സെല്‍ഫ് പോര്‍ട്രെയിറ്റില്‍ കിടിലന്‍ മേക്കോവര്‍; ഞെട്ടിച്ച് തൊട്ടപ്പന്റെ സാറ!

വിഷ്വല്‍ കമ്മൂണിക്കേഷനാണ് പ്രിയംവദ പഠിച്ചത്. അതില്‍ ഫോട്ടോഗ്രഫിയും ഉണ്ടായിരുന്നു. ലോക്ക്ഡൗണില്‍ സമയം കിട്ടിയപ്പോള്‍ എന്തെങ്കിലും ചെയ്യണമെന്നുണ്ടായിരുന്നു. അങ്ങനെയാണ് ഫോട്ടോഷൂട്ട് നടത്താന്‍ തീരുമാനിച്ചത്. പക്ഷെ സുരക്ഷ കാരണം ആളുകളെ ചേര്‍ക്കാന്‍ സാധിക്കില്ല. ഇതോടെയാണ് സെല്‍ഫ് പോര്‍ട്രെയിറ്റ് എന്ന ആശയം മനസിലുദിച്ചതെന്ന് പ്രിയംവദ വനിത ഓണ്‍ലെെനിനോട് പറഞ്ഞു.

നാച്ച്വറല്‍ ലെെറ്റായിരുന്നു പരമാവധി ഉപയോഗിച്ചത്. അതിനാല്‍ മിക്കതും രാവിലെ തന്നെയായിരുന്നു ഷൂട്ട് ചെയ്തത്. വീട്ടിലെ പ്രോപ്പര്‍ട്ടികളും അമ്മയുടെ സാരിയും ബെഡ് ഷീറ്റുമൊക്കെ ഉപയോഗിച്ചു. മേക്കപ്പ് സാധനങ്ങള്‍ മുതല്‍ അലങ്കാര വസ്തുക്കള്‍ വരെ സ്വന്തം. പൂക്കല്‍ മാത്രമാണ് പ്രത്യേകമായി വാങ്ങിയതെന്നും പ്രിയംവദ പറയുന്നു.

തൊട്ടപ്പന് ശേഷം തട്ടാശ്ശേരിക്കൂട്ടം, ഇടി മഴ കാറ്റ് എന്നീ ചിത്രങ്ങളിലാണ് പ്രിയംവദ അഭിനയിച്ചത്. ലോക്ക്ഡൗണിന് ശേഷം പതിയെ വര്‍ക്കിലേക്ക് തിരിയുകയാണെന്നും പ്രിയംവദ പറയുന്നു. സ്റ്റേഷന്‍ ഫെെവ് എന്ന ചിത്രത്തിന്റെ ചിത്രീകരണം തുടരാനുണ്ട്.

സെല്‍ഫ് പോര്‍ട്രെയിറ്റുകള്‍ എടുക്കുമ്പോള്‍ ആകെ നേരിടേണ്ടി വന്നത് ഒരു വെല്ലുവിളിയാണെന്നും പ്രിയംവദ പറയുന്നു. സ്വന്തം ക്യാമറ സെറ്റ് ചെയ്ത് ഫോട്ടോയ്ക്കായി പോസ് ചെയ്യുമ്പോള്‍ വിയര്‍ത്തു പോകുമെന്നാണ് പ്രിയംവദ പറയുന്നു. ക്യാമറയില്‍ ടെെമര്‍ ഇട്ടായിരുന്നു ചിത്രങ്ങള്‍ എടുത്തത്.