'മണിയറയിലെ അശോകനി'ൽ നടിമാരുടെ സംസ്ഥാന സമ്മേളനമോ! റിലീസിന് മുന്നേ ചർ‍ച്ചകൾ

അനു സിതാരയും ദുൽഖർ സൽമാനും അതിഥി വേഷത്തിൽ ചിത്രത്തിലെത്തുന്നവെന്നാണ് ട്രെയിലറിന് പിന്നാലെ സോഷ്യൽമീഡിയയിൽ പലരും ചര്‍ച്ചയാക്കിയിരിക്കുന്നത്. അതോടൊപ്പം ചിത്രത്തിലെത്തുന്ന നടിമാരെ കുറിച്ചും ചര്‍ച്ചകള്‍ നടക്കുന്നുണ്ട്. അനുപമ പരമേശ്വരൻ ആണോ യഥാര്‍ത്ഥ നായിക, തേപ്പ് നായിക വേറെയുണ്ടോ, അശോകേട്ടന് ഇത്രയും നായികമാരോ തുടങ്ങിയ ചര്‍ച്ചകളാണ് സജീവമായുള്ളത്.

ഇതെന്താണ് നടിമാരുടെ സംസ്ഥാന സമ്മേളനമോ എന്നാണ് ട്രെയിലറിന് പിന്നാലെ സിനിമാ ഗ്രൂപ്പുകളിലെ ചര്‍ച്ച. ശരിക്കും എത്ര നായികമാരുണ്ട് ചിത്രത്തിൽ, തിരുവോണദിനത്തിലെ സൂര്യോദയത്തിന് മുമ്പ് അണിയറപ്രവർത്തകര്‍ക്ക് ഇക്കാര്യം വ്യക്തമാക്കാമോ, ന്നാലും ഒരു ടൈറ്റിൽ കാർഡ് ക്രെഡിറ്റ് പോലും വെക്കാതെ ഇറക്കിയത് മോശായി പോയി നെറ്റ്ഫ്ലിക്സ് അണ്ണാ തുടങ്ങിയൊക്കെയാണ് സിനിമാ ഗ്രൂപ്പുകളിലെ ചര്‍ച്ചകള്‍.

Also Read: പ്രേക്ഷകർക്ക് ദുൽഖറിന്റെ ഓണസമ്മാനം..! 'മണിയറയിലെ അശോകൻ' തിരുവോണനാളിൽ നെറ്റ്ഫ്ലിക്സിലെത്തും!

അനുപമ പരമേശ്വരൻ, അനു സിത്താര, ഒനിമ കശ്യപ്, ശ്രിത ശിവദാസ്, നയന എൽസ തുടങ്ങിയവരാണ് സിനിമയിലുള്ള നടിമാർ. ഇതിൽ ആരെയാണ് അശോകൻ വിവാഹം ചെയ്യുന്നതെന്നൊരു സസ്പെൻസിലാണ് ട്രെയിലർ അവസാനിപ്പിച്ചിരുന്നത്.

കൊക്കകോള പരസ്യത്തിലെ പെൺകുട്ടിയായി ഇന്ത്യയിലൂടനീളം ശ്രദ്ധ നേടിയ മോഡൽ ഒനിമ കശ്യപ് ആദ്യമായി മലയാളത്തിൽ അഭിനയിക്കുന്ന സിനിമ കൂടിയാണിത്. കൊക്കകോള പരസ്യ ബോർഡുകള്‍ ഒരു കാലത്ത് ഇറങ്ങിയിരുന്നത് ഒനിമയുടെ ചിത്രം പതിപ്പിച്ചായിരുന്നു. ഒനിമയും ജേക്കബ് ഗ്രിഗറിയും ഒന്നിച്ച 'ഓള്' എന്ന ഗാനം ഇതിനകം വൈറലാണ്.

Also Read: കൊക്കകോള ഗേൾ ഇനി മലയാള സിനിമയിൽ; ഒനിമയുടെ വിശേഷങ്ങൾ

വേഫെറെർ ഫിലിംസിന്‍റെ ബാനറിൽ ദുൽഖർ സൽമാനും ജേക്കബ് ഗ്രിഗറിയും ചേർന്ന് നിർമ്മിക്കുന്ന ചിത്രം സംവിധാനം ചെയ്യുന്നത് ഷംസു സായ്ബയാണ്. ചിത്രത്തിൽ ഈ നായികമാരെ കൂടാതെ ഷൈൻ ടോം ചാക്കോ, കൃഷ്ണശങ്കർ, വിജയരാഘവൻ, ഇന്ദ്രൻസ്, സുധീഷ്, ശ്രീലക്ഷ്മി തുടങ്ങി വലിയൊരു താരനിര തന്നെ അണിനിരക്കുന്നുണ്ട്. വിനീത് കൃഷ്ണൻ തിരക്കഥയും സജാദ് കാക്കു ഛായാഗ്രഹണവും അപ്പു ഭട്ടതിരി എഡിറ്റിങ്ങും ശ്രീഹരി കെ നായർ സംഗീതവും നിർവഹിക്കുന്നതാണ് ചിത്രം. ഷിയാസ് അമ്മദ്കോയയുടേതാണ് ഗാനരചന. അരുൺ എസ് മണി, വിഷ്ണു പിസി എന്നിവർ സൗണ്ട് ഡിസൈനും ജയൻ ക്രയോൺ പ്രൊഡക്ഷൻ ഡിസൈനറുമാണ്. പിആർഓ ആതിര ദിൽജിത്ത് എന്നിവരാണ്.