'ഭയങ്കര ടോർച്ചറിങ്ങാണ്'! ആന്ധ്രാ ചമ്മന്തി ഉണ്ടാക്കിത്തന്നു വയർ നശിപ്പിക്കും, ദേഷ്യം വന്നാൽ കണ്ണൊക്കെ വലുതാക്കി ശിവകാമി ദേവിയാവും; രമ്യ കൃഷ്ണനെ കുറിച്ച് മകൻ ഋത്വിക്!

"അമ്മയെ എനിക്ക് ഭയങ്കര ഇഷ്ടമൊക്കെയാണ്. പക്ഷെ വീട്ടിൽ അമ്മ ഭയങ്കര ടോർച്ചറിങ് ആണ്. അത് ചെയ്യാതെ, ഇത് ചെയ്യാതെ, ജങ്ക് ഫുഡ് കഴിക്കാതെ, കെഎഫ്സി കഴിക്കാതെ ഇങ്ങിനെ ഓരോ വിഷയത്തിലും ഭയങ്കര ടോർച്ചറിങ് ആണ്. പിന്നെ ഭയങ്കര ലവിങ് ആണ്. വെറുതെ കെട്ടിപിടിച്ച് ഉമ്മ തന്നോണ്ടിരിക്കും. അമ്മയെപ്പറ്റി ഇഷ്ടമുള്ളത് ഇതൊക്കെയാണ്. ഇനി ഇഷ്ടമല്ലാത്തത് പറഞ്ഞാൽ എനിക്ക് വീട്ടിൽ കയറാൻ പറ്റില്ലല്ലോ. ബാഹുബലിയിൽ നിങ്ങൾ കണ്ടിട്ടില്ലേ കണ്ണൊക്കെ വലുതാക്കി എല്ലാവരോടും ദേഷ്യപ്പെടുന്നത്. വീട്ടിലും ദേഷ്യം വന്നു അലറുമ്പോൾ അങ്ങിനെ തന്നെയാണ്. ഞാൻ ശരിക്കും പേടിച്ചു പോകാറുണ്ട്.

"മാർക്കിന്റെ കാര്യത്തിലൊന്നും അല്ല അമ്മ ബഹളം വയ്ക്കാറുള്ളത്. എനിക്ക് നല്ല മാർക്കൊക്കെ കിട്ടാറുണ്ട്. എന്നാലും ഇത്തിരിയൊക്കെ കുറഞ്ഞാൽ ഇതുപോലെ പേടിപ്പിക്കുന്ന പോലെ ബഹളം വയ്ക്കും. അപ്പോൾ കണ്ടാൽ ശരിക്കും ശിവകാമി ദേവിയെപ്പോലെ ഉണ്ടാകും. അമ്മ ചെയ്ത വേഷങ്ങളിൽ എനിക്ക് ഏറ്റവും ഇഷ്ടം പടയപ്പയിലെ നീലാംബരി എന്ന കഥാപാത്രമാണ്. മുൻപൊക്കെ ഷൂട്ടിങ്ങിന്റെ ഭാഗമായി ഏകദേശം ഒരു മാസത്തോളം ഒക്കെ മാറി നിൽക്കുമായിരുന്നു. അപ്പോഴൊക്കെ എനിക്ക് ഭയങ്കര മിസ്സിംഗ് ആയിരുന്നു അമ്മയെ. പക്ഷെ ഇപ്പോൾ അങ്ങിനെ അമ്മ ഷൂട്ടിങ്ങിനൊക്കെ പോയാൽ വീട്ടിൽ നല്ല സമാധാനം ഉണ്ടാവും". ഇത്രയും പറഞ്ഞ ശേഷം അമ്മയെ നോക്കി ഇതൊക്കെ തമാശ ആണെന്നും ഋത്വിക് പറഞ്ഞു.

