16 വര്‍ഷങ്ങള്‍ക്ക് ശേഷം ഞങ്ങള്‍ വീണ്ടും കണ്ടുമുട്ടി, അവളുടെ സൗന്ദര്യത്തിന് ഒരു മാറ്റവുമില്ലെന്ന് അജ്മല്‍; പ്രിയ രാമനൊപ്പമുള്ള ചിത്രം വൈറലാവുന്നു

കേരളക്കരയില്‍ പ്രണയിക്കുന്നവരുടെ ദേശീയഗാനം പോലെയായിരുന്നു പ്രണയകാലം എന്ന സിനിമയിലെ 'ഒരു വേനല്‍ പുഴയില്‍ തെളിനീരില്‍...' എന്ന് തുടങ്ങുന്ന പാട്ട്. സിനിമ അത്രയും ഹിറ്റായില്ലെങ്കിലും ആ പാട്ട് ഇന്നും നെഞ്ചേറ്റിയവരാണ് മലയാളികള്‍. പാട്ടിന്റെ രംഗത്ത് എത്തുന്ന അജ്മലിനെയും പ്രിയാ രാമനെയും അങ്ങനെ ആരാധിക്കാന്‍ തുടങ്ങിയവരും ഒരുപാടാണ്.

പ്രണയകാലം എന്ന സിനിമയുടെ അവസാനം ജീവിതത്തില്‍ അവര്‍ക്ക് ഒന്നിക്കാന്‍ കഴിയുന്നുണ്ടായിരന്നില്ല. മരണത്തിലൂടെ രണ്ടുപേരും ഒന്നിയ്ക്കുന്നിടത്തുവച്ചാണ് സിനിമ അവസാനിക്കുന്നത്. ഇപ്പോഴിതാ പതിനാറ് വര്‍ഷത്തെ ഇടവേളയ്ക്ക് ശേഷം ഈ ജോഡികള്‍ വീണ്ടും കണ്ടുമുട്ടിയിരിക്കുന്നു. തീര്‍ത്തും അവിചാരിതമായി കണ്ടുമുട്ടിയ ആ കൂടിച്ചേരലിനെ കുറിച്ച് അജ്മല്‍ പങ്കുവച്ച പോസ്റ്റ് വൈറലാവുന്നു.

'ഒന്നര പതിറ്റാണ്ടിലേറെയായി എനിക്ക് കാണാന്‍ അവസരം ലഭിക്കാത്ത ഒരാളുമായുള്ള വഴികള്‍ കടന്നുപോകുന്ന ഒരു അവിചാരിത കൂടിക്കാഴ്ചയായിരുന്നു അത്. അവളുടെ സ്ഥായിയായ കൃപയും സൗന്ദര്യവും എന്നത്തേയും പോലെ ആകര്‍ഷകമായി തന്നെയുണ്ട്. ഞങ്ങളുടെ എല്ലാ ആരാധകര്‍ക്കും അഭ്യുദയകാംക്ഷികള്‍ക്കും 'ഒരു വേനല്‍ പുഴയില്‍' എന്ന പാട്ടിന്റെ ആരാധകര്‍കര്‍ക്കും അഭിനന്ദന സൂചകമായി ഈ ഫോട്ടോ പങ്കുവെക്കുന്നതില്‍ എനിക്ക് ഒരുപാട് സന്തോഷമുണ്ട്.' അജ്മല്‍ എഴുതി.


പ്രിയാ രാമനൊപ്പമുള്ള ഒരു സെല്‍ഫി ചിത്രത്തിനൊപ്പമാണ് പോസ്റ്റ്. അതിന് താഴെ പ്രിയയുടെ കമന്റുമുണ്ട്. 'ഒരുപാട് നാളുകള്‍ക്ക് ശേഷം താങ്കളെ കണ്ടതില്‍ എനിക്കും ഒരുപാട് സന്തോഷമുണ്ടെ'ന്നാണ് പ്രിയയുടെ കമന്റ്. ഇപ്പോഴും മരിയയെയും രഞ്ജിത്തിനെയും (പ്രണയകാലത്തിലെ പ്രിയയുടെയും അജ്മലിന്റെയയും കഥാപാത്ര) ഇഷ്ടപ്പെടുന്നവരുടെ കമന്റുകളാണ് കൂടുതലും വരുന്നത്.