വിവാഹശേഷം ദീപിക പദുക്കോൺ പേര് മാറ്റിയോ?

വിവാഹത്തിന് ശേഷം നടിമാര്‍ പേര് മാറ്റുന്നത് അത്ര പുതിയ കാര്യമൊന്നുമല്ല. എന്നാല്‍ ബോളിവുഡില്‍ ഇതൊരു ചര്‍ച്ചാ വിഷമായത് അഭിനേത്രി സോനം കപൂര്‍ വിവാഹിത ആയപ്പോഴാണ്. താനൊരു ഫെമിനിസ്റ്റാണെന്ന് എവിടെയും തുറന്നു പറയുന്ന സോനം വിവാഹത്തിന് ശേഷം ഭര്‍ത്താവിന്‍റെ പേര് കൂടി ഒപ്പം ചേര്‍ത്തതിനെ പലരും വിമര്‍ശിച്ചിരുന്നു.

സോനം കപൂര്‍ എന്നത് സോനം കെ അഹൂജ എന്നാണ് സോനം മാറ്റിയത്. ആനന്ദ് അഹൂജയാണ് സോനമിന്‍റെ ഭര്‍ത്താവ്. എന്നാല്‍ ഈ ചോദ്യത്തിന് ഉത്തരമായി "ആനന്ദും പേര് മാറ്റി. അത് ആരും കാണുന്നും ചോദിക്കുന്നും ഇല്ലേ" എന്നാണ് സോനം തിരിച്ചടിച്ചത്. അപ്പോഴാണ് ആനന്ദും പേര് ആനന്ദ് എസ് അഹൂജ എന്ന് മാറ്റിയത് പലരും ശ്രദ്ധിച്ചത്.

അടുത്തിടെ വിവാഹിതയായ ബോിവുഡ് സൂപ്പര്‍ താരം ദീപിക പദുക്കോണും ഇതേപ്പറ്റിയുള്ള ചോദ്യങ്ങൾ അഭിമുഖീകരിക്കേണ്ടി വന്നു. ഇതുവരെ സോഷ്യഷ മീഡിയയില്‍ പേര് മാറ്റാന്‍ ദീപികയോ ഭര്‍ത്താവ് രൺവീറോ ശ്രമിച്ചിട്ടില്ല. വിവാഹശേഷം ഫിലിംഫെയറിന് നല്‍കിയ അഭിമുഖത്തിലാണ് "ഞാനിനി എങ്ങനെയാണ് നിങ്ങളെ അഭിസംബോധന ചെയ്യേണ്ടത്" എന്ന ഇന്‍റര്‍വ്യൂവറിനോട് വളരെ സരസമായി ദീപിക പ്രതികരിച്ചത്.

"നോക്കൂ, നിങ്ങളെ ഞാനെന്താണ് പഠിപ്പിച്ചത്? എന്തു വിളിക്കാനാണ് പഠിപ്പിച്ചതെന്ന് ക്യാമറയ്ക്ക് മുന്നില്‍ പറയൂ" എന്ന് കുസൃതിച്ചിരിയോടെ ദീപിക തിരിച്ച് ചോദിച്ചപ്പോഴാണ് അവതാരകൻ ഉത്തരം പറഞ്ഞത്. "ദീപിക പദുക്കോൺ, വൈഫ് ഓഫ് മിസ്റ്റര്‍ രൺവീ‍ര്‍ സിങ് പദുക്കോൺ" എന്നാണ് ദീപിക അവതാരകനെ പഠിപ്പിച്ചത്. സരസമായാണെങ്കിലും തന്‍റെ നിലപാട് വളരെ ഭംഗിയായി താരം വ്യക്തമാക്കി.