ഇദ്ദേഹം എനിക്ക് ദൈവം ആണോ എന്ന് ചോദിച്ചാൽ അല്ല, ദൈവീകമാണ്; പടച്ചോന്റെ പ്രകാശത്തിന്റെ അംശമുള്ളയാൾ. മമ്മൂട്ടിയെ കുറിച്ച് അമീന!

സിനിമ മേഖലയിലും അല്ലാതെയും ആരോടെങ്കിലും സ്ഥായിയായ സ്നേഹവും, ആരാധനയും, ഇഷ്ടവും തോന്നിയിട്ടുണ്ടോ എന്ന് ചോദിച്ചാൽ ഒരേയൊരു ഉത്തരമേയുള്ളു ഈ മനുഷ്യൻ!നാലാം വയസ്സിൽ തുടങ്ങിയതാണ് അത്. ഒറ്റ ദിവസം കൊണ്ടോ, ഒറ്റ സിനിമ കൊണ്ടോ ഉണ്ടായതല്ല, കാലങ്ങളായി പരുവപ്പെട്ടതാണ്.

ഒരു കോട്ടവും തട്ടാതെ, അണുവിട കുറയാതെ ഈ മുപ്പതാം വയസ്സിലും ഉള്ളിലുണ്ടത്. മാധ്യമജീവിതം ഏഴാം വർഷത്തിലൂടെ കടന്നു പോകുന്നു. പണിയെടുത്ത ചാനലുകളുടെ ഡാറ്റാബേസിൽ കിട്ടാത്ത പ്രമുഖരുടെ നമ്പരുകൾ ഒന്നും തന്നെയില്ല. ഒരിക്കൽ പോലും സ്വകാര്യ ഇഷ്ടത്തിന്റെ പേരിൽ മമ്മൂട്ടി എന്ന് ടൈപ്പ് ചെയ്ത് നോക്കിയിട്ടില്ല. കാണാൻ ശ്രമിച്ചിട്ടില്ല.

മമ്മൂക്കായുടെ ജന്മദിനങ്ങൾ വരുമ്പോഴും സിനിമയിൽ അൻപത് വർഷങ്ങൾ തികയുമ്പോഴും ഓരോ തവണയും പുരസ്‌കാരങ്ങൾ തേടി എത്തുമ്പോഴും സോഷ്യൽ മീഡിയ ഫീഡ് നിറയെ സുഹൃത്തുക്കളും പരിചയക്കാരും അദ്ദേഹത്തിനൊപ്പമുള്ള ചിത്രങ്ങൾ പങ്കുവയ്ക്കുന്നത് കാണാറുണ്ട്.

അത്തരത്തിൽ ഒന്ന് എന്റെ കയ്യിൽ ഇല്ലല്ലോ എന്നോർത്ത് ഒരിക്കൽ പോലും സങ്കടം തോന്നിയിട്ടില്ല. അതിലും എത്രയോ അധികമാണ് എന്റെയുള്ളിലെ ഈ മനുഷ്യന്റെ ഫ്രെയിമുകൾ. ഇദ്ദേഹം എനിക്ക് ദൈവം ആണോ എന്ന് ചോദിച്ചാൽ അല്ല, ദൈവീകമാണ്. പടച്ചോന്റെ പ്രകാശത്തിന്റെ അംശമുള്ളയാൾ.

കാണുന്നതിന് അര നിമിഷം മുൻപ് വരെയുള്ള ചങ്കിടിപ്പ് പുറത്ത് കേൾക്കുമോയെന്ന് ഭയന്നു, ഒരു കയ്യകലത്ത് കണ്മുമ്പിൽ കണ്ടപ്പോൾ തൊണ്ടയിൽ എന്തോ കുടുങ്ങി,നെഞ്ച് വിങ്ങി വേദനിച്ചു, കണ്ണ് നിറഞ്ഞൊഴുകി.

പകച്ചു, സ്വയം നിയന്ത്രിക്കാൻ പണിപ്പെട്ടു. കാരണം അറിയാതെ അമ്പരന്നു. എന്റെ 26 കൊല്ലത്തെ സ്നേഹത്തിന്റെ, ആരാധനയുടെ, ഇഷ്ടത്തിന്റെ, വിസ്മയത്തിന്റെ ഒറ്റ പേരാണ് മമ്മൂട്ടി

പ്രിയപ്പെട്ട മമ്മൂക്കാ...നീളെ നിറഞ്ഞൊഴുകുക..നിത്യ വസന്തം തീർക്കുക..അത്രമേൽ സ്നേഹത്തോടെ

എ ഡിവൈൻ ഫാൻ