ഞാൻ അഭിനയിച്ച സിനിമകളെല്ലാം നിരോധിക്കണം: ട്വിങ്കിള്‍

“എന്റെ സിനിമകളെല്ലാം നിരോധിക്കണം, ആരും മേലിൽ അവയൊന്നും കാണരുത്’‐ പറയുന്നത് ബോളിവുഡിലെ മുൻകാലതാരം ട്വിങ്കിള്‍ ഖന്നയാണ്. മുൻകാല താരജോടികളായ രാജേഷ് ഖന്നയുടെയും ഡിംപിൾ കപാഡിയയുടെയും മകൾ,ബോളിവുഡിലെ സൂപ്പർതാരം അക്ഷയ് കുമാറിന്റെ ഭാര്യ. പൈജാമാസ് ആർ ഫൊർഗീവിങ് എന്ന മൂന്നാം പുസ്തകത്തിന്റെ പ്രകാശനവേളയിലാണ് ട്വിങ്കിൾ തന്‍റെ അഭിനയത്തെ സ്വയംപരിഹസിച്ചത്.

അഭിനയം ഉപേക്ഷിച്ച് എഴുത്തിലേക്ക് കടന്ന ട്വിങ്കിളിന്‍റെ ആദ്യപുസ്തകം മിസ‌് ഫണ്ണിബോൺസ് പെൻഗ്വിന്റെ അന്താരാഷ്ട്ര ബെസ്റ്റ് സെല്ലർ പട്ടികയിൽ ഇടംപിടിച്ചിരുന്നു. രണ്ടാംപുസ്തകം ദ ലെജന്റ് ഓഫ് ലക്ഷ്മി പ്രസാദ് ഒരു ലക്ഷത്തിലേറെ കോപ്പികൾ വിറ്റഴിഞ്ഞിട്ടുമുണ്ട്. അതിനുശേഷമാണിപ്പോള്‍ മൂന്നാമത്തെ പുസ്തകം.
1995ൽ ബർസാത്ത് എന്ന ചിത്രത്തിലൂടെ ബോളിവുഡിൽ അരങ്ങേറിയ ട്വിങ്കിൾ ഇതുവരെ 14 ചിത്രങ്ങളിലാണ് അഭിനയിച്ചിട്ടുള്ളത്.

മേള, ദിൽ തേര ദിവാന, ജോരു ക ഗുലാം, ജബ് പ്യാർ കിസീസെ ഹോതാ ഹൈ തുടങ്ങിയ അഭിനയിച്ച എല്ലാ സിനിമയും പൊട്ടി. 2001ൽ ലൗ കേലിയേ കുച്ച് ഭീ കരേംഗേ എന്ന ചിത്രത്തോടെ നായികാമോഹം പൂർണമായി ഉപേക്ഷിക്കുകയായിരുന്നു. നടി എന്ന നിലയിൽ പരാജയമായതിനാലാണ് ഇനി മേലിൽ ആർക്കും തന്നെ കുറ്റം പറയാൻ കഴിയാത്തവിധം അവയെല്ലാം നിരോധിക്കണമന്ന് നർമരൂപത്തിൽ ഇത് പറയാനിടയായതെന്ന് ട്വിങ്കിളിന്‍റെ വാക്കുകള്‍.