റോക്കി ഭായ് ഇപ്പോഴൊന്നും ഇത് നിര്‍ത്തില്ലെന്ന് അവന് മനസിലായി! അതോടെ അവന്‍ ഉറങ്ങി! ലൂക്കയെ ആദ്യമായി തിയേറ്ററില്‍ കൊണ്ടുപോയതിനെക്കുറിച്ച് മിയ പറഞ്ഞത്

മിനിസ്‌ക്രീനിലൂടെ തുടക്കം കുറിച്ച് ബിഗ് സ്‌ക്രീനിലെത്തിയ താരമാണ് മിയ ജോര്‍ജ്. വിവാഹത്തോടെ സിനിമയില്‍ നിന്നും ബ്രേക്കെടുച്ചുവെങ്കിലും സി ഐഡി ഷീലയിലൂടെ തിരിച്ചുവരികയാണ് താരം. അഭിനയത്തിന് താല്‍ക്കാലികമായി ബ്രേക്ക് നല്‍കിയെങ്കിലും സോഷ്യല്‍മീഡിയയിലൂടെയായി തന്റെ വിശേഷങ്ങളെല്ലാം പങ്കിടാറുണ്ട് മിയ. മിയയുടെ ഭര്‍ത്താവായ അശ്വിന്‍ ഫിലിപ്പും പ്രേക്ഷകര്‍ക്ക് സുപരിചിതനാണ്. കുടുംബസമേതമുള്ള ചിത്രങ്ങള്‍ ഇരുവവരും പങ്കുവെക്കാറുണ്ട്. മകനായ ലൂക്കയുടെ വിശേഷങ്ങളും ചിത്രങ്ങളുമെല്ലാം പെട്ടെന്ന് തന്നെ വൈറലായി മാറാറുണ്ട്.
ലൂക്കയ്‌ക്കൊപ്പം തിയേറ്ററില്‍ പോയതിനെക്കുറിച്ച് പറഞ്ഞെത്തിയിരിക്കുകയാണ് മിയ. കെജിഎഫ് 2 കാണാനായാണ് മിയയും അശ്വിനും ലൂക്കയേയും കൊണ്ടുപോയത്. വിഎഫ്എക്‌സും ബഹളങ്ങളുമെല്ലാം ലൂക്കയ്ക്ക് ബുദ്ധിമുട്ടായി മാറുമോയെന്ന ആശങ്കയുണ്ടായിരുന്നു. അശ്വിനാണെങ്കില്‍ മറ്റുള്ളവര്‍ക്ക് ഒരുതരത്തിലും ബുദ്ധിമുട്ടുകളുണ്ടാക്കരുതെന്ന് നിര്‍ബന്ധമുള്ളയാളാണ്. പോവുന്നതിന് മുന്‍പ് തന്നെ ഞങ്ങള്‍ എല്ലാ സജ്ജീകരണങ്ങളും നടത്തിയിരുന്നു.
സെക്കന്‍ഡ് ഷോയ്ക്കായിരുന്നു ബുക്കിംഗ് ചെയ്തത്. ലൂക്കയ്ക്ക് ഏറ്റവും ഇഷ്ടവും കംഫര്‍ട്ടുമായ വസ്ത്രമാണ് ധരിപ്പിച്ചത്. സ്‌ക്രീനില്‍ എന്താണ് സംഭവിക്കുന്നതെന്ന ആകാംക്ഷയിലായിരുന്നു അവന്‍. പത്ത് പതിനഞ്ച്് മിനിറ്റുകള്‍ക്ക് ശേഷം റോക്കി ഭായ് ഇപ്പോഴൊന്നും ശബ്ദമുണ്ടാക്കുന്നത് നിര്‍ത്തില്ലെന്ന് അവന് മനസിലായി. അതോടെ അവന്‍ ഉറക്കമായി. ലൂക്കയ്‌ക്കൊപ്പമുള്ള ആദ്യത്തെ തിയേറ്റര്‍ അനുഭവം ഇങ്ങനെയാണ്. ഇതുപോലെയുള്ള അനുഭവം വേണമെന്നുമായിരുന്നു മിയ ഇന്‍സ്റ്റഗ്രാമില്‍ കുറിച്ചത്.