പ്രെെവറ്റ് ലെെഫ് എന്നൊന്നില്ലാതായി, മറക്കാനും ഒളിക്കാനും ഒന്നും പറ്റില്ല: മനസ് തുറന്ന് പേളി

താരങ്ങളുടെ വിശേഷങ്ങള്‍ക്ക് പിന്നാലെ മാധ്യമങ്ങളും ആരാധകരും പായുന്നത് പതിവാണ്. എന്നാല്‍ ചിലപ്പോള്‍ ഇത്തരം പിന്തുടരുകള്‍ താരങ്ങള്‍ക്ക് വലിയ തലവേദനയായി മാറാറുമുണ്ട്. വ്യക്തിജീവിതം എന്നൊന്ന് അതോടെ ഇല്ലാതായി മാറും. ഇപ്പോഴിതാ തന്റെ അനുഭവം വെളിപ്പെടുത്തിയിരിക്കുകയാണ് നടിയും അവതാരകയുമായ പേളി മാണി. ബിഗ് ബോസിന് ശേഷം തനിക്ക് പ്രെെവറ്റ് ലെെഫ് എന്നൊന്നില്ലെന്ന് പേളി പറയുന്നു. റെഡ് എഫ്എമ്മിന് നല്‍കിയ അഭിമുഖത്തിലായിരുന്നു പേളി മനസ് തുറന്നത്.

Also Read: ക്യാൻസർ ബാധിതനായി അവശനിലയിൽ ഹാസ്യ താരം തവസി; സഹായ ഹസ്തവുമായി ശരവണൻ

“ബിഗ് ബോസിനു ശേഷം എനിക്ക് പബ്ലിക് ലൈഫ്, പ്രൈവറ്റ് ലൈഫ് എന്നൊന്നില്ല. ഞാനും ശ്രീനിയും തമ്മിലുള്ള ബന്ധം തുടങ്ങിയ കാലം മുതൽ എല്ലാം ആളുകൾ കാണുന്നതാണ്. അവർക്ക് എന്റെ ലൈഫ് അറിയാം. അതുകൊണ്ട് കൂടുതൽ മറക്കാനും ഒളിക്കാനും ഒന്നും പറ്റില്ല.” പേളി പറയുന്നു. ഗർഭിണി ആയപ്പോൾ ആദ്യം ആ വാർത്ത ഒളിച്ചുവെയ്ക്കാം എന്നായിരുന്നു കരുതയിിരുന്നതെന്ന് പേളി പറയുന്നു. പക്ഷെ ഇൻസ്റ്റഗ്രാമിലും ഫേസ്ബുക്കിലുമൊക്കെ ഒരുപാട് നാൾ ആക്റ്റീവ് ആവാതെ ഇരിക്കാൻ കഴിയുന്നതെങ്ങനെയെന്ന് പേളി ചോദിക്കുന്നു. തനിക്കാണെങ്കിൽ എന്തെങ്കിലും ചെയ്തുകൊണ്ടിരിക്കണമെന്നും പേളി പറയുന്നു.

അതേസമയം പേളിയുടെ ഗര്‍ഭകാല വാര്‍ത്തകളെ കുറിച്ച് സോഷ്യല്‍ മീഡിയയില്‍ നിറയുന്ന ട്രോളുകളെ കുറിച്ചും താരം പ്രതികരിച്ചു. നല്ല കമന്റുകൾ മാത്രമാണ് ഞാൻ മനസ്സിലേക്ക് എടുക്കുന്നത്. ബാക്കി വെറുതെ വായിച്ചു കളയുകയാണ് പതിവെന്ന് പേളി വ്യക്തമാക്കുന്നു. സൈബർ ബുള്ളിയിംഗ് എല്ലാക്കാലത്തുമുണ്ട്. ഒരു ആർട്ടിസ്റ്റിനോ സെലബ്രിറ്റിയ്ക്കോ അതിനെ അഭിമുഖീകരിക്കാതെ ഇരിക്കാൻ ആവില്ലെന്ന് പേളി പറയുന്നു.

Also Read: 'താമര'യിൽ ആളും ബഹളവുമില്ലാതെ അമ്മയും മകളും; ഇത് ശരിയായില്ലെന്ന് ആരാധകർ

അതിനുള്ള പരിഹാരം നമ്മള്‍ മാറുകയാണെന്നും പേളി കൂട്ടിച്ചേര്‍ത്തു. ''എന്നെ സംബന്ധിച്ച് ഞാനാണ് മാറിയത്. നല്ല കമന്റുകൾ മാത്രം ഞാൻ എൻജോയ് ചെയ്യും. ചിലർ വേദനിപ്പിക്കാൻ വേണ്ടി തന്നെ കമന്റ് ചെയ്യുന്നതാണ്, അത് കണ്ടില്ലെന്നു നടിക്കുകയാണ് ചെയ്യാറുള്ളത്.” പേളി വ്യക്തമാക്കി.