വിവാദമായി റോസിൻ ജോളിയുടെ'മീ ടൂ'; കുറിപ്പ് 'മുക്കി' നടി

സ്ത്രീകൾക്കെതിരെയുള്ള ലൈംഗികാതിക്രമങ്ങൾ തുറന്ന് പറയുന്ന സോഷ്യൽ മീഡിയ ക്യാംപെയിനായ'#മീ ടൂ' തരംഗമായിരിക്കുകയാണ്. അതിനിടെയാണ് മലയാളി നടിയും അവതാരികയുമായ റോസിൻ ജോളി ഇതേ ഹാഷ്ടാഗുമായി സോഷ്യൽ മീഡിയയിൽ ഒരു കുറിപ്പ് പങ്കുവെച്ചത്. എന്നാൽ ലൈംഗികാതിക്രമത്തിന് മാത്രമല്ല രസകരമായ മറ്റൊരു ക്യാംപെയിനിന് ഇതേ ഹാഷ്ടാഗ് ഉപയോഗിക്കണമെന്ന നിര്‍ദ്ദേശവുമായാണ് റോസിൻ ജോളി എത്തിയത്.

'മീ ടൂ' ക്യാമ്പയിന്‍ പണം കടം വാങ്ങിയിട്ട് തിരിച്ച് തരാം എന്ന ഉറപ്പ് പാലിക്കാന്‍ പറ്റാത്തവര്‍ക്കെതിരെയും പ്രയോഗിക്കണമെന്ന് നടി ആവശ്യപ്പെട്ടിരുന്നു. തൻ്റെ ഫേസ്ബുക്ക് കുറിപ്പിലൂടെയാണ് താരം ഇക്കാര്യം ആവശ്യപ്പെട്ടത്. കടം വാങ്ങിയിട്ട് തിരികെ നൽകാത്തവര്‍ക്ക് ഇതൊരു മുന്നറിയിപ്പാണെന്നും താരം കുറിച്ചിരുന്നു.

എന്നാൽ ലൈംഗിക പീഡനങ്ങള്‍ തുറന്ന് പറയാന്‍ ആരംഭിച്ച ധീരമായ ക്യാമ്പയിനിനെ റോസിൻ തരം താഴ്ത്തുന്നെന്ന് ചൂണ്ടിക്കാട്ടി പലരും രംഗത്തെത്തി. നടിക്കെതിരെ രൂക്ഷമായ വിമര്‍ശനങ്ങളാണിപ്പോൾ പലയിടത്തു നിന്നും ഉയരുന്നത്.

തൻ്റെ ''മീ ടൂ' പോസ്റ്റ്' വിവാദമായതോടെ ഇതിനോടകം റോസിൻ തൻ്റെ ഫേസ്ബുക്ക് കുറിപ്പ് ഡിലീറ്റ് ചെയ്തു.

റോസിൻ കുറിച്ചത് ഇങ്ങനെ

തിരിച്ച് തരാമെന്ന ഉറപ്പിന്മേൽ പണം കടം നൽകിയിട്ടും ഇനിയും അത് തിരിച്ച് നൽകാത്തവര്‍ക്കെതിരെയും മീടു ക്യാംപെയിൻ തുടങ്ങിയിരുന്നെങ്കിൽ നന്നായിരുന്നു.

നോട്ട്: എല്ലാവരും ഇപ്പോൾ സെറ്റിൽഡ് ആണ്, സമയം തരാൻ തയ്യാറാണ്. നിങ്ങൾക്ക് എൻ്റെ അക്കൗണ്ടിലേയ്ക്ക് പണം അയച്ചു തുടങ്ങാം.അല്ലെങ്കിൽ കൂടുതൽ വിവരങ്ങൾക്കായി എന്നെ വിളിക്കാം. അല്ലെങ്കിൽ ഇനിയുള്ള ദിവസങ്ങളിൽ ഓരോരുത്തരുടെ പേരായി പുറത്തുവിടുന്നതാണ്.