അഭിനയം അറിയാത്ത സുഹ്റയായുള്ള അഭിനയം; വെല്ലുവിളിയെ ഗ്രേസ് നേരിട്ടത് ഇങ്ങനെ

തന്റെ കഥാപാത്രത്തെ കുറിച്ച് ഗ്രേസ് മനസ് തുറക്കുകയാണ്. മനോരമ ഓണ്‍ലെെനിന് നല്‍കിയ അഭിമുഖത്തിലായിരുന്നു ഗ്രേസ് മനസ് തുറന്നത്. അഭിനയം അറിയാത്ത ഒരാളായി ആണ് അഭിനയിക്കേണ്ടിവന്നത്. സാധാരണ സിനിമ ചെയ്യുമ്പോൾ നന്നായി അഭിനയിച്ചു കാണിക്കുക എന്നതാണ് എന്റെ ജോലി. ഇവിടെ അഭിനയം അറിയാത്ത ഒരാളായി നന്നായി അഭിനയിക്കേണ്ടി വന്നു. അതിനായി വളരെ പണിപ്പെട്ടു. ഗ്രേസ് പറയുന്നു.

ആദ്യമൊക്കെ വല്ലാത്ത ആശയക്കുഴപ്പമുണ്ടായിരുന്നു. ഒരു ടേക്കിൽ സാധാരണ സുഹ്റയായും അടുത്ത ടേക്കിൽ ഒരു മോശം നടിയായും അഭിനയിക്കണം. ശ്രദ്ധിച്ചില്ലെങ്കിൽ എല്ലാം കുഴഞ്ഞു മറിയുന്ന അവസ്ഥ. ഒരു കഥാപാത്രത്തിൽ നിന്നും അടുത്ത നിമിഷം തന്നെ വളരെ വ്യത്യസ്തമായ മറ്റൊരാൾ, സൂക്ഷിച്ചു കൈകാര്യം ചെയ്തില്ലെങ്കിൽ എല്ലാം തകരും, പക്ഷെ ഞാൻ ആ വെല്ലുവിളി ഏറ്റെടുത്തുവെന്ന് ഗ്രേസ് പറയുന്നു.

കഥ കേട്ടപ്പോൾ തനിക്കിതു ചെയ്യാൻ കഴിയുമോ‌ എന്ന് സംശയമുണ്ടായിരുന്നു. ഒരു മുസ്ലിം കഥാപാത്രമായി ഇതുവരെ അഭിനയിച്ചിട്ടില്ല. കമ്മിറ്റ് ചെയ്തു കഴിഞ്ഞിട്ട് എങ്ങനെ സുഹ്റ ആയി മാറാം എന്നായി ചിന്തയെന്ന് ഗ്രേസ് പറയുന്നു. ധാരാളം മുസ്ലിം സുഹൃത്തുക്കൾ ഉണ്ടായിരുന്നു. അവരോട് സംസാരിക്കുമ്പോഴൊന്നും ഇതുപോലുള്ള ഒരു കഥാപാത്രം ചെയ്യേണ്ടി വരും എന്ന് കരുതിയിട്ടില്ല‌. തുടര്‍ന്ന് കാണുന്ന ഓരോരുത്തരെയും നിരീക്ഷിക്കാൻ തുടങ്ങിയെന്നും ഗ്രേസ് പറയുന്നു.

തന്റെ അഭിനയ രീതിയെ കുറിച്ചും ഗ്രേസ് മനസ് തുറന്നു. ഞാൻ ഇങ്ങനെ ഒരു വ്യക്തിയെ മുമ്പ് എവിടെയോ കണ്ടിട്ടുണ്ടല്ലോ എന്ന് മനസ്സിൽ ഓർക്കും എന്നിട്ടു അവരുടെ മാനറിസം പകർത്താൻ ശ്രമിക്കും.ഇതാണ് ഗ്രേസിന്റെ രീതി. ആ ഒരു രീതി ഈ കഥാപാത്രത്തെ മികച്ചതാക്കാൻ ഒരുപാടു സഹായിച്ചുവെന്നും ഗ്രേസ് പറയുന്നു.