ശബരിമല സ്ത്രീ പ്രവേശന വിഷയത്തിൽ പ്രിയ വാര്യരുടെ നിലപാട്

ശബരിമലയിലെ സ്ത്രീ പ്രവേശന വിഷയത്തിൽ തൻ്റെ നിലപാട് കഴിഞ്ഞ ദിവസമാണ് പ്രിയ വ്യക്തമാക്കി രംഗത്തെത്തിയത്. ശബരിമലയിലെ സ്ത്രീ പ്രവേശനം വെറും അര്‍ത്ഥശൂന്യമാണെന്നും താൻ ഈ പ്രശ്നത്തെ കുറിച്ച് അധികം ആലോചിച്ചിട്ടില്ലെന്നുമാണ് പ്രിയ വാര്യർ പറഞ്ഞത്. തുല്യതക്ക് വേണ്ടിയാണ് നമ്മള്‍ പോരാടുന്നത് എങ്കില്‍ അതിന് മുമ്പ് അഭിസംബോധന ചെയ്യേണ്ട പല കാര്യങ്ങളും ഉണ്ടെന്നും നടി ചൂണ്ടിക്കാട്ടി.

ഒരു വിശ്വാസി 41 ദിവസം വ്രതം നോറ്റ് വേണം മല ചവുട്ടാൻ. ശബരിമല ആചാരങ്ങള്‍ വര്‍ഷങ്ങളായുള്ളതാണ്. 41 ദിവസം മുഴുവന്‍ ശുദ്ധമായിരിക്കാൻ സ്ത്രീകള്‍ക്ക് കഴിയില്ലെന്നും പ്രിയ വാര്യർ പറഞ്ഞിരുന്നു. ഇതിന് സമാനമായി പൃഥ്വിരാജും കഴിഞ്ഞ ദിവസം ശബരിമലയിലെ സ്ത്രീ പ്രവേശന വിഷയത്തിലെ നിലപാട് വ്യക്തമാക്കിയിരുന്നു.

തുടര്‍ന്ന് പൃഥ്വിയുടെ ഫേസ്ബുക്ക് പേജിൽ സൈബറാക്രമണവും ഉണ്ടായിരുന്നു. ശബരിമലയിൽ പോകണമെന്ന് വാശിപിടിക്കുന്ന സ്ത്രീകളെല്ലാം യഥാര്‍ഥ ഭക്തരാണോ എന്നത് പരിശോധിക്കേണ്ടിയിരിക്കുന്നുവെന്ന് പൃഥ്വിരാജ് അടുത്തിടെ നൽകിയ ആരു അഭിമുഖത്തിൽ പറഞ്ഞിരുന്നു. അല്ലാതെ കാട്ടിൽ ഒരു ക്ഷേത്രമിരിക്കുന്നുണ്ടെന്നും അത് കാണാനാണ് പോകുന്നതെന്നുമുണ്ടെങ്കിൽ നാട്ടിലുള്ള പ്രവേശിക്കാനാകുന്ന ക്ഷേത്രത്തിൽ പോയാൽ പോരേ എന്നായിരുന്നു ശബരിമലയിലെ സ്ത്രീ പ്രവേശന വിഷയത്തിൽ പൃഥ്വിരാജ് പറഞ്ഞത്.