'അവള് സംഘിയാടാ' രാത്രി വഴിയിലുണ്ടായ ദുരനുഭവം പങ്കുവച്ച് അനുശ്രീ

കഴിഞ്ഞ ദിവസം തനിക്കുണ്ടായ ഞെട്ടിക്കുന്ന അനുഭവം പങ്കുവെച്ച്‌ നടി അനുശ്രീ ഫേസ്ബുക്ക് ലൈവില്‍. ഈരാറ്റുപേട്ടയ്ക്ക് സമീപത്ത് സിനിമാ ചിത്രീകരണത്തിന് പോയപ്പോഴുണ്ടായ അനുഭവമാണ് ഈസ്റ്റര്‍ ദിനത്തില്‍ അനുശ്രീ പങ്കുവച്ചത്.

ഷൂട്ടിങ്ങിനു പോയ സമയത്ത് വണ്ടി നിര്‍ത്തി കൂടെയുണ്ടായിരുന്ന സഹോദരന്‍ ഭക്ഷണം വാങ്ങിക്കാന്‍ പോയി. ഒരു പള്ളിയുടെ സമീപത്തായിരുന്നു വണ്ടി നിര്‍ത്തിയത്. കുറച്ച്‌ പേര്‍ അനുശ്രീ, അനുശ്രീ എന്നു വിളിച്ചു. എന്നാല്‍ അവിടെയുള്ള രണ്ട് പയ്യന്‍മാര്‍ ബൈക്കില്‍ വന്ന്, 'അത് അവളാ സംഘിയാടാ' എന്നൊക്കെ പറഞ്ഞ് ആക്രോശിച്ചു. സത്യത്തില്‍ ഭയപ്പെട്ടുപോയെന്നും അനുശ്രീ.

ഉടന്‍ തന്നെ സഹോദരനെ ഫോണില്‍ വിളിച്ചു. രാത്രിയില്‍ വല്ല സ്ഥലത്തും ഒറ്റയ്ക്കു പോകേണ്ടി വന്നാല്‍ ഇങ്ങനെയൊക്കെ ചിന്തിക്കുന്നവരുടെ ഇടയില്‍ പെട്ടുപോയാല്‍ എന്ത് ചെയ്യുമെന്നും അനുശ്രീ ചോദിക്കുന്നു.

ശ്രീകൃഷ്ണ ജയന്തിക്ക് അനുശ്രീ ഭാരതാംബയുടെ വേഷമണിഞ്ഞ് ഘോഷയാത്രയില്‍ പങ്കെടുത്തതോടെ അനുശ്രീ സംഘിയാണെന്ന തരത്തിലുള്ള പ്രചരണം ശക്തമായിരുന്നു. ഇതിനുള്ള മറുപടിയും ഫേസ്ബുക്ക് ലൈവിലുടെ അനുശ്രീ നല്‍കിയിട്ടുണ്ട്.