രൺവീർ-ദീപിക വിവാഹം നവംബറിൽ ?

ബോളിവുഡ് താരങ്ങളായ ദീപിക പദുക്കോണും രണ്‍വീര്‍ സിംഗും നവംബര്‍ 19ന് വിദേശത്ത് വച്ച്‌ വിവാഹിതരാകുമെന്ന് സൂചന. തങ്ങളുടെ വിവാഹവാ‍ർത്തകളോട് കഴിഞ്ഞ ദിവസം ഒരു ബ്രിട്ടീഷ് മാസികയ്ക്ക് നല്‍കിയ അഭിമുഖത്തില്‍ ദീപിക പ്രതികരിച്ചിതിങ്ങനെയാണ്.

ഞാന്‍ പരമാവധി ഇത്തരം പ്രചരണങ്ങളില്‍ നിന്ന് വിട്ടു നില്‍ക്കാറുണ്ട്. പക്ഷേ ഗോസിപ്പുകളെ നിയന്ത്രിക്കാനോ അല്ലെങ്കില്‍ ഇല്ലാതാക്കാനോ ഞാന്‍ ശ്രമിക്കാറില്ല. കാരണം എനിക്ക് സമയമില്ല. വിവാഹം കുട്ടിക്കളിയല്ല. എന്റെ മാതാപിതാക്കളാണ് ഞാന്‍ കണ്ടതില്‍ ഏറ്റവും മികച്ച ദമ്പതിമാര്‍. അവരാണ് എന്റെ മാതൃക. ഒരുകാര്യം തീര്‍ച്ചയാണ് എനിക്ക് കുഞ്ഞുങ്ങള്‍ വേണമെന്നും ദീപിക കൂട്ടിച്ചേർത്തു

പദ്മാവതിന് ശേഷം സിംബ, ഗള്ളി ബോയ്‌സ് എന്നീ സിനിമകളുടെ തിരക്കിലാണ് രണ്‍വീര്‍. എന്നാല്‍ ദീപിക പുതിയ ചിത്രങ്ങളൊന്നും ഏറ്റെടുത്തിട്ടില്ല. വിവാഹത്തെക്കുറിച്ച്‌ രണ്‍വീറിനോട് ചോദിച്ചപ്പോള്‍ തന്റെ മനസ്സില്‍ അങ്ങനെ ഒരു ആഗ്രഹമുണ്ടെന്നും ഈ വര്‍ഷം തന്നെ വിവാഹിതനാകുമെന്നും രണ്‍വീര്‍ തുറന്ന് പറഞ്ഞിട്ടുമുണ്ട്.