'സുഡാനി'യെ പ്രകീ‍ര്‍ത്തിച്ച് നടി അനു സിതാര

പ്രേക്ഷക-നിരൂപക പ്രശംസ നേടി തീയേറ്ററുകളിൽ മുന്നേറുന്ന 'സുഡാനി ഫ്രം നൈജീരിയ' എന്ന ചിത്രത്തെ പ്രകീര്‍ത്തിച്ച് നടി അനു സിതാര രംഗത്ത്. 'സുഡാനി ഫ്രം നൈജീരിയ കണ്ടു. മികച്ച ചിത്രം. ചിത്രത്തിൽ അഭിനയിച്ചവരെല്ലാം സ്വാഭാവിക അഭിനയം കാഴ്ച വെച്ചു. ക്രൂ മെമ്പേഴ്സിനെല്ലാം അഭിനന്ദനങ്ങൾ'. അനു സിതാര കുറിച്ചു.


നവാഗതനായ സക്കരിയ മുഹമ്മദാണ് ചിത്രം സംവിധാനം ചെയ്തിരിക്കുന്നത്. സമീര്‍ താഹിറും ഷൈജു ഖാലിദും ചേര്‍ന്നാണ് ചിത്രം നിര്‍മ്മിക്കുന്നത്. ഫുട്ബോള്‍ ഭ്രാന്തനായ മജീദ് ആയി സൗബിൻ എത്തുന്നു. മലപ്പുറത്തെ ഫുട്ബോൾ മത്സരത്തിൽ പങ്കെടുപ്പിക്കാൻ നൈജീരയയിൽ നിന്നു മലപ്പുറത്ത് എത്തുന്ന സുഡാനിയായ സാമുവൽ എന്ന നൈജീരിയക്കാരൻ മൂലം മജീദിന്‍റെ ജീവിതത്തിലുണ്ടാകുന്ന മാറ്റങ്ങളാണ് രസകരമായി ചിത്രത്തിൽ അവതരിപ്പിച്ചിരിക്കുന്നത്.

ഷൈജു ഖാലിദ് ക്യാമറ കൈകാര്യം ചെയ്യുന്ന ചിത്രത്തിനു വേണ്ടി തിരക്കഥ ഒരുക്കിയിരിക്കുന്നത് 'കെ.എല്‍10 പത്തി'ലൂടെ ശ്രദ്ധേയനായ മുഹ്‌സിന പരാരിയും സംവിധായകന്‍ സക്കറിയയും ചേര്‍ന്നാണ്. റെക്‌സ് വിജയന്‍ ആണ് ചിത്രത്തിലെ ഗാനങ്ങൾക്ക് സംഗീതം നൽകിയിരിക്കുന്നത്.