അജിത്തിന്റെ ഭാര്യ മാത്രമല്ല അച്ഛനും മലയാളിയാണ്, അമ്മ ബംഗാളി; കുടുംബ കാര്യങ്ങള്‍ അജിത്ത് പരസ്യമാക്കാത്തതിന് കാരണം?

സ്വകാര്യ ജീവിതം വളരെ സ്വകാര്യമായി തന്നെ വയ്ക്കുന്ന നടനാണ് അജിത്ത് കുമാര്‍. കഴിഞ്ഞ ദിവസമാണ് അജിത്തിന്റെ അച്ഛന്‍ പി സുബ്രഹ്‌മണ്യം മരണപ്പെട്ടു എന്ന വാര്‍ത്ത പുറത്ത് വന്നത്. 84 വയസ്സ് ആയിരുന്നു. വാര്‍ധക്യ സഹജമായ അസുഖങ്ങളെ തുടര്‍ന്ന് ചികിത്സയിലായിരുന്നു. ചെന്നൈയിലെ സ്വകാര്യ ആശുപത്രിയിലാണ് മരണം സംഭവിച്ചത്.

പൊതുവെ ഒരു സൂപ്പര്‍താരത്തിന്റെ അച്ഛന്‍ മരണപ്പെട്ടു എന്ന വിവരം പുറത്ത് വന്നാല്‍ അത് മാധ്യമങ്ങള്‍ ഏറ്റെടുക്കുന്ന കാഴ്ചയാണ് കാണാറുള്ളത്. എന്നാല്‍ അജിത്തിന്റെ കുടുംബകാര്യം ഒരിക്കലും ലൈംലൈറ്റിലേക്ക് കൊണ്ടുവരാറില്ല. അജിത്തിന്റെ അച്ഛന്റെയും അമ്മയുടെയും ഫോട്ടോസ് പുറത്ത് വന്നത് പോലും വളരെ അപൂര്‍വ്വമായിട്ട് ആണ്. അജിത്തിന്റെ പേഴ്‌സണല്‍ ജീവിതത്തെ കുറിച്ചുള്ള കാര്യങ്ങള്‍ അദ്ദേഹത്തിന്റെ കടുത്ത ആരാധകര്‍ക്ക് പോലും അറിയില്ല.

അച്ഛന്‍ സുബ്രഹ്‌മണ്യം മലയാളിയാണ്, പാലക്കാട് സ്വദേശിയാണ്. അമ്മ മോഹിനി ബംഗാളിയാണ്. കേരളക്കരയുമായി അജിത്തിന് ബന്ധം വന്നത് ഭാര്യ ശാലിനിയിലൂടെ മാത്രമല്ല, പാതി മലയാളി തന്നെയാണ് അജിത്ത്. പൂര്‍ണമായും ഒരു തമിഴനുമല്ല. പഠിച്ചതും വളര്‍ന്നതും തമിഴ്‌നാട്ടിലാണ്, അഭിനയിച്ച സിനിമകള്‍ തമിഴിലായത് കൊണ്ട് മാത്രം തമിഴകത്തിന് സ്വന്തമായതാണ് അജിത്ത്. രണ്ട് സഹോദരങ്ങളാണ് അജിത്തിന്, അനൂപ് കുമാറും അനില്‍ കുമാറും.

സിനിമ അഭിനയം എന്റെ തൊഴിലാണ്. മറ്റ് ജോലികള്‍ ചെയ്യുന്നത് പോലെ അതും ഞാന്‍ ചെയ്യുന്നു. അതിന് എനിക്ക് പ്രത്യേക പരിഗണനകള്‍ ആവശ്യമില്ല എന്ന പക്ഷക്കാരനാണ് അജിത്ത്. അതുകൊണ്ട് തന്നെ സിനിമാ പ്രമോഷനുകളില്‍ പങ്കെടുക്കുകയോ അതിന്റെ ഭാഗമായി അഭിമുഖങ്ങള്‍ നല്‍കുകയോ ചെയ്യാറില്ല. ഒരു അവാര്‍ഡ് നിശയിലും അജിത്ത് പങ്കെടുക്കുകയും ഇല്ല. തന്റെ കുടുംബ കാര്യങ്ങള്‍ അതുകൊണ്ട് തന്നെ പരസ്യപ്പെടുത്തേണ്ടതില്ല എന്നതാണ് അജിത്തിന്റെ തിയറി.