ഭാവന നാളെ വിവാഹ പന്തലിലേക്ക്

വീണ്ടുമൊരു താര വിവാഹത്തിന് സാക്ഷ്യം വഹിക്കുകയാണ് മലയാള സിനിമാലോകം. നടി ഭാവനയുടെ വിവാഹമാണ് ഇപ്പോൾ സാമൂഹ്യ മാധ്യമങ്ങളിൽ പ്രധാന ചർച്ചാവിഷയമായിരിക്കുന്നത്. ഭാവനയുടെ വിവാഹത്തിന്‍റെ ഒരുക്കങ്ങളെല്ലാം പൂർത്തിയായി കഴിഞ്ഞു. വിവാഹത്തിന് മുന്നോടിയായുള്ള മെഹന്തി ചിത്രങ്ങൾ സാമൂഹ്യ മാധ്യമങ്ങളിൽ വൈറലായി കൊണ്ടിരിക്കുകയാണ്. മഞ്ഞ ഗൗണിൽ അതീവ സുന്ദരിയായിട്ടായിരുന്നു ഭാവന എത്തിയത്.




കന്നട നിർമാതാവായ നവീൻ ആണ് വരൻ. കഴിഞ്ഞ ദിവസം താരത്തിന്‍റെ സഹോദരൻ പുറത്തുവിട്ട ഫേസ്ബുക്ക് പോസ്റ്റിൽ നിന്നായിരുന്നു വിവാഹം ജനുവരി 22 നാണ് എന്നു വ്യക്തമായത്. തൃശൂരിൽ ജവഹർലാൽ കൺവെൻഷൻ ഹാളിൽ വെച്ചാണ് വിവാഹം. വിവാഹത്തിന് അടുത്ത ബന്ധുക്കളും സുഹൃത്തുക്കളുമായിരിക്കും പങ്കെടുക്കുക. വിവാഹശേഷം ലുലു കണ്‍വെന്‍ഷന്‍ സെന്‍ററില്‍ സ്വീകരണ പരിപാടികള്‍ ഒരുക്കിയിട്ടുണ്ട്. സിനിമ-രാഷ്ട്രീയ മേഖലകളിലെ പ്രമുഖര്‍ ചടങ്ങിലെത്തുമെന്നാണ് കരുതുന്നത്.




നാലു വർഷം നീണ്ടുനിന്ന പ്രണയമാണ് ഇപ്പോൾ വിവാഹത്തിൽ എത്തിയിരിക്കുന്നത്. ഭാവന അഭിനയിച്ച റോമിയോ എന്ന സിനിമയുടെ നിര്‍മാതാവായിരുന്നു നവീന്‍. വളരെ കുറഞ്ഞ കാലംകൊണ്ട് മലയാളം, തെലുങ്ക്, കന്നഡ സിനിമകളില്‍ നായികയായി തിളങ്ങാനുള്ള ഭാഗ്യം ഭാവനയ്ക്ക് ലഭിച്ചു. വിവാഹശേഷം അഭിനയം തുടരുമോ എന്ന കാര്യത്തെ കുറിച്ച് താരം ഇതുവരെയൊന്നും വെളിപ്പെടുത്തിയിട്ടില്ല.