പ്രദര്‍ശനം നിര്‍ത്തിവെക്കാൻ 'വരത്തന്' കോടതി നോട്ടീസ്

കൊച്ചി: തീയേറ്ററുകളിൽ വിജയകരമായി പ്രദ‍ർശനം തുടരുന്ന ഫഹദ് ഫാസിൽ ചിത്രം 'വരത്തൻ' നി‍ർത്തിവെക്കാൻ ആവശ്യപ്പെട്ട് നോട്ടീസ്. സിനിമയില്‍ തങ്ങളുടെ കുടുംബത്തെ അപകീര്‍ത്തിപ്പെടുത്തിയെന്ന് ആരോപിച്ച്‌ "പാപ്പാളി" കുടുംബം നല്‍കിയ ഹര്‍ജിയിലാണ് കോടതി നോട്ടീസ്. സംവിധായകന്‍ അമല്‍ നീരദ്, നിര്‍മ്മാതാവ് നസ്രിയ , തിരക്കഥകൃത്തുക്കള്‍ സുഹാസ്, ഷര്‍ഫു ഇവര്‍ക്കാണ് നോട്ടീസ് അയച്ചിരിക്കുന്നത്. ചിത്രത്തില്‍ പ്രധാന കഥാപാത്രങ്ങളായി വരുന്നവരുടെ വീട്ട് പേര് "പാപ്പാളി" എന്നാണ് .

സാമൂഹ്യവിരുദ്ധരായാണ് ചിത്രത്തിൽ ഇവരെ അവതരിപ്പിച്ചിട്ടുള്ളത്. കുടുംബ പേര് ഉപയോഗിച്ച്‌ തങ്ങളെ സമൂഹത്തില്‍ താറടിച്ച്‌ കാട്ടുകയാണ് സിനിമയുടെ അണിയറ പ്രവര്‍ത്തക‍ർ ചെയ്‌തതെന്നാണ് പരാതി. തിരക്കഥ എഴുതിയവരില്‍ ഒരാള്‍ എറണാകുളം സ്വദേശിയാണെന്നും ഇദ്ദേഹത്തിന് പാപ്പാളി കുടുംബത്തെ കുറിച്ച്‌ ധാരണയുണ്ടെന്നും ഹ‍ർജിയിൽ പറയുന്നു. അഭിഭാഷകരായ രാജേഷ് കെ രാജു, രാകേഷ് വിആര്‍ എന്നിവര്‍ മുഖേനയാണ് പാപ്പാളി കുടുംബം ഹ‍ർജി നൽകിയത്