മഞ്ജുവിന്‍റെ ആരാധിക റാബിയ മുത്തശ്ശി വെള്ളിത്തിരയിലേക്ക്

മലയാളത്തിലെ ലേഡി സൂപ്പർ സ്റ്റാർ മഞ്ജുവാര്യരുടെ ഈ ആരാധികയെ ആരും മറക്കാൻ ഇടയില്ല. പറഞ്ഞുവരുന്നത് അടുത്തിടെ സാമൂഹ്യമാധ്യമങ്ങളിൽ തരംഗമായ റാബിയ എന്ന മുത്തശ്ശിയെ കുറിച്ചാണ്. കോഴിക്കോട്ട് ഒരു പൊതുചടങ്ങിൽ പങ്കെടുക്കാൻ എത്തിയ മഞ്ജുവിനെ ഈ മുത്തശ്ശി ഓടിച്ചെന്ന് കെട്ടിപ്പിടിക്കുകയായിരുന്നു. നിറകണ്ണുമായിട്ടായിരുന്നു മുത്തശ്ശി മഞ്ജുവിന്‍റെ അരികിലേക്ക് ചെന്നത്. എന്തിനാണ് കരയുന്നതെന്ന് മഞ്ജു ചോദിച്ചപ്പോൾ സന്തോഷം കൊണ്ടെന്നായിരുന്നു മുത്തശ്ശിയുടെ മറുപടി. അല്പനേരത്തിനുള്ളിൽ മുത്തശ്ശി അവിടെ നിന്ന് പിൻവാങ്ങുകയും ചെയ്തിരുന്നു.

അതീവ സ്‌നേഹത്തോടെ മഞ്ജുവിനെ കെട്ടിപ്പിടിക്കുന്ന മുത്തശ്ശിയുടെ ചിത്രവും വീഡിയോയുമൊക്കെ നിമിഷ നേരം കൊണ്ടായിരുന്നു സാമൂഹ്യ മാധ്യമങ്ങളിൽ വൈറലായത്. മുത്തശ്ശിയെ കുറിച്ച് മഞ്ജുവും തന്‍റെ ഫേസ്ബുക്കിൽ പരാമർശിച്ചിരുന്നു. മുത്തശ്ശി ആരെന്ന് അറിയാതെ മഞ്ജു കടന്നുപോയപ്പോഴും ക്യാമറ കണ്ണുകൾ മുത്തശ്ശിയെ പിന്തുടർന്ന് ആരെന്ന് കണ്ടെത്തി. തുടർന്നായിരുന്നു ആകാശവാണിയിലെ ആര്‍ട്ടിസ്റ്റായിരുന്ന റാബിയ ബീഗമാണെന്ന കാര്യം തിരിച്ചറിഞ്ഞത്.

കോഴിക്കോട് ആകാശവാണിയുടെ ഉദ്ഘാടനത്തിന് പാടാനെത്തിയ റാബിയ പാട്ടും നാടകവുമായി ആകാശവാണിയിൽ തുടരുകയായിരുന്നു. അതിനിടെ ചെമ്മീനിലെ നായികയാവാൻ ക്ഷണിച്ചുകൊണ്ട് രാമുകാര്യാട്ട് റാബിയയെ സമീപിച്ചിരുന്നു. എന്നാൽ യാഥാസ്ഥിതിക മുസ്ലീം കുടുംബത്തിൽ ജനിച്ചുവളർന്ന റാബിയ എതിർപ്പുകളെ ഭയന്ന് സിനിമ വേണ്ടെന്ന് വയ്ക്കുകയായിരുന്നു. കറുത്തമ്മയാകാനുള്ള ക്ഷണം റാബിയ തന്നെ ഉപേക്ഷിച്ചു.



അന്നു നടക്കാതെ പോയ ആഗ്രഹം റാബിയ മുത്തശ്ശി ഇപ്പോൾ വെളിപ്പെടുത്തിയപ്പോൾ സംവിധായകൻ ആദിയാണ് പുതിയ ചിത്രത്തിലേക്ക് റാബിയ മുത്തശ്ശിയെ പരിഗണിച്ചിരിക്കുന്നത്. ചെറുപ്പത്തിൽ സാധിക്കാതെ പോയ ആഗ്രഹം സഫലമാകുന്നതിന്‍റെ സന്തോഷത്തിലാണ് റാബിയയും. ഫുട്‌ബോളിനെ ഏറെ ഇഷ്ടപ്പെടുന്ന കഥാപാത്രത്തെയാണ് റാബിയ ഈ ചിത്രത്തില്‍ അവതരിപ്പിക്കുന്നത്.

'പന്ത്' എന്ന് പേരിട്ടിരിക്കുന്ന ചിത്രത്തിന്‍റെ സംവിധാനവും രചനയും ആദിയാണ് നിർവഹിക്കുന്നത്. വിനീത്, നെടുമുടി വേണു, ഇന്ദ്രന്‍സ്, സുധീര്‍ കരമന , ഇര്‍ഷാദ്, വിനോദ് കോവൂര്‍ എന്നിവരും ഈ ചിത്രത്തിൽ വേഷമിടുന്നുണ്ട്. പൊന്നാനിയും പരിസര പ്രദേശങ്ങളുമാണ് ചിത്രത്തിന്‍റെ പ്രധാന ലൊക്കേഷനുകൾ.

Beegum Rabia's entry to Malayalam Film

Beegum Rabia got opportunity in the Malayalam Film Panthu, Directed by Aadi.