് ടാറ്റു; ഒരുമിച്ച് ടാറ്റു കുത്തി അന്നയും ഗ്യാങ്ങും

അന്നയും കൂട്ടരും കാലിൽ പതിപ്പിച്ചിരിക്കുന്ന ടാറ്റു ഏറെ പ്രത്യേകതയുള്ളതാണ്. സൂര്യനും ചന്ദ്രനും നക്ഷത്രവും ഭൂമിയും അടങ്ങുന്നതാണ് ടാറ്റു. സൂര്യനും ചന്ദ്രനും താരാപഥങ്ങളും ഉൾപ്പെടുന്ന ആകാശഗംഗ തന്നെയാണ് കാലിൽ ഇവർ കുത്തിയിരിക്കുന്നത്.

അന്നയുടെ ഉറ്റ സുഹൃത്തുക്കളാണ് സ്റ്റീവ്, ഹെരീന, റിതിക എന്നിവർ. ഇവരൊരുമിച്ചാണ് സൺ, മൂൺ, സ്റ്റാർ, എർത്ത് ടാറ്റു കാലിൽ പതിപ്പിച്ചിരിക്കുന്നത്. കൂട്ടത്തിൽ ഹെരീനയാണ് സൂര്യൻ, ചന്ദ്രനായി റിതിക, അന്ന സ്റ്റാറാണ്, സ്റ്റീവ് ഭൂമിയും.

ഒത്തുകൂടുമ്പോഴെല്ലാം ഇവർ ചിത്രങ്ങൾ ഇൻസ്റ്റയിലൂടെ പങ്കുവെയ്ക്കാറുണ്ട്. ടാറ്റു കുത്തിയതും ഇവർ ഇൻസ്റ്റ സ്റ്റോറിയായി പങ്കുവെച്ചിരുന്നു. ഫോർട്ടുകൊച്ചിയിൽ അമരാവതിയിലുള്ള ഡി ക്രാങ്ക് ടാറ്റു സ്റ്റുഡിയോയിലാണ് ഇവർ ടാറ്റു കുത്തിയത്.

ഡി ക്രാങ്ക് സ്റ്റുഡിയോയിലെ ടാറ്റു ആർട്ടിസ്റ്റ് ഡാനിയോടാണ് ഇവർ സിമ്പിൾ ആൻഡ് ഹമ്പിൾ ടാറ്റുവിന് കടപ്പെട്ടിരിക്കുന്നത്. കൊച്ചിയിലെ തന്നെ അറിയപ്പെടുന്ന ടാറ്റു ആർട്ടിസ്റ്റാണദ്ദേഹം. ഡാനിയോടൊപ്പമുള്ള ചിത്രവും ഇവർ ഇൻസ്റ്റ സ്റ്റോറിയായിട്ടിട്ടുണ്ട്.

ഏവരേയും കൊതിപ്പിക്കുന്ന സൗഹൃദമാണിവരുടേത്. ഇൻസ്റ്റയിൽ ഇവർ പങ്കുവയ്ക്കുന്ന ചിത്രങ്ങൾക്കെല്ലാം നിരവധി ലവ് റിയാക്ഷനുകളാണ് ലഭിക്കുന്നത്. അന്ന ഷൂട്ടിംഗ് തിരക്കിലാണെങ്കിലും പലപ്പോഴും ഇവരോടൊത്തുള്ള കൂടിക്കാഴ്ചകൾ മുടക്കാറുമില്ല.

വിദേശരാജ്യങ്ങളിലുൾപ്പെടെ ഏറെ പ്രാബല്യത്തിലുള്ള ടാറ്റുയിംഗ് രീതിയാണ് സൺ, മൂൺ, എർത്ത്, സ്റ്റാർ ടാറ്റു. ഫ്രണ്ട്ഷിപ്പ് ടാറ്റു മോഡലുകളിൽ പെട്ടതാണിത്. സുഹൃത്തുക്കളുടെ എല്ലാവരുടെയും ദേഹത്ത് ഈ നാല് ടാറ്റുകളും പതിപ്പിക്കും. അവയിൽ ഓരോരുത്തരം എന്തിനെ പ്രതിനിധീകരിക്കുന്നുവോ അത് മാത്രം ബോൾഡായി രേഖപ്പെടുത്തിയിരിക്കും.