ആഢംഭര ഫ്ലാറ്റിനു വാടക നല്‍കിയില്ല; മല്ലികാ ഷെരാവത്തിനെ കുടിയിറക്കാന്‍ ഉത്തരവ്

വാടക കുടിശ്ശികയില്‍ വീഴ്ച വരുത്തിയതിനെത്തുടര്‍ന്ന് ബോളിവുഡ് താരം മല്ലിക ഷെരാവത്തിനെ പാരിസിലെ ആഡംബര ഫ്‌ളാറ്റില്‍ നിന്നും കുടിയിറക്കാന്‍ ഫ്രഞ്ച് കോടതി ഉത്തരവിട്ടതായി റിപ്പോര്‍ട്ട്. മല്ലിക ഷെരാവത്തും ഫ്രഞ്ച് പൗരനായ ഭര്‍ത്താവ് സിറില്‍ ഓക്‌സന്‍ഫാന്‍സും കുടിശ്ശികയായി 78787 യൂറോ(ഏകദേശം 64 ലക്ഷം ഇന്ത്യന്‍ രൂപ) നല്‍കാനുണ്ടെന്ന് വീട്ടുടമസ്ഥന്‍ പരാതി നല്‍കിയിരുന്നു. ഇതേ തുടര്‍ന്നാണ് ഇരുവരെയും ഇറക്കിവിടാന്‍ കോടതി ഉത്തരവിട്ടത്

കഴിഞ്ഞ വര്‍ഷം ജനുവരിയിലാണ് ഇരുവരും ഫ്ലാറ്റില്‍ താമസം തുടങ്ങിയത്. ഇരുവരും ചേര്‍ന്ന് ഇതുവരെ ആകെ 2715 യൂറോ മാത്രമേ വാടകയിനത്തില്‍ നല്‍കിയിട്ടുള്ളു എന്നാണ് പരാതിക്കാരന്‍ കോടതിയെ ബോധിപ്പിച്ചത്. ദമ്പതികള്‍ കടുത്ത സാമ്പത്തിക ബുദ്ധിമുട്ടിലാണെന്നാണ് ഇരുവര്‍ക്കും വേണ്ടി കോടതിയില്‍ ഹാജരായ അഭിഭാഷകന്‍ വാദിച്ചത്.

എന്നാല്‍ മല്ലികയ്ക്ക് യാതൊരു വിധത്തിലുള്ള സാമ്പത്തിക ബുദ്ധിമുട്ടുകളും ഉണ്ടായിരുന്നില്ലെന്നാണ് വീടുമസ്ഥന്‍റെ വാദം. മാധ്യമങ്ങളില്‍ വന്ന വാര്‍ത്ത ശരിയല്ലെന്നും സിറില്‍ തന്റെ ഭര്‍ത്താവല്ലെന്നും സുഹൃത്ത് മാത്രമാണെന്നും തങ്ങള്‍ക്ക് പാരിസില്‍ ഫ്‌ളാറ്റില്ലെന്നുമാണ് മല്ലിക വാര്‍ത്തയോട് പ്രതികരിച്ചത്.