മമ്മൂട്ടിയുടെ 'മകൾ' ബേബി അനിഖ ഇനി നായിക നിരയിലേക്ക്

ബേബി അനിഖയെ ഏവർക്കും പരിചയം താരങ്ങളുടെ മകളായി അഭിനയിച്ച കുട്ടി എന്ന നിലയ്ക്കായിരിക്കും. ഏറ്റവുമൊടുവിൽ ദ ഗ്രേറ്റ് ഫാദര്‍ എന്ന ചിത്രത്തിൽ മെഗാസ്റ്റാർ മമ്മൂട്ടിയുടെ മകളായിട്ടായിരുന്നു ബേബി അനിഖ വേഷമിട്ടത്. തമിഴിൽ തല അജിത്തിന്‍റെ മകളായും അനിഖ എത്തിയിട്ടുണ്ട്. ഇപ്പോഴിതാ അനിഖയുടെ ചില ചിത്രങ്ങൾ ഫേസ്ബുക്കിൽ വൈറലാവുകയാണ്. മകൾ എന്ന സങ്കല്പത്തിൽ നിന്നും അനിഖ എത്തിയിരിക്കുന്നത് ഇപ്പോൾ നായികമാരുടെ നിരയിലേക്കാണ്.



രാകേഷ് മന്നാര്‍ക്കാട് എന്ന ഫോട്ടോഗ്രാഫര്‍ പകര്‍ത്തിയ ചിത്രങ്ങള്‍ അനിഖ തന്നെയാണ് ഫേസ്ബുക്കിലൂടെ പങ്കുവച്ചിരിക്കുന്നത്. നിമിഷങ്ങൾക്കുള്ളിലാണ് ബേബി അനിഖയുടെ ചിത്രങ്ങൾ ഫേസ്ബുക്കിൽ വൈറലായത്. ഫോട്ടോ വളരെ വ്യത്യസ്തമാണെന്നാണ് ആരാധർ കമന്‍റ് ചെയ്തിരിക്കുന്നത്. അനിഖയുടെ പേരിന് മുന്നിലുള്ള ബേബി എടുത്തുമാറ്റാൻ സമയമായിരിക്കുന്നു എന്നും ചിലർ അഭിപ്രായപ്പെട്ടിട്ടുണ്ട്.



സത്യന്‍ അന്തിക്കാട് സംവിധാനം ചെയ്ത കഥ തുടരുന്നു എന്ന ചിത്രത്തിലൂടെയായിരുന്നു അനിഖ മലയാളത്തിൽ തുടക്കമിട്ടത്. റേസ്, ബാവൂട്ടിയുടെ നാമത്തില്‍ തുടങ്ങിയ ചിത്രങ്ങളിലും ബേബി അനിഖ മികച്ച അഭിനയം കാഴ്ചവെച്ചിരുന്നു. എന്നാൽ അഞ്ച് സുന്ദരികളിലെ അനിഖയുടെ അഭിനയം പ്രേക്ഷകരുടെ മനസലിയിക്കുന്ന ഒന്നായിരുന്നു. ഗൗതം മേനോന്‍ സംവിധാനം ചെയ്ത എന്നൈ അറിന്താല്‍ എന്ന ചിത്രത്തിലൂടെ അജിത്തിന്‍റെ മകളായിട്ടാണ് അനിഖ തമിഴിൽ അരങ്ങേറിയത്. പിന്നീട് ജയംരവിയുടെ സഹോദരിയായി മിരുതനില്‍ വേഷമിട്ടു.



ദ ഗ്രേറ്റ് ഫാദറാണ് അനിഖയുടെ ഏറ്റവുമൊടുവില്‍ ഇറങ്ങിയ ചിത്രം. മമ്മൂട്ടിയുടെ മകളായിട്ടായിരുന്നു അഭിനയിച്ചത്. തന്നെ പോലും അത്ഭുതപ്പെടുത്തുന്ന അഭിനയമായിരുന്നു അനിഖയുടേതെന്ന് മമ്മൂട്ടി ഒരു അഭിമുഖത്തില്‍ വ്യക്തമാക്കുകയുണ്ടായി. ബാല താരങ്ങളായി തുടക്കമിട്ട കാവ്യ, സനുഷ, മഞ്ജിമ തുടങ്ങിവർ നായികമാരായി എത്തിപ്പെട്ട ആ ലിസ്റ്റിലേക്ക് അനിഖയും ചേർക്കപ്പെടുകയാണ്. ബേബി അനിഖയ്ക്ക് ഇനി നിസംശയം നായിക നിരയിലേക്ക് ഉയരാം.





Anikha's latest photos

Anikha's latest photos goes viral on facebook