മലയാള സിനിമയെ തകര്‍ക്കാന്‍ ശ്രമിച്ചിട്ടില്ലെന്ന് രമ്യ നമ്പീശന്‍

കൊച്ചി: താൻ മലയാള സിനിമയെ തകര്‍ക്കാന്‍ ശ്രമിച്ചിട്ടില്ലെന്ന് രമ്യ നമ്പീശന്‍. ഡബ്ല്യൂ.സി.സിയും അതിനായി ശ്രമിച്ചിട്ടില്ലെന്നും താൻ സംസാരിച്ചത് തുല്യതയ്ക്കു വേണ്ടിയാണെന്നും രമ്യ വ്യക്തമാക്കി. മലയാള സിനിമയിൽ നിലവിലുള്ള പ്രശ്നങ്ങള്‍ പരിഹരിക്കാനുള്ള ചര്‍ച്ച ഉടന്‍ ഉണ്ടാകുമെന്നും മലയാള സിനിമയിലെ എല്ലാ സ്ത്രീകള്‍ക്കും വേണ്ടിയാണ് തങ്ങള്‍ ശബ്ദമുയര്‍ത്തിയതെന്നും അവര്‍ ചൂണ്ടിക്കാട്ടി. വാര്‍ത്താ സമ്മേളനത്തിൽ മോഹന്‍ലാല്‍ പറഞ്ഞ കാര്യങ്ങള്‍ക്ക് ഡബ്ല്യൂ.സി.സി കൃത്യമായ മറുപടി നല്‍കിയിട്ടുണ്ടെന്നും രമ്യ പറഞ്ഞു.

കൊച്ചിയില്‍ നടി ആക്രമിക്കപ്പെട്ട വിഷയത്തില്‍ തുടക്കം മുതല്‍ രമ്യ അടക്കമുള്ള നടിമാരുടെ സംഘം പരസ്യമായി ശക്തമായ അഭിപ്രായം രേഖപ്പെടുത്തിയിരുന്നു. ഇത് താരസംഘടനയായ എ.എം.എം.എയെ തകര്‍ക്കാനാണ് എന്ന ആരോപണം ഉയര്‍ന്നിരുന്നു. റിമ കല്ലിങ്കലും രമ്യയും ഗീതു മോഹൻദാസും അടക്കമുള്ള നാലു നടിമാര്‍ മലയാള താരസംഘടനയായ എ.എം.എം.എയില്‍ നിന്നു രാജിവച്ചത് ഏറെ ചര്‍ച്ചയായിരുന്നു.