ഇനി ഞങ്ങളെ സംശയിക്കരുത്! ആരേയും വെറുപ്പിക്കാനല്ല ഇത് ചെയ്തത്! ​ഗോൾഡിനെ വിമർശിക്കുന്നവർക്ക് സംവിധായകന്റെ മറുപടി

പ്രഖ്യാപനം മുതല്‍ത്തന്നെ വാര്‍ത്തകളില്‍ ഇടം നേടിയ ചിത്രമാണ് ഗോള്‍ഡ്. വര്‍ഷങ്ങളുടെ ഇടവേള അവസാനിപ്പിച്ച് അല്‍ഫോണ്‍സ് പുത്രന്‍ സിനിമയുമായി എത്തുന്നുവെന്നറിഞ്ഞപ്പോള്‍ എല്ലാവരും ആകാംക്ഷയിലായിരുന്നു. ആരേയും ബുദ്ധിമുട്ടിക്കാനായല്ല താന്‍ ഈ സിനിമ ചെയ്തതെന്ന് അദ്ദേഹം പറയുന്നു. സിനിമയെക്കുറിച്ച് നെഗറ്റീവ് പറയുന്നവര്‍ക്ക് മറുപടിയുമായെത്തിയിരിക്കുകയാണ് അദ്ദേഹം. ഫേസ്ബുക്ക് കുറിപ്പിലൂടെയായാണ് അല്‍ഫോണ്‍സ് തന്റെ നിലപാട് വ്യക്തമാക്കിയത്.
ഗോൾഡിനെക്കുറിച്ചൊള്ള നെഗറ്റീവ് റിവ്യൂസ് എല്ലാരും കാണണം. കൊറേ കുശുമ്പും, പുച്ഛവും, തേപ്പും എല്ലാം എന്നെ കുറിച്ചും എന്റെ സിനിമയെ കുറിച്ച് കേൾക്കാം. അത് കേൾക്കുമ്പോൾ കിട്ടുന്ന ഒരു സുഖം ഉണ്ടല്ലോ. എന്റെ പ്രത്യേക നന്ദി നെഗറ്റീവ് റിവ്യൂസ് എഴുതുന്നവർക്ക്. ചായ കൊള്ളൂല്ല എന്ന് പെട്ടെന്ന് പറയാം. കടുപ്പം കൂടിയോ കുറഞ്ഞോ ? വെള്ളം കൂടിയോ കുറഞ്ഞോ? പാല് കൂടിയോ കുറഞ്ഞോ? പാല് കേടായോ, കരിഞ്ഞോ? മധുരം കൂടി, മധുരം കുറഞ്ഞു. എന്ന് പറഞ്ഞാൽ ചായ ഇണ്ടാക്കുന്ന ആൾക്ക് അടുത്ത ചായ ഇണ്ടാക്കുമ്പോൾ ഉപകരിക്കും. അയ്യേ ഊള ചായ, വൃത്തിക്കെട്ട ചായ, വായേല് വെക്കാൻ കൊള്ളാത്ത ചായ എന്ന് പറഞ്ഞാൽ നിങ്ങളുടെ ഈഗോ വിജയിക്കും.
ഇതുകൊണ്ടു രണ്ടു പേർക്കും ഉപയോഗം ഇല്ല. നേരം 2, പ്രേമം 2 എന്നല്ല ഞാൻ ഈ സിനിമയ്ക്കു പേരിട്ടത്. ഗോൾഡ് എന്നാണു. ഞാനും, ഈ സിനിമയിൽ പ്രവർത്തിച്ച ആരും നിങ്ങളെ വെറുപ്പിക്കാനോ, ഉപദ്രവിക്കാനോ, നിങ്ങളുടെ വിലപ്പെട്ട സമയം കളയണോ ചെയ്തതല്ല ഈ സിനിമ. ഇനിയും എന്നെയും എന്റെ ടീമിനെയും സംശയിക്കരുത്. ഗോൾഡ് അങ്ങനെ എടുക്കാമായിരുന്നു. ഇങ്ങനെ എടുക്കാമായിരുന്നു എന്ന് പറയരുത് . കാരണം ഞാനും ഗോൾഡ് എന്ന സിനിമ ആദ്യമായിട്ടാണ് എടുക്കുന്നത്. നേരത്തെ ഗോൾഡ് ചെയ്തു ശീലം ഉണ്ടെങ്കിൽ നിങ്ങൾ പറയുന്നത് ശെരിയാണ്, എന്ന് നിങ്ങളുടെ സ്വന്തം അൽഫോൻസ് പുത്രൻ എന്നായിരുന്നു കുറിപ്പ്.
കാശ് കൊടുത്തു വാങ്ങിയ ചായ വായിൽ വയ്ക്കാൻ കൊള്ളില്ല എങ്കിൽ എന്ത് ചെയ്യണം? മിണ്ടാതെ ഉരിയാടാതെ കാശും കൊടുത്ത് പോകണം എന്നാണോ ? അതും നന്നായി ചായ ഉണ്ടാക്കുന്ന ആളുടെ സ്പെഷ്യൽ ചായ കാലങ്ങൾക്ക് ശേഷം കിട്ടുന്നു എന്ന് കേട്ട് കുടിക്കാൻ പോകുമ്പോൾ. പോട്ടെ ഒരു മറുപടി തരാമോ ? നയൻതാരയെ എന്ത് പറഞ്ഞ് ആണ് കൺവിൻസ് ചെയ്തത് എന്നായിരുന്നു ഒരാൾ ചോദിച്ചത്. ഈ ചായ ഉണ്ടാക്കിയത് ഞാൻ അല്ലെ. നിങ്ങൾക്കു എന്നോട് പറയാൻ പാടില്ലേ ? അത് മൈക്ക് വെച്ച് വിളിച്ചു പറയണോ എന്നുള്ളത് നിങ്ങളുടെ വ്യക്തി സ്വാതന്ത്ര്യം എന്നായിരുന്നു മറുപടി. നയൻതാര അവതരിപ്പിക്കുന്ന സുമംഗലി എന്ന കഥാപാത്രത്തിന്റെ പ്രാധാന്യം, ജോഷിയുടെ ഷോപ്പ് ഇരിക്കുന്ന സുമംഗലി ഷോപ്പിങ് കോംപ്ലെക്സിന്റെ ഓണർ ആരാണ്? ജോഷിയുടെ വീട്ടിൽ ആർക്കു വേണ്ടി ആര് കൊടുത്ത സ്വർണ്ണം ആണ് ബ്രോ ? അതാണ് പ്രാധാന്യമെന്നും അൽഫോൺസ് പറഞ്ഞിരുന്നു. അത് മനസിലായി, എങ്കിലും നയൻതാരയെ പോലൊരു താരത്തെ കൻവിൻസ് ചെയ്യിച്ച കഥ എന്തായിരുന്നു എന്ന് ചോദിച്ചത് ആണ്. ശരിക്കും തീയറ്ററിൽ ഞങ്ങള് കണ്ടത് തന്നെ ആയിരുന്നോ താങ്കളുടെ കഥ ? എന്തെങ്കിലും സമ്മർദ്ദം കൊണ്ടോ സാഹചര്യം കൊണ്ടോ കഥ മാറിയോ എന്ന ആകാംക്ഷ കൊണ്ടാണ് ചോദിച്ചത്. മറുപടിക്ക് നന്ദിയെന്നായിരുന്നു കമന്റ് ചെയ്തയാൾ പറഞ്ഞത്.