കുട്ടിക്കാല ചിത്രം
താരങ്ങളുടെ കുട്ടിക്കാല ചിത്രം സോഷ്യല്‍ മീഡിയയിലൂടെ പ്രചരിക്കാറുണ്ട്. ബിജു മേനോന്റേയും സംയുക്ത വര്‍മ്മയുടേയും ചിത്രങ്ങളാണ് ഇപ്പോള്‍ പ്രചരിക്കുന്നത്. സംയുക്ത വര്‍മ്മയെ മനസ്സിലാവുന്നുണ്ടെന്നും ബിജു മേനോനെ മനസ്സിലാവുന്നേയില്ലെന്നുമായിരുന്നു ഫോട്ടോ കണ്ടവരുടെ കമന്റ്. സംയുക്ത വര്‍മ്മയുടെ ചിരി അന്നത്തേത് പോലെ തന്നെയാണ് ഇപ്പോഴും. ബിജു മേനോനാവട്ടെ ആകെ മാറിയിരിക്കുകയുമാണ്.
സിനിമയിലെത്തിയത്
സത്യന്‍ അന്തിക്കാട് സംവിധാനം ചെയ്ത വീണ്ടും ചില വീട്ടുകാര്യങ്ങളിലൂടെയാണ് സംയുക്ത വര്‍മ്മ അഭിനയ ജീവിതത്തിന് തുടക്കമിട്ടത്. ചുരുങ്ങിയ കാലം കൊണ്ട് തന്നെ മികച്ച ശ്രദ്ധ നേടിയ താരത്തിന് മുന്‍നിര താരങ്ങള്‍ക്കും സംവിധായകര്‍ക്കുമൊപ്പമെല്ലാം പ്രവര്‍ത്തിക്കാനുള്ള അവസരവും ലഭിച്ചിരുന്നു. 4 വര്‍ഷത്തിന് ശേഷം സിനിമയില്‍ നിന്നും അപ്രത്യക്ഷയാവുകയായിരുന്നു താരം.
ഇടവേളയില്‍
വിവാഹത്തോടെയാണ് സംയുക്ത വര്‍മ്മ സിനിമയില്‍ നിന്നും ഇടവേളയെടുത്തത്. മികച്ച അവസരങ്ങള്‍ തേടിയെത്തിയിരുന്നുവെങ്കിലും താരം സ്വീകരിച്ചിരുന്നില്ല. ബിജു മേനോന്റെ നായികയായി അഭിനയിക്കാനുള്ള അവസരവും ലഭിച്ചിരുന്നു. തിരിച്ചുവരവിനെക്കുറിച്ച് ചോദിക്കുമ്പോളെല്ലാം സംയുക്തയാണ് അത് തീരുമാനിക്കേണ്ടത്, അവള്‍ തിരിച്ചുവരുന്നതില്‍ തനിക്ക് കുഴപ്പമൊന്നുമില്ലെന്നുള്ള മറുപടിയാണ് ബിജു മേനോന്‍ നല്‍കാറുള്ളത്.
പൊതുവേദിയില്‍
സിനിമയില്‍ സജീവമല്ലെങ്കിലും പൊതുപരിപാടികളിലും ചടങ്ങുകളിലുമെല്ലാം പങ്കെടുക്കാറുണ്ട് സംയുക്ത വര്‍മ്മ. കുടുംബസമേതമായുള്ള ചിത്രങ്ങളും വീഡിയോയുമെല്ലാം വൈറലായി മാറാറുമുണ്ട്. ചെറിയമ്മയായ ഉൗര്‍മ്മിള ഉണ്ണിയുടെ മകള്‍ ഉത്തര ഉണ്ണിയുടെ വിവാഹത്തിലെ ചിത്രങ്ങളായിരുന്നു അടുത്തിടെ വൈറലായി മാറിയത്. സംയുക്തയും കുടുംബവും തിളങ്ങിയ ചടങ്ങ് കൂടിയായിരുന്നു ഇത്.