സനൂഷയെ അപമാനിക്കാൻ ശ്രമിച്ച കേസ്: ജാമ്യാപേക്ഷ തള്ളി

തൃശൂർ: നടി സനൂഷയെ ട്രെയിനിൽ വെച്ച് പീഡിപ്പിക്കാൻ ശ്രമിച്ചയാളുടെ ജാമ്യാപേക്ഷ കോടതി തള്ളി. കന്യാകുമാരി സ്വദേശി ആന്‍റോ ബോസാണ് അറസ്റ്റിലായത്. സനൂഷ നൽകിയ പരാതിയിൽ കഴമ്പുണ്ടെന്ന് കോടതി കണ്ടെത്തി. കേസിൽ കഴിഞ്ഞ ദിവസം സനൂഷ രഹസ്യമൊഴി നൽകിയിരുന്നു.

മാവേലി എക്സപ്രസിന്‍റെ എസി കോച്ചിൽ ഫെബ്രുവരി ഒന്നിന് യാത്ര ചെയ്യുന്നതിനിടെയാണ് സനൂഷയെ ആന്‍റോ ബോസ് അപമാനിക്കാൻ ശ്രമിച്ചത്. തുടർന്ന് സനൂഷ പോലീസിൽ പരാതി നൽകുകയും പരാതിയുമായി മുന്നോട്ട് പോകുകയും ചെയ്തു. സനൂഷ കാണിച്ച ധൈര്യത്തെ ഡിജിപി ലോക്‌നാഥ് ബെഹ്‌റ അഭിനന്ദിച്ചിരുന്നു. ഉറക്കത്തിനിടെയാണ് സനൂഷയെ ആന്‍റോ അപമാനിക്കാൻ ശ്രമിച്ചത്. ബ്ലഡ് ഷുഗര്‍ നിലയില്‍ വ്യത്യാസം ഉണ്ടായപ്പോള്‍ അറിയാതെ കൈ തട്ടിയതാണെന്നായിരുന്നു പ്രതിയുടെ വാദം. എന്നാല്‍ പൊലീസ് ഇത് വിശ്വസിച്ചിട്ടില്ല. ഇന്ത്യന്‍ ശിക്ഷാ നിയമം 354 വകുപ്പ് പ്രകാരമാണ് ഇയാള്‍ക്കെതിരെ കേസ് എടുത്തിരിക്കുന്നത്.