'നിങ്ങളെ ഒരുപാടിഷ്ടമായിരുന്നു, പക്ഷേ എന്തിനാണ് ഒരു മുസ്ലീമിനെ വിവാഹം ചെയ്തത്?'; പ്രിയമണിയുടെ മറുപടിയ്ക്ക് കൈയ്യടി!

വിവാഹശേഷം പല ഷോകളിലായി ഇരുവരും ഒരുമിച്ച് പ്രത്യക്ഷപ്പെടുകയും ഇരുവരുടെയും പ്രണയകഥ തുറന്ന് പറയുകയുമൊക്കെ ചെയ്തിട്ടുമുണ്ട്. ഇപ്പോഴിതാ സോഷ്യൽ മീഡിയയിൽ പ്രിയ മണി പങ്കുവെച്ച പുത്തൻ ഫോട്ടോഷൂട്ട് ചിത്രങ്ങൾക്ക് താഴെ കമൻ്റായി ഒരു ആരാധകൻ കുറിച്ചിരിക്കുന്ന കമൻ്റും ഇതിന് നടി നൽകിയ മറുപടിയുമൊക്കെയാണ് ശ്രദ്ധ നേടുന്നത്.

'താങ്കളുടെ രക്ത് ചരിത സിനിമ മുതൽ ഒരുപാട് ഇഷ്ടമാണ്. പക്ഷേ താങ്കളെന്തിനാണ് ഒരു മുസ്ലീമിനെ വിവാഹം ചെയ്തത്' എന്നായിരുന്നു അരുൺ ചൌധരി എന്ന ആരാധകൻ്റെ കമൻ്റിലൂടെയുള്ള ചോദ്യം. ഈ ചോദ്യത്തിന് പ്രിയമണി നൽകിയ കിടിലൻ മറുപടിയ്ക്ക് ആരാധകർ കൈയ്യടി നൽകുകയാണ്.

'ഞാൻ വിവാഹം ചെയ്തത് ഒരു ഇന്ത്യൻ പൌരനെയാണ്' എന്നായിരുന്നു പ്രിയമണിയുടെ മാസ്സ് മറുപടി. ഇതിനും മറുപടിയുമായി അരുൺ ചൌധരി എത്തിയിട്ടുണ്ട്. 'അതെ സത്യമാണ്, പക്ഷേ താങ്കൾ പോയതിൽ എനിക്കിപ്പോൾ അസൂയ ഉണ്ട്' എന്നായിരുന്നു അയാളുടെ മറുകമൻ്റ്.

പ്രിയമണിയുടെ കിടിലൻ മറുപടിയ്ക്ക് പ്രശംസയുമായി നിരവധി പേരാണ് എത്തുന്നത്. അതൊരു നല്ല തീരുമാനമായിരുന്നുവെന്നും ജാതിമതഭേദമന്യേ പരസ്പരം വിവാഹം ചെയ്യുന്നത് ചോദ്യം ചെയ്യുന്നവർക്ക് കൊടുക്കാവുന്നതിൽ മികച്ച മറുപടി തന്നെയാണ് അതെന്നായിരുന്നു ഒരു ആരാധിക ചൂണ്ടിക്കാട്ടിയത്.

നമ്മളെല്ലാവരും ഇന്ത്യൻ ജനതയാണെന്നും അത് പറയുന്നതിൽ അഭിമാനിക്കണമെന്നും ആരാധിക കമൻ്റിനൊപ്പം കൂട്ടിച്ചേർത്തു. പ്രിയമണി അഭിമാനമാണെന്ന് ഒരു കൂട്ടം ആരാധകർ ആവർത്തിച്ച് പറയുമ്പോഴും ഈ വിവാഹത്തിലും ഇന്ത്യയിലെ ലവ് ജിഹാദിനെ കൂട്ടിച്ചേർത്ത് വായിക്കുന്നവരും കുറവല്ല. ഇക്കൂട്ടരെ വിമർശിച്ചും ആളുകളെത്തുന്നുണ്ട്.

നടിക്ക് നേർക്ക് നേരത്തേയും ഇത്തരം വിമർശനങ്ങളുയർന്നിട്ടുണ്ട്. ഇതിനെല്ലാം പ്രിയമണി വായടപ്പൻ മറുപടികളാണ് നൽകുന്നത്. മുസ്ലിമിനെ വിവാഹം കഴിച്ചെന്ന് വെച്ച്‌ താന്‍ മതം മാറണോ എന്നും പിന്നെ എന്തിനാണ് സ്പെഷ്യല്‍ മാര്യേജ് ആക്‌ട് എന്നും പ്രിയമണി നേരത്തേ പല ചോദ്യങ്ങൾക്കായുള്ള മറുപടിയായി തുറന്നടിച്ചിരുന്നു.

2017ലാണ് തൻ്റെ അടുത്ത കൂട്ടുകാരനായ മുസ്തഫാ രാജുമായി പ്രിയാ മണി വിവാഹിതയാകുന്നത്. രണ്ടു സമുദായത്തില്‍പെട്ടവര്‍ തമ്മില്‍ വിവാഹം കഴിച്ചു എന്നതിന്‍റെ പേരില്‍ പ്രിയമണി ധാരാളം ട്രോളുകള്‍ക്ക് ഇരയായിട്ടുണ്ട്. അത്തരം പ്രവണതകളോടുള്ള മറുപടിയായി പ്രിയ മണി പറഞ്ഞ കാര്യങ്ങളൊക്കെ വലിയ രീതിയിൽ ദേശീയ മാധ്യമങ്ങളുടെ ശ്രദ്ധ ആകർഷിച്ചിരുന്നു.

ഞാനും മുസ്തഫയും ഞങ്ങളുടെ മതവിശ്വാസങ്ങളെ പരസ്‌പരം ബഹുമാനിക്കുന്നവരാണെന്നും ഞങ്ങളുടെ അച്ഛനമ്മമാരോട് ഞങ്ങള്‍ വിവാഹത്തിന് മുന്‍പ് തന്നെ ഇതേക്കുറിച്ച് സംസാരിച്ച് ബോധ്യപ്പെടുത്തിയിട്ടുണ്ടെന്നും നടി വ്യക്തമാക്കിയിരുന്നു. വേറെ ആര്‍ക്കെങ്കിലും ഇതില്‍ കാര്യമുണ്ട് എന്ന് തോന്നുന്നില്ലെന്നും പ്രിയമണി തുറന്ന് പറഞ്ഞിരുന്നു.

ആരാധകൻ്റെ കമൻ്റും സൈബറിടത്തിൽ വൈറലാകുന്ന പ്രിയമണിയുടെ റിപ്ലെയും.