ഞാന്‍ ആശുപത്രിയിലല്ല! എനിക്ക് യാതൊരു കുഴപ്പവുമില്ലെന്ന് ശ്രുതി ഹാസന്‍! വൈറല്‍ പോസ്റ്റിന് പിന്നാലെയായി വിശദീകരണവുമായി താരപുത്രി

കമല്‍ഹാസന്റെ മൂത്തപുത്രി ശ്രുതി ഹാസന്‍ സോഷ്യല്‍മീഡിയയില്‍ സജീവമാണ്. നൃത്തവും മോഡലിംഗും പാട്ടും അഭിനയവുമൊക്കെയായി സജീവമാണ് ശ്രുതി. ശ്രുതി മാത്രമല്ല സഹോദരി അക്ഷര ഹാസനും പ്രേക്ഷകര്‍ക്ക് പരിചിതയാണ്. പഠനം പൂര്‍ത്തിയാക്കിയതിന് പിന്നാലെയായാണ് ശ്രുതി ഹാസന്‍ സിനിമയില്‍ തുടക്കം കുറിച്ചത്. തേവര്‍മകനെന്ന ചിത്രത്തില്‍ പാട്ടുപാടിക്കൊണ്ടായിരുന്നു ശ്രുതിയുടെ വരവ്. കരിയറിലെ മാത്രമല്ല ജീവിതത്തിലെ കാര്യങ്ങളെക്കുറിച്ചും താരപുത്രി തുറന്നുപറയാറുണ്ട്. നേരത്തെ മദ്യപാന ശീലമുണ്ടായിരുന്നുവെന്നും പിന്നീട് അത് മാറ്റുകയായിരുന്നുവെന്നും ശ്രുതി പറഞ്ഞിരുന്നു. ഇതൊന്നും മറച്ചുവെക്കേണ്ട കാര്യമായി തോന്നുന്നില്ലെന്നും ഇപ്പോള്‍ തനിക്ക് മദ്യത്തോട് ആസക്തിയില്ലെന്നുമായിരുന്നു ശ്രുതി പറഞ്ഞത്.
തന്റെ പ്രണയത്തെക്കുറിച്ചും ബ്രേക്കപ്പിനെക്കുറിച്ചും ആ അവസ്ഥയെ അതിജീവിച്ചതിനെക്കുറിച്ചുമെല്ലാം ശ്രുതി തുറന്നുപറഞ്ഞിരുന്നു. പിസിഒസുമായുള്ള പോരാട്ടത്തിലാണ് താനെന്ന് വ്യക്തമാക്കിയായിരുന്നു കഴിഞ്ഞ ദിവസം ശ്രുതി എത്തിയത്. താന്‍ ആശുപത്രിയിലല്ലെന്നും താരം വിശദീകരിച്ചിരുന്നു. ഏത് ആശുപത്രിയിലാണ്, ഇപ്പോള്‍ എങ്ങനെയുണ്ട്, പെട്ടെന്ന് സുഖം പ്രാപിക്കട്ടെ തുടങ്ങി നിരവധി മെസ്സേജുകളാണ് തനിക്ക് വന്നിട്ടുള്ളതെന്നും താരം പറഞ്ഞിരുന്നു.
ഹോര്‍മോണ്‍ പ്രശ്‌നങ്ങളുണ്ട്. എന്‍ടോമെട്രിയോസിസുമായി ബന്ധപ്പെട്ടുള്ള വിഷമതകളും അനുഭവിക്കുന്നുണ്ട്. വര്‍ക്കൗട്ടും ഭക്ഷണനിയന്ത്രണവും തുടരുകയാണ്. ഈ കാര്യത്തെക്കുറിച്ച് അറിഞ്ഞത് മുതല്‍ സ്വഭാവികമായൊരു കാര്യമായാണ് ഞാന്‍ ഇതിനെ കരുതിയത്. ഫിറ്റ്‌നസ് നിലനിര്‍ത്തി സന്തോഷത്തോടെ മുന്നോട്ട് പോവാനാണ് തീരുമാനം. ഈ ചാലഞ്ച് ഞാന്‍ ഏറ്റെടുത്തുവെന്നുമായിരുന്നു താരം കുറിച്ചത്.
അടുത്തിടെയായിരുന്നു ശ്രുതിയും ശന്തനു ഹന്‍സാരികയും പ്രണയത്തിലാണെന്നുള്ള വിവരങ്ങള്‍ പുറത്തുവന്നത്. ഇല്ലസ്‌ട്രേറ്ററും ഡൂഡില്‍ ആര്‍ടിസ്റ്റുമാണ് ശന്തനു. ഇരുവരും ഒന്നിച്ചുള്ള ചിത്രങ്ങളും വീഡിയോയുമെല്ലാം വൈറലായിരുന്നു. മൈക്കിള്‍ കോര്‍സലെയുമായുള്ള ശ്രുതിയുടെ പ്രണയവും വാര്‍ത്തകളില്‍ നിറഞ്ഞുനിന്നിരുന്നു. നാല് വര്‍ഷത്തോളമായുള്ള പ്രണയം വിവാഹത്തിലെത്തുമെന്നായിരുന്നു എല്ലാവരും കരുതിയത്. എന്നാല്‍ ഇടയ്ക്ക് വെച്ച് ഇരുവരും വേര്‍പിരിയുകയായിരുന്നു. മാനസികമായി തന്നെ വല്ലാതെ തളര്‍ത്തിയ കാര്യമായിരുന്നു ആ പ്രണയമെന്നും താരം പറഞ്ഞിരുന്നു.