ദിലീപിനെ കോടതിയിലെത്തിച്ചു; കസ്റ്റഡി അപേക്ഷ പരിഗണിക്കും

കൊച്ചി: കൊച്ചിയിൽ നടിയെ ആക്രമിച്ചതുമായി ബന്ധപ്പെട്ട് ഗൂഢാലോചനക്കേസിൽ അറസ്റ്റിലായ നടന്‍ ദിലീപിനെ കോടതിയിൽ എത്തിച്ചു. അങ്കമാലി ഒന്നാം ക്ലാസ് മജിസ്ട്രേറ്റ് കോടതിയിലാണ് ദിലീപിനെ എത്തിച്ചിരിക്കുന്നത്. ദിലീപിനെ കസ്റ്റഡിയില്‍ വിട്ടുനല്‍കണമെന്ന് പോലീസ് ഇന്ന് കോടതിയില്‍ ആവശ്യപ്പെടും. ദിലീപിന്‍റെ ജാമ്യാപേക്ഷയും മജിസ്ട്രേറ്റ് കോടതി പരിഗണിക്കും. സുരക്ഷാപ്രശ്നം പരിഗണിച്ച് മജിസ്ട്രേറ്റിന്‍റെ ചേംബറിലാണ് ദിലീപിനെ ഹാജരാക്കുക. പതിനൊന്ന് മണിയോടെയാണ് കോടതി നടപടികൾ ആരംഭിക്കുക.

താന്‍ നിരപരാധിയാണെന്നും കള്ളക്കേസില്‍ കുടുക്കുകയായിരുന്നുവെന്നും ദിലീപ് ജാമ്യാപേക്ഷയില്‍ ചൂണ്ടിക്കാട്ടുന്നു. അന്വേഷണത്തോട് പൂര്‍ണമായും സഹകരിച്ചിട്ടുണ്ടെന്നും ജാമ്യാപേക്ഷയില്‍ പറയുന്നുണ്ട്. നിരവധി ആരോപണങ്ങളാണ് ജാമ്യാപേക്ഷയില്‍ ഉന്നയിച്ചിരിക്കുന്നത്. പ്രതിയുടെ വിശ്വാസ യോഗ്യമല്ലാത്ത മൊഴിയിലാണ് തന്നെ അറസ്റ്റ് ചെയ്തതെന്നും ദിലീപ് ആരോപിക്കുന്നു.

അഡ്വ. രാംകുമാറാണ് ദിലീപിന് വേണ്ടി കോടതിയില്‍ ഹാജരാകുക. കേസിന്‍റെ കൂടുതല്‍ അന്വേഷണത്തിനായി ദിലീപിനെ പോലീസ് കസ്റ്റ‍ഡിയില്‍ വിട്ടുനല്‍കാനാണ് സാധ്യത കൂടുതല്‍. കോടതിയിലെത്തിയ രാംകുമാറിനെ അവിടെ തടിച്ചു കൂടിയ ജനങ്ങൾ കൂക്കിവിളിച്ചാണ് സ്വീകരിച്ചത്. മാധ്യമങ്ങളോട് അദ്ദേഹം പ്രതികരിക്കാൻ മുതിർന്നില്ല. എല്ലാം കോടതിയിൽ പറഞ്ഞോളാം എന്നാണ് അദ്ദേഹം വ്യക്തമാക്കിയത്.

Court to consider bail application of Dileep

Court to consider bail application of Dileep regarding Actress Attack Case