"അമ്മയോട് ഞാൻ കള്ളം ഒക്കെ പറഞ്ഞിട്ടുണ്ട്, പക്ഷെ അമ്മയതൊക്കെ ഞാൻ പറയുന്നതിന് മുൻപ് ഞാൻ ആലോചിച്ചു തുടങ്ങുമ്പോൾ തന്നെ കണ്ടു പിടിക്കും. എന്നിട്ട് എന്നോട് ചോദിക്കും എന്താ നീ ചെയ്യുന്നത്, നോട്ടത്തിൽ എന്തോ പ്രശ്‍നം ഉണ്ടല്ലോ എന്തെങ്കിലും കള്ളത്തരം ചെയ്തിട്ടുണ്ടോ എന്നൊക്കെ. ഞാൻ കുഞ്ഞായിരുന്നപ്പോൾ അമ്മയൊരു സ്ട്രിക്ട് ആയിട്ടുള്ള അമ്മയായിരുന്നു. പക്ഷെ, ഞാൻ വളർന്നപ്പോൾ അമ്മ എന്റെ നല്ല സുഹൃത്തായി മാറി. ഇപ്പോഴൊക്കെ എന്റെ സുഹൃത്തുക്കളുടെ കൂടെ ചേർന്ന് അടിച്ചു പൊളിച്ച് വൈബ് സെറ്റ് ആക്കുന്നത് അമ്മയാണ്. അമ്മയുടെ കയ്യിന്നു അടിയൊന്നും കിട്ടിയിട്ടില്ല. ഒരിക്കൽ ഭയങ്കര സീരിയസ് ആയിട്ട് അടിക്കാൻ ഒരു ഹാങ്ങറും കയ്യിലെടുത്ത് വന്നു, അടിക്കാൻ വേണ്ടി വീശിയപ്പോൾ തന്നെ അതങ്ങ് ഒടിഞ്ഞു പോയി. പിന്നെ അമ്മയും എന്റെ കൂടെ അവിടെ ഇരുന്നു ചിരിച്ചു.

അമ്മയോട് പറയാത്തതായിട്ട് ഒന്നുമില്ല, എന്നെക്കുറിച്ചുള്ള എല്ലാ കാര്യങ്ങളും അമ്മയ്ക്ക് അറിയാം. ഇപ്പോഴൊക്കെ എനിക്ക് വാട്സാപ്പിലും ഇൻസ്റ്റയിലും റീൽസ് അയച്ചു തരുന്നത് കൂടുതലും അമ്മയാണ്. ഞാൻ അതൊന്നും നോക്കാറില്ല. കിഡ്‌നിയ്ക്ക് ദോഷം വരുന്ന ഭക്ഷണങ്ങൾ, ഇത് നിങ്ങൾ കഴിക്കാൻ പാടില്ല എന്നിങ്ങനെയുള്ള റൂമർ റീൽസ് ആണ് അമ്മ എനിക്ക് അയക്കാറുള്ളത്. അമ്മ നന്നായിട്ട് ഉപദേശിക്കും, അതിൽ ഒരുപാട് ചിന്തിപ്പിക്കുന്ന ഉപദേശങ്ങളും ഇതൊക്കെയാണോ ഉപദേശം എന്ന് ചിന്തിപ്പിക്കുന്ന ഉപദേശങ്ങളും ഉണ്ടാവാറുണ്ട്. എപ്പൊഴും സത്യസന്ധമായിരിക്കാൻ എന്നോട് പറയാറുണ്ട്.

എന്നോട് എപ്പൊഴും പെട്ടെന്ന് പോയിക്കിടന്നുറങ്ങാൻ ഒക്കെ പറയും. ഞാൻ കുറച്ചു നേരം ഫോണൊക്കെ നോക്കിയിട്ട് മാത്രമേ ഉറങ്ങുള്ളൂ. അങ്ങിനെ വരുമ്പോൾ അമ്മ റീൽസൊക്കെ അയക്കും. എന്നിട്ട് അത് കണ്ടാൽ അപ്പൊ വഴക്ക് പറയും. ഞാൻ അമ്മയിൽ നിന്നും പഠിച്ച വിഷയം എല്ലാവരോടും നല്ല ഓപ്പണായി സംസാരിക്കുക എന്നതാണ്. ചെറിയ വയസിൽ എനിക്ക് എല്ലാവരോടും സംസാരിക്കാൻ ഒരു നാണവും ചമ്മലുമൊക്കെ ആയിരുന്നു. അമ്മയെ കണ്ടുപഠിച്ചാണ് ആ ശീലം മാറ്റിയത്. അമ്മ ആരോടും ഷൈ ആയിട്ടൊന്നും സംസാരിക്കാറില്ല, എല്ലാവരോടും നല്ല ഓപ്പണായിട്ട് ബോൾഡ് ആയിട്ട് സംസാരിക്കും.

അമ്മയ്ക്ക് ലോക്ക്ഡൌൺ വരെയും അത്ര കാര്യമായി കുക്കിംഗ് ഒന്നും അറിയില്ലായിരുന്നു. രാത്രിയൊക്കെ ആ സമയത്ത് എന്തൊക്കെയോ ഉണ്ടാക്കുന്നത് കാണാമായിരുന്നു. ഒരു ദിവസം ഞാൻ കഴിക്കാൻ എന്തെങ്കിലും ഉണ്ടോ എന്ന് ചോദിച്ചപ്പോൾ എനിക്ക് ഒരു ചീസ് ഓംലെറ്റ് 15 മിനിറ്റിനുള്ളിൽ ഉണ്ടാക്കി തന്നു. അതുപോലെ അമ്മ നമ്മുടെ വയർ നശിപ്പിക്കുന്ന ഭക്ഷണവും ഉണ്ടാക്കാറുണ്ട്. ഭയങ്കര സ്‌പൈസി ആയിട്ടുള്ള ഒരു ആന്ധ്രാ ചമ്മന്തി ഉണ്ടാക്കും, അമ്മയുടെ സഹോദരിയും ഞാനും അത് കഴിച്ചിട്ട് ഞങ്ങൾക്ക് വയറിനു അസുഖം വന്നിട്ടുണ്ട്" - ഋത്വിക് പറഞ്ഞു.

"ബാഹുബലിയുടെ ഷൂട്ടിങ് തുടങ്ങുന്ന സമയത്ത് ഇവന് എട്ടുവയസാണ് പ്രായം. ആ സമയത്താണ് ഞാൻ ഔട്ഡോർ ഷൂട്ടിങ്ങിനു അവസാനം പോയത്. അപ്പോഴൊക്കെ ഇവൻ എന്നെ എന്നും ഫോണിൽ വിളിച്ചിട്ട് എപ്പോഴാണ് വരുന്നത് എന്ന് ചോദിച്ചു കരഞ്ഞുകൊണ്ടേയിരിക്കും. ഇപ്പോൾ എന്താണ് അവസ്ഥയെന്ന് അറിയാമോ, എന്നും എന്നോട് വന്നു ചോദിക്കും അമ്മയ്ക്ക് ഷൂട്ടിങ് ഒന്നും ഇല്ലേ, പുതിയ സിനിമ ഏതാണ്, എപ്പോഴാണ് ഷൂട്ടിങ് തുടങ്ങുന്നത്, അമ്മയെപ്പോഴാണ് പോകുന്നത് എന്നൊക്കെ. എനിക്ക് അവൻ പറഞ്ഞതുപോലെ അവൻ കുഞ്ഞായിരിക്കുമ്പോൾ ഷൂട്ടിനൊക്കെ പോകുമ്പോൾ അവനെ നന്നായിട്ട് മിസ് ചെയ്യും. ഇപ്പോഴങ്ങിനെ അല്ല, അവൻ വളർന്നു വലിയ കുട്ടിയായി. ഇപ്പോൾ അവൻ അവന്റെ ഫ്രണ്ട്സിന്റെ കൂടെ ട്രിപ്പൊക്കെ പോകുമ്പോഴാണ് ഞാൻ എപ്പൊഴാടാ വീട്ടിലേക്ക് വരുന്നത് എന്ന് ചോദിച്ചു മിസ് ചെയ്തു വിളിക്കുന്നത്.

പരീക്ഷയെന്നൊക്കെ കേൾക്കുമ്പോൾ ഒരാഴ്ച മുൻപ് തന്നെ നമുക്ക് ഉറക്കവും ഊണും ഒന്നും ഉണ്ടാകില്ല. പക്ഷെ ഇവന് പരീക്ഷ ഉണ്ടെങ്കിലും ഇല്ലെങ്കിലും എല്ലാം ഒരുപോലെ ആണെന്ന് തോന്നിയിട്ടുണ്ട്. ആ ശീലം ഇവനിൽ നിന്നും കണ്ടു പഠിക്കാൻ പറ്റുന്നത് ആണോന്നു അറിയില്ല.
അവനു എന്തെങ്കിലും സങ്കടം വരുമ്പോൾ എന്നെ വന്നു കെട്ടിപ്പിടിച്ചു ഉമ്മയൊക്കെ വാങ്ങിയാൽ അവൻ ഓക്കേ ആവും എന്നൊക്കെ അവൻ പറഞ്ഞില്ലേ, അതിന്റെ മറുപുറം എന്താണെന്ന് അറിയാമോ? അവനും ഞാനും കൂടി റെസ്ലിങ് നടത്തും, എന്നിട്ട് അവൻ ഒരു സൈഡിലും ഞാൻ മറ്റേ സൈഡിലും വീണു കിടക്കും. അപ്പോഴാണ് ഓടി വന്നു കെട്ടിപിടിച്ച് ഉമ്മ വച്ചിട്ട് ഓടുന്നത്. " - രമ്യ കൃഷ്ണൻ മറുപടിയായി പറയുന്നു.