ഏവരും കണ്ണ് വയ്ക്കും; അല്ലുവിന്‍റെ പെട്ടി വീട്

മലയാളത്തിലേക്ക് മൊഴിമാറ്റിയെത്തിയ തെലുഗു ചിത്രങ്ങളിലൂടെയാണ് അല്ലു അർജുൻ കേരളത്തിൽ താരമായത്. എന്നാലിപ്പോള്‍ അതൊന്നുമല്ല പറ‍ഞ്ഞുവരുന്നത്. താരത്തിന്‍റെ ഹൈദരാബാദിലെ വീട് ഏവരുടേയും മനം കവരുകയാണ്. ബോക്സ് രൂപത്തിലാണ് മിനിമലിസ്റ്റിക് ശൈലിയിൽ വീട് നിർമിച്ചിരിക്കുന്നത്. 8000 ചതുരശ്രയടിയാണ് വിസ്തീർണം. കടുംനിറങ്ങൾ ഒന്നും നൽകാതെ ഒരു സിമ്പിള്‍ ലുക്ക് വീട്. ആമിർ, ഹമീദ ഡിസൈനേഴ്സ് ആണ് വീട് രൂപകൽപന ചെയ്തിരിക്കുന്നത്. ഭാര്യ സ്നേഹയാണ് വീടിന്റെ ഇന്റീരിയർ സ്‌പെഷലിസ്റ്റ്.

വീടിന്റെ ഒരുവശത്തെ ലിവിങ് റൂം മുതൽ മറുവശത്തെ സ്വിമ്മിങ് പൂൾ വരെ നീണ്ട ഇടനാഴിയാണ്. ലിവിങ്, ഡൈനിങ്, അടുക്കള എന്നിവയെല്ലാം ഓപ്പൺ ശൈലിയിൽ ഒരുക്കി. ഗ്ലാസ് ജനാലകളാണ് വീട്ടിൽ എല്ലായിടവും. കാറ്റും വെളിച്ചവും ഒഴുകി നടക്കുന്ന അകത്തളങ്ങൾ. ഗ്ലാസ് ടോപ് നൽകിയ നീളൻ ഊണുമേശ. ഡൈനിങ്ങിൽ നിന്നും പുറത്തെ പാഷ്യോ സ്‌പേസിലേക്കിറങ്ങിയാൽ മനോഹരമായ സ്വിമ്മിങ് പൂൾ. ഇവിടെ വുഡൻ ഡെക്കും പുൽത്തകിടിയും സീറ്റിങ്ങുമൊക്കെ നൽകിയിട്ടുണ്ട്. ഒരു കിടപ്പുമുറി മാത്രമാണ് ഗസ്റ്റ് ഹൗസിലുള്ളത്. പ്രകൃതിയെ അകത്തേക്ക് ആനയിക്കുന്ന ബാത്റൂം. മുകളിൽ സ്‌കൈലൈറ്റും അകത്ത് ചെടികളും നൽകിയിട്ടുണ്ട്.