എൻ്റെ മകന് ഇതിലും വലിയ തുടക്കം എവിടെ കിട്ടും, അതൊരു ഭാഗ്യമാണ്; മല്ലിക സുകുമാരൻ

മലയാളത്തിൻ്റെ അഭിമാനമായി മാറിയ 'ലൂസിഫറി'ൻ്റെ നൂറാമത് ദിനാഘോഷം നടന്നത് കഴിഞ്ഞദിവസമായിരുന്നു. നിരവധി താരങ്ങളുടെ സാന്നിധ്യത്തിലാണ് ലൂസിഫറിൻ്റെ നൂറാമത് ദിനാഘോഷം നടന്നത്. കഴിഞ്ഞ ദിവസം കൊച്ചിയിൽ നടന്ന ആഘോഷ വേളയിൽ നടനും ലൂസിഫറിൻ്റെ സംവിധായകനുമായ പൃഥ്വിരാജും അമ്മയും നടിയുമായ മല്ലിക സുകുമാരനും പങ്കെടുത്തിരുന്നു. ചടങ്ങിൽ വെച്ച് മല്ലിക സുകുമാരൻ മോഹൻലാലിനെ കുറിച്ച് പറഞ്ഞ ഒരു കാര്യം വൈറലാകുകയാണിപ്പോൾ.

തൻ്റെ മകൻ പൃഥ്വിയുടെ ജീവിതത്തിലെ ഏറ്റവും വലിയ ഭാഗ്യം ആണ് ലൂസിഫർ എന്ന ചിത്രമെന്ന് മല്ലിക സുകുമാരൻ പറഞ്ഞു. മോഹൻലാൽ എന്ന നടനെ വെച്ച് തൻ്റെ ആദ്യ ചിത്രം ഒരുക്കാൻ പ്രിഥ്വിയ്ക്ക് സാധിച്ചതാണ് അതിനു കാരണമെന്നും മല്ലിക സുകുമാരൻ പറയുന്നു. മല്ലിക സുകുമാരൻ്റെ വാക്കുകളുടെ പൂര്‍ണ രൂപം ഇതാ

“എൻ്റെ മകൻ സംവിധാനം ചെയുന്നു എന്ന് അറിഞ്ഞപ്പോൾ അതിലെ നായകൻ എൻ്റെ ലാലു. ഇതിലും വലിയ തുടക്കം എൻ്റെ മകന് എവിടെ കിട്ടും. ഞാനാ ചതുരം ഒന്ന് വരച്ചു നോക്കി, ആൻ്റണിയിൽ നിന്നും ലാലുവിലേക്കു, ലാലുവിൽ നിന്നും മുരളിയിലേക്കു മുരളിയിൽ നിന്നും പൃഥിയിലേക്ക്, അത് ചെന്നവസാനിക്കുന്നത് സുകുവേട്ടനിലേക്ക്. ലാലുവിനോടുള്ള സ്നേഹം എൻ്റെ മോന് കൊടുത്ത അനുഗ്രഹമായി കാണുന്നു, പൃഥ്വിയുടെ ഏറ്റവും വലിയ ഭാഗ്യം ഒരു നടൻ ആയതിലേറെ ഒരു സംവിധായകനായതിലാണ്.


പൃഥ്വിയുടെ അച്ഛനും നടനുമായ സുകുമാരനെ കുറിച്ച് മോഹൻലാലും ചടങ്ങിൽ വാചാലനായിരുന്നു. ലൂസിഫറിൻ്റെ രണ്ടാം ഭാഗമായ എമ്പുരാൻ ഒരുക്കുന്നതിൻ്റെ അണിയറയിലാണ് പൃഥ്വിരാജും മുരളിഗോപിയും മോഹൻലാലുമിപ്പോൾ. നൂറാംദിന വിജയാഘോഷ വേദിയിൽ വെച്ച് ചിത്രത്തിൻ്റെ മൂന്നാം പതിപ്പിനുള്ള സാധ്യതയെ കുറിച്ച് മുരളി ഗോപി പരോക്ഷമായി പരാമര്‍ശിക്കുകയും ചെയ്തിരുന്നു.