സാധികയുടെ വ്യാജ എഫ്.ബി അക്കൗണ്ടിലൂടെ പണം തട്ടാൻ ശ്രമം

ടെലിവിഷൻ അവതാരികയും നടിയുമായ സാധിക വേണുഗോപാലിന്റെ പേരിൽ ഫേസ്ബുക്കിലൂടെ വ്യാജ ഐഡി ഉപയോഗിച്ച് പണം തട്ടാൻ ശ്രമം. ഇത് തിരിച്ചറിഞ്ഞ സാധിക തന്നെയാണ് തന്റെ യഥാർത്ഥ അക്കൗണ്ടിലൂടെ കാര്യങ്ങൾ പുറത്തു കൊണ്ട് വന്നത്. സാധിക എന്ന പേരിൽ പ്രശസ്തയായ ഈ നടി 2005 മുതൽ മലയാള സീരിയൽ, ടെലിവിഷൻ രംഗത്ത് ആക്റ്റീവ് ആണ്. സാധികയുടെ ഫോട്ടോ വെച്ച് ലാറ താതൻ എന്ന പേരിലുള്ള അക്കൗണ്ട് വഴിയാണ് പണം തട്ടാൻ ശ്രമം നടക്കുന്നത്. തന്റെ ഭർത്താവിന് സുഖമില്ലെന്നും, ചികിസ്തക്കായി പണം ആവശ്യമുണ്ടെന്നും പറഞ്ഞാണ് പണം തട്ടാൻ ശ്രമം നടക്കുന്നത്. ഈ ആവശ്യം പറഞ്ഞു മെസ്സേജുകൾ അയച്ചാണ് പണം ആവശ്യപ്പെടുന്നത്. ഭർത്താവിന് കാൻസർ ആണെന്നാണ് മറ്റുള്ളവരോട് പറയുന്നത്.


ഒരു തമിഴ് നാട് സ്വദേശിയുടെ അക്കൗണ്ട് ആണ് ഇതെന്നാണ് വ്യക്തമാകുന്നത്. കാരണം ഈ അക്കൗണ്ടിൽ ഉള്ള പോസ്റ്റുകൾ തമിഴ് ഭാഷയിൽ ആണ്. കൂടാതെ അയക്കുന്ന മെസ്സേജുകളിലും തമിഴ് കലർന്ന ഇംഗ്ലീഷ് ആണ് കടന്നു വരുന്നത്. തന്റെ ചിത്രം വെച്ച് പണം തട്ടാൻ ഉള്ള ശ്രമം അറിഞ്ഞതോടെ സാധിക തന്റെ റിയൽ ഫേസ്ബുക് അക്കൗണ്ടിലൂടെ പോസ്റ്റ് ഇട്ടു കാര്യം ജനങ്ങളെ അറിയിക്കുകയായിരുന്നു. ഈ ഫേക് അക്കൗണ്ട് ലിങ്കും ഇതിൽ നിന്ന് പണം ആവശ്യപ്പെട്ടു അയച്ചിരിക്കുന്നു മെസ്സേജുകളുടെ സ്ക്രീൻ ഷോട്ടും സാധിക മറ്റുള്ളവരുടെ അറിവിലേക്കായി പോസ്റ്റ് ചെയ്തിട്ടുണ്ട്. ഇനിയാരും ഇതിൽ പോയി തല വെച്ച് കൊടുത്തു പണം നഷ്ടപ്പെടുത്തരുത് എന്നും സാധിക പറയുന്നു.