'രണ്ടാഴ്ചത്തെ പരിശീലനം, മടങ്ങിയത് സന്തോഷത്തോടെ'; ചിമ്പുവിനെ ഭരതനാട്യം പഠിപ്പിച്ചതിനെ കുറിച്ച് ശരണ്യ

ഇപ്പോഴിതാ ചിമ്പുവിനെ ഭരതനാട്യം പഠിപ്പിച്ചതിനെ കുറിച്ച് ശരണ്യ മനസ് തുറക്കുകയാണ്. വനിതയ്ക്ക് നല്‍കിയ അഭിമുഖത്തിലായിരുന്നു ശരണ്യ മനസ് തുറന്നത്. എന്നാല്‍ താന്‍ ചിമ്പുവിനെ ഭരതനാട്യം പഠിപ്പിക്കുക മാത്രമാണ് ചെയ്തത്. അതില്‍ കൂടുതലൊന്നും തനിക്ക് അറിയില്ലെന്നും ശരണ്യ പറയുന്നു.

എന്തിന് വേണ്ടിയാണെന്നോ മറ്റോ കൂടുതല്‍ വിവരങ്ങള്‍ പങ്കുവെക്കാനാകില്ല. സത്യത്തില്‍ കൂടുതല്‍ എനിക്കറിയില്ല. ചിമ്പുവിന്റെ അടുത്ത സുഹൃത്താണ് ഈ ആവശ്യവുമായി ബന്ധപ്പെട്ടത്. ആദ്യം മറ്റൊരാളെ ഞാന്‍ നിര്‍ദ്ദേശിച്ചിരുന്നു. എന്നാല്‍ കൊറോണയായതിനാല്‍ അവരിലേക്ക് എത്താന്‍ സാധിച്ചില്ല. അങ്ങനെയാണ് താന്‍ പഠിപ്പിക്കാമെന്ന് പറയുന്നതെന്ന് ശരണ്യ വെളിപ്പെടുത്തി.

ഭരതനാട്യമായിരുന്നു ചിമ്പുവിനെ പഠിപ്പിച്ചത്. അതിനായി അദ്ദേഹം തിരുവനന്തപുരത്തേക്ക് വരികയായിരുന്നു. പരിശീലനം രണ്ടാഴ്ചയോളം ഉണ്ടായിരുന്നു. ആവശ്യമുള്ള കാര്യങ്ങള്‍ അദ്ദേഹം പഠിച്ചെടുക്കുകയായിരുന്നു. നല്ല നര്‍ത്തകനായതിനാല്‍ പരിശീലനം എളുപ്പമായിരുന്നുവെന്നും ശരണ്യ പറയുന്നു. ഒരു ചുവട് കാണിച്ചു കൊടുത്താല്‍ അത് ശരിയാകുന്നത് വരെ പരിശീലിക്കുമെന്നും താരം പറഞ്ഞു.

ഒസ്തിയില്‍ ഒരുമിച്ച് അഭിനയിച്ചിട്ടുണ്ടെങ്കിലും അടുത്ത സുഹൃത്തുക്കളായിരുന്നില്ല താനും ചിമ്പുവുമെന്നും ശരണ്യ ഓര്‍ക്കുന്നു. അര്‍പ്പണ ബോധമുള്ള വ്യക്തിയാണ് ചിമ്പുവെന്നും നന്നായി കാര്യങ്ങള്‍ മനസിലാക്കുകയും പരിശീലിക്കുകയും ചെയ്യുമെന്നും ശരണ്യ പറയുന്നു. പക്കാ പ്രൊഫഷണലാണ്. അതിന്റെ കംഫര്‍ട്ട് ഉണ്ടെന്നും സന്തോഷത്തോടെയാണ് അദ്ദേഹം മടങ്ങിയതെന്നും ശരണ്യ കൂട്ടിച്ചേര്‍ത്തു.