മൂന്ന് സ്ത്രീകളുടെ ശക്തമായ ചുവടുവെപ്പ്, മാന്യന്മാരെന്ന് നടിക്കുവരും ഇക്കാര്യത്തില്‍ പിന്നിലല്ല: ലിസി

''മൂന്ന് സ്ത്രീകളുടെ ശക്തമായ ചുവടുവെപ്പ്, സമൂഹത്തിന് വേണ്ടിയുള്ള വലിയൊരു ചുവടുവെപ്പിനായുള്ള തുടക്കം. ചെറുപ്പക്കാരുടേയും ദുര്‍ബലരുടേയും മനസിലേക്ക് വിഷം കുത്തിവെക്കുന്ന, പ്രത്യേകിച്ച് സ്ത്രീകള്‍ക്കെതിരെ, ക്രിമിനലുകള്‍ നമ്മുടെ സമൂഹത്തിലൊരു മഹാമാരി പോലെ പടര്‍ന്നിരിക്കുന്നു. അവര്‍ പുറത്ത് വിടുന്ന വൃത്തികേടിന് ഭൂരിപക്ഷത്തെ സ്വാധീനിക്കാന്‍ ആയില്ലെങ്കിലും ഒരു ന്യൂനപക്ഷത്തില്‍ സ്വാധീനമുണ്ടാക്കും'' ലിസി പറയുന്നു.

മാര്‍ഗ്ഗനിര്‍ദ്ദേശികളും വിദഗ്ധരുമായി അഭിനയിക്കുന്ന ഇത്തരക്കാരെ കൊണ്ട് നിറഞ്ഞിരിക്കുകയാണ് യൂട്യൂബും സോഷ്യല്‍ മീഡിയയും. ഇതിനെ നിയന്ത്രിച്ചില്ലെങ്കില്‍ ഇത് നമ്മുടെ സമൂഹത്തേയും പിന്നീട് നമ്മളേയും കാര്‍ന്നു തിന്നുമെന്നും ലിസി പറയുന്നു. നമ്മുടെ നിയമവ്യവസ്ഥ ഈ കൊടിയ കുറ്റകൃതത്തിനെതിരെ നടപടിയെടുക്കുന്നതില്‍ പരാജയപ്പെട്ടുവെന്നും ലിസി പറഞ്ഞു.

ഈ സാഹചര്യത്തില്‍ നിയമം കെെയ്യിലെടുക്കുന്നതിനെ അനുകൂലിച്ചില്ലെങ്കില്‍ പോലും ഭാഗ്യലക്ഷ്മിയും സുഹൃത്തുക്കളും ചെയ്തത് അഭിനന്ദനാര്‍ഹമാണ്. സമൂഹത്തിന്റേയും സര്‍ക്കാരിന്റേയും ശ്രദ്ധയിലേക്ക് ഈ വിഷയം കൊണ്ടു വരാന്‍ അവര്‍ക്ക് സാധിച്ചു. സര്‍ക്കാര്‍ ഇത് ഗൗരവ്വത്തോടെയെടുക്കുമെന്നാണ് താന്‍ പ്രതീക്ഷിക്കുന്നതെന്നും ലിസി പറഞ്ഞു.

ഇത്തരം കാര്യങ്ങള്‍ ചെയ്യുന്നവരെല്ലാം ക്രിമിനലുകള്‍ ആണെന്ന് തെറ്റിദ്ധരിക്കരുത്. എന്റെ അനുഭവത്തിന്റെ അടിസ്ഥാനത്തില്‍ മാന്യന്മാരെന്ന് നടിക്കുന്നവരും ഇങ്ങനെ ചെയ്യാറുണ്ടെന്നും ലിസി പറഞ്ഞു. ഇരയെ ക്രിമിനലും ക്രിമിനലിനെ ഇരയുമാക്കിയവരെ അഭിനന്ദിക്കുന്നതായും ലിസി പരിഹാസരൂപേണ പറഞ്ഞു